Nehemiah 6

aymara-1997

1Kunapachatix Sambalat, Tobías, Guésem árabe chachampi, ukhamarak mayni uñisirinakaxampi yatipkäna, nayan wasitat pirqa jan khitins mantkaya askichañ tukuyataxatxa, janïras punkunakax uskutäkchïn ukasa,

2Sambalat, Guésem uka chachanakax mä yatiyäwi apayanipxitäna, Onó qhirwan mä kawkha jisk'a markansa nayamp jikisiñataki. Ukampis jupanakax nayar ñanqha lurañ amtasipkäna.

3Ukatsti nayax yatiyirinak khitta akham sañapataki: “Nayax janiw sarirjamäkti, jan inakt'asaw mä jach'a irnaqäwin irnaqaskta, ukhamarusa, nayatix jumanakamp jikisir sarirista ukkhaxa, lurañanakax sayantxaspawa” sasa.

4Pusi kutiw uka kipka arunak nayar sañapatak khithanipxitu, nayasti jupanakarux uka pachpakirak säyäta.

5Ukatsti Sambalat chachax phisqïr kutiw maynïr uywatapar mä qillqat apayanitu,

6ukasti akham sänwa: “Jaqinakax arunak apnaqapxi, Guésem chachas sarakiwa, jumampi judionakampix Artajerjes reyir saykatañatak wakichasipkatama, markan pirqapsa ukatakirak wasitat askichasipkatama. Jaqin parlataparjamasti, Judá uraqin reyipäñ juman munatama,

7ukatsti profetanakar Jerusalén markan utt'ayatama, ukat jupanakax ‘Judá uraqix reyinïxiwa’ sapxañapataki. Uka arunaksti, Artajerjes reyix yatispawa, ukhamasti jutamaya, purapat parlt'añäni” sasa.

8Nayasti ukxarux qillqat apayarakta, akham sasa: “Uka arunakax janiw chiqäkiti, jumakiw ukanak amuyasktaxa” sasa.

9Jupanakax nanakar sustjañ munapxitäna, ukhamat lurañanakax apanukusin jan tukuyañaxataki; ukampis nayax Tatituruw mayisïyäta, juk'amp ch'amamp irnaqaskakiñataki.

10Ukatsti, Delaías chachan Semaías yuqapäki, Mehetabel chachan allchhipäki ukan utaparuw saräyäta. Semaiasasti utapar jist'antasin situ: “Jichha arumax jumar jiwayiriw jutañ amtapxi, Tatitun utapar imantasir sarañäni, punkunak sum jist'antasiñäni” sasa.

11Nayasti juparux sistwa: “Nayjam chachanakax janiw jaltapkiti, janirakiw jakañap qhispiyasiñatakix Tatitun utaparus imantasipkiti. Nayax janipuniw imantaskiristti” sasa.

12Nayasti amuyasiyätwa, Semaiasan ukham parlañapatakix Sambalat, Tobías chachanakan jupar qullqi chilltapxatapa, janiw Tatitun khithanitjam parlkänti.

13Nayar axsarayañatakisa, juch lurañaxatakisa qullqi churapxäna, ukhamat nayar jan walit uñt'ayañataki, nayar jisk'achayañataki.

14Nayasti Tatituruw mayista: “¡Nayan Tatituxay, kuntix Sambalat, Tobías chachanakax lurapki ukanakat amtasim! ¡Nayar sustjaña munir Noadías profetisa warmitsa amtasirakim, mayni profetanakatsa janirak armasimti!” sasa.

15Pirqa lurañasti Elul phaxsina, pä tunka phisqan uru saraqataruw tukuyatäxäna, uka irnaqäwisti phisqa tunka payan urunakan tukuyasïna.

16Uñisirinakaxax ukanak yatisinxa, nanak jak'ankir markanakax wal axsarayasipxäna, p'inqachjataw uñjasipxarakïna; jupanakan aka luräwix Tatitun yanapapamp phuqhasitap yatipxatap layku.

17Uka urunakansti Judá uraqinkir jilïri aytat jaqinakax Tobías chachar walja qillqatanak apayapxäna,

18waljaniw Judänkir jaqinakax Tobiasampïñatak juramento lurapxatayna, jupan Secaniasan tullqapätapata, Secaniasax Árah chachan yuqapänwa, jupan Johanán yuqapasti Mesulam chachan phuchhapampiw jaqichasitayna, Mesulamasti Berequiasan yuqaparakïnwa.

19Ukat Tobiasxat nayraqataxan sum parlapxäna, juparusti kuntix nayax siskäyäta ukanak yatiyapxarakïna. Nayar axsarayañatakisti Tobiasax qillqatanak apayanitäna.

← Chapter 5 Chapter 7 →