Nehemiah 13

aymara-1997

1Mä urusti, Moisesan qillqatapxa, jaqinakan uñjkataw ullarasipkäna, uka qillqatansti mä kamachiw utjäna, ukasti akham sänwa: “Janipuniw amonitanakasa, moabitanakasa Tatitun markapankañapäkiti” sasa.

2Uka jaqinakasti mä kutix, janiw manq'añsa, umañsa israelitanakar churapkataynati, jan ukasti jupanakax Balaam chacharuw israelitanakar ñanqhachañ arunak arsuñapatak qullq churapxatayna. Ukampis Tatitusax uka ñanqhachañ arunak aski arunakaruw tukuyäna.

3Ukhamasti, kamachinak ist'asinsti, Israel markat yaqhachapxänwa, taqi khitinakatix jaya markat jutir jaqinakamp mayachaskatayna ukanakaruxa.

4Uka nayraqatasti, Eliasib sacerdotex Tatitusankir utapan pirwanakap uñjirïnwa. Jupasti Tobías chachan wila masipätap laykusti,

5Tobiasarux mä jach'a uta churatayna; kawkhantix nayrapachax waxt'äwinaka, inciensonaka, yänak imañäkäna, ukhamarak sapa tunkat maya churäwinaka, trigo, vino, aceite imañäkän uka uta. Taqi ukanakasti levitanakaru, q'uchurinakaru, punku uñjirinakaru, sacerdotenakar churañatakïnwa.

6Eliasib sacerdotex uk lurkatayna ukkhaxa, janiw nayax Jerusalén markan jikxataskäyätti; Artajerjes reyin kimsa tunka payani mara marka apnaqäwipanxa, nayax Babilonia markaruw reyir uñstañatak sarta; ukat mä qawqha urunakatxa reyiruw kutt'aniñatak achikt'asta,

7ukat Jerusalenar nayax kutt'anta. Ukhamat uñjta Eliasib ukan jan wali luratapa, Tobías chachar yanapañataki Tatitun utap anqäxan mä uta churatapa.

8Uka luratapasti janiw nayatak walïkänti, ukat nayax Tobiasan taqi yänakap uka utat anqarkam apsuyta.

9Ukatxa uka uta q'umachayta, ukatsti Tatitun utapankir yänaka, waxt'äwinaksa, inciensonaksa pachparuw wasitat uchayxta.

10Ukatsti kuntix levitanakaru churañax wakt'ki ukanak jan churapxatap yatirakta, ukat levitanakasa, yupaychäwin q'uchuyiritaki uskutäki uka q'uchurinakasa uraqiparkam sarxapxatapa.

11Ukat jilïri irpirinakarux tuqinuqarakta, Tatitun utapa ukham apanukupxatapata. Ukatsti sacerdotenakampiru, levitanakampiruw tantachthapta, ukatxa lurañaparkamaw jupanakar ucharakta.

12Judänkirinakasti sapa tunkat maya churäwi pirwanakar apanipxäna: trigo, vino, aceite taqi ukanaka.

13Uka pirwanak uñjañapatakisti Selemías sacerdoteru, Sadoc qillqiriru, Pedaías levitaruw utt'ayarakta; jupanakar yanapañapatakisti Zacur chachan Hanán yuqaparuw ucharakta, Mataniasan allchhiparu, jupanakan aski jaqïpxatap layku. Jupanakaw masinakaparu manq'añanak sum lakipxañapäna.

14Uk lurasasti, Tatituruw sista: ¡Diosaxay, taqi akanak lurataxat amtasitaya, Diosaxan utapar aski lurataxat janiy jumax armasimti, jupar yupaychañatak askinak lurataxat aytasitaya! sasa.

15Khä urunakan nayax Judá uraqin uñjta: yaqhipanakax sábado uruna vino lurañatak uvanak takiskiri, trigo pichunak apnaqiri, asnonakxat vino, uva wayunaka, higonaka, kunayman q'ipinak khumunaqiri, ukhamaraki sábado uruna Jerusalén markaru apanipxiri. Ukat nayax jupanakar uka urun aljañanak aljapxatap layku tuqinuqta.

16Ukhamarakiw Tiro markankiri yaqhipa ukan jakirinakax chawllanaka, kunayman aljañanakap apapxäna, Jerusalenankir judionakar sábado urun taqi ukanak aljapxarakïna.

17Ukat Judá uraqinkir jilïrinakapar tuqinuqta akham sasa: “¡Luratanakamax janipuniw walïkiti! ¡Janiw sábado uru yäqapktati!

18Nayra awkinakamax ukhamarak lurapxäna, ukat Tatitusax jiwasanakxar walja jan walt'añanak apayanistu, ukhamarak aka markxarusa. Jumanakasti ¿munasipkaktati Tatitur Israelatak q'apisiyaña sábado uru jan yäqasinxa?” sasa.

19Ukatsti arsuraktwa: intix jalantkan ukspacha, janïr sábado urux qalltkipan Jerusalenan punkunakap jist'antapxañapataki, ukatsti janirak uka uru phuqhasiñapkam jist'arapxañapataki. Ukxarusti yaqhip uywatanakaxaruw punkunakar ucharakta, sábado uruna jan kuna aljañanaksa mantayaniñapataki.

20Alakipa jaqinakasa, kunayman aljirinakasa, mä qawqha kutiw Jerusalén marka anqäxan ikipxäna.

21Nayasti jupanakarux tuqinuqtwa, jupanakan pirqa nayräxan ikipxatapata, ukat sarakta: “Jumanakatix wasitat ukham lurasipkakïta ukaxa, katuntayapxämawa” sasa. Uka urutsti janiw wasitat sábado urun jutkxapxänti.

22Ukatsti levitanakaruw mayta jupanakan q'umachasipxañapataki, ukatsti punkunak uñjiri sarapxañapataki, sábado urux yäqatäñapataki. Ukat Tatitur akham sista: “¡Diosaxay, aka lurataxat amtasimaya, juman jach'a munasiñamarjam nayat khuyapt'ayasita!” sasa.

23Uka urunakan uñjarakta yaqhip judionakaru Asdod, Amón, Moab uka markanakankir warminakamp jaqichasiri;

24jupanakan chikat wawanakaparu Asdod markan arup parliri, ukhamarak yaqha markanakan arupsa, ukampis judionakan arup parlañ janiw yatipkänti.

25Ukat jupanakar tuqinuqta, ñanqhacharakta. Yaqhipanakarusti nuwjtwa, ñik'utanakap jik'irarakta, ukatsti Tatit layku juramento lurañapatakiw wayt'arakta, jupanakasa, yuqanakapasa, phuchhanakapas janipun yaqha markat jutir jaqinakamp jaqichasiñapataki. Ukxarusti saskaktwa:

26“Jumanakax Salomón kipkarakiw juchachasipxtaxa. Walja markanak taypin janiw jupjam yaqha reyix utjkänti, Tatitux jupar munasïnwa, ukat jupax Israel markan reyipat uchäna, ukampis yaqha markankir warminakaw juparux juch lurayäna.

27Ukhamasti, janiw walikiw satäkaniti jumanakan yaqha markat jutir warminakampi jaqichasis jan wali juchanak Tatitusar ñanqhachasin lurapxañamaxa” sasa.

28Eliasib jilïr sacerdoten Joiadá yuqapan maynïr yuqapasti, Horón chiqankir Sambalat chachan tullqapänwa, juparusti Jerusalén markat jayar sarxañapatakiw alisnukta. Ukatsti Tatitumpiw parlta, juparusti saraktwa:

29“¡Diosaxay, sacerdotenakaru, levitanakaru, jumampi arust'äwi luratapar jan yäqapxatapat jupanakar mutuyam!” sasa.

30Ukhamasti, taqi kunatix yaqha markankirïki uka lurañanakat q'umachta, ukatsti sacerdotenakaru, levitanakaruw utt'ayta, sapa mayni lurañanakap phuqhañapataki;

31lawa apanirinakaruw utt'ayta, kunürutix apaniñapax wakt'ki uküru apaniñapataki, ukhamarak nayrïr achunak katuqañataki. Ukat Tatitur sarakta: “¡Diosaxay, nayat amtasita, askiruy uñjita!” sasa.