Matthew 20

aymara-1997

1“Diosan qhapaq markapax mä jach'a yapunimpi sasiwa, jupasti wali willjtaw uva yapup irnaqirinak thaqhir sari.

2Irnaqirinakampi parlt'asasti, mä urun irnaqatat qawqha qullqitix churañäki uk churañatakiw arsu, ukatsti uva yapupan irnaqiriw jupanak khithi.

3Yapunisti niya chika uru jak'aw wasitat mistüna, ukatsti plazan inäskir jaqinak uñjäna.

4Jupanakarusti sänwa: ‘Jumanakax uva yapuxar irnaqir sarasipkam, qawqhatix wakiski ukkha churapxarakïma’ sasa. Jupanakasti sarapxänwa.

5Yapunisti niya chika uruw wasitat mistüna, ukatsti niya jayp'u tuqirux wasitat mistuskakïnwa, jupanakampisti uka kipka lurarakïna.

6Niy jayp'untxän ukkhasti, wasitat plazar misturakikïna, ukansti inäskir jaqinak jikxatäna. Ukat jupanakar jiskt'äna: ‘¿Kunatarak taqpach uru jan irnaqas akankasipktasti?’ sasa.

7Yapunirusti sapxänwa: ‘Janiw khitis irnaqir achikasipkituti’ sasa. Ukat yapunix jupanakar säna: ‘Ukhamax uva yapuxar irnaqir sarasipkam’ sasa.

8“Niya ch'amakthapi jayp'urusti, yapunix yapu lurayir jilïriparuw säna: ‘Irnaqirinakar jawsam, ukatsti irnaqatapat qullqi churxam, qhipa irnaqirinakat qalltasa, nayra irnaqirinakar tukuyasa’ sasa.

9Ukapachaw jayp'u tuqir irnaqiri mantirinakax jutapxäna, jupanakasti uru phuqhatas irnaqapkaspa ukhamaw qullqi katuqasipxäna.

10Ukatsti, uru qalltatpach irnaqirinakaw mantanipxäna, jupanakasti uk uñjasax jilpach qullqi katuqañ suyapxäna; ukampis jupanakax qawqhatix mä urun irnaqatat churañäki ukkhak katuqasipxäna.

11Ukham katuqasisasti, yapunitakiw arusipxäna,

12akham sasa: ‘Qhipa tuqir purinipki uka irnaqirinakax mä juk'akixay irnaqapxchixa, jumasti jupanakarux, nanakarjamaw pachpak churaraktaxa, nanakax wali ch'am tukupxta, urpachaw lupimpisa lupjayasipxta’ sasa.

13Ukampis yapunix jupanakat maynïrirux sänwa: ‘Jilata, janiw kuna ñanqhsa lurksmati. ¿Janit jumampix qawqha qullqtix mä uru irnaqäwit katuqkäta uk parlktanxa?

14Irnaqatamat qullqi katuqasisin jank'ak sarxam. Nayaw ukham lurañ munta qhip irnaqir jutkis ukarux jumarjam churaña,

15¿Janit qullqixampix kuntix nayax munkta uk lurañaxax wakiskitu? Jan ukax, ¿janich jumatak suma chuymanïtaxax walïki?’ sasa.

16“Ukhamasti qhipankirinakax nayrankaniwa; nayrankirinakasti qhipankarakiniwa. Jawsatanakax waljaniwa, ajllitanakasti juk'anikiwa”.

17Jerusalenar sarkasinsti, Jesusax tunka payan yatiqiriparuw thakhin tantacht'äna, ukat jupanakarux säna:

18—Jumanakax uñjapxtawa, jichhax Jerusalenaruw makhatasipktan, Jaqin Yuqapax sacerdotenakan jilïripampiru, kamachi yatichirinakampir katuyatäniwa, jupanakasti jiwayañatakiw juchañchapxani,

19juparusti yaqha markankir jaqinakaruw katuyapxani, jupanakan jupat larusipxañapataki, nuwjapxañapataki, cruzar ch'akkatapxañapataki; ukampis kimsür jiwatat jaktanxani.

20Ukapachasti Zebedeon yuqanakapan taykapaw pani yuqapampi Jesusan ukar jak'achasïna, ukatsti achikt'asiñatakiw killt'asïna.

21Jesusasti juparux jiskt'änwa: —¿Kuns munta? —sasa. Jupasti sänwa: —Jumax reyit qunt'askäta ukkhax, aka pani yuqaxarux juman jak'amaruy qunt'ayarapita, maynirux kupïxamaru, maynirusti ch'iqäxamaru —sasa.

22Jesusasti ukxarux sarakïnwa: —Jumanakax janiw yatipktati kuntix mayipkta ukxa. ¿Kawkïr k'allk'u umtix umt'kä uk umt'apxasmati? Jupanakasti sapxänwa: —Umt'apxiristwa —sasa.

23Jesusasti jupanakarux sarakïnwa: —Chiqpachansa jumanakax umt'apxätawa, ukampis kupïxaxaru, jan ukax, ch'iqäxaxar qunt'añxa, janiw nayan churañax wakt'kituti, jan ukasti, khitinakatakitix Awkixax wakiyki ukanakarukiw churasini —sasa.

24Tunka yatiqirinakasti, uk ist'asin pani jila sullkatakix wal phiñasipxäna.

25Jesusasti jupanakar jawsasin sänwa: —Jumanakax yatipxtawa, juchararanak taypinxa, marka apnaqirinakax wali qhuru chuymampiw jaqinakapar apnaqi, jach'a jilïrinakasti jupanakxarux munañanïtap uñacht'ayaraki.

26Ukampis jumanak taypin janiw ukhamäñapäkiti. Jan ukasti, khititix jumanak taypin jach'äñ munki ukax, mayninakar luqtañapawa;

27khititix jumanak taypin jilankañ munchixa, mayninakan luqtiripar tukuñapawa.

28Jaqin Yuqapax janiw luqtayasir jutkiti, jan ukasti, taqinir luqtiriw juti, jakañapsa jaqinakar qhispiyañatak luqtasiriw juti —sasa.

29Kunapachatix Jesusax yatiqirinakapampi Jericó markat mistkän ukkhax, walja jaqinakaw juparux arkapxäna.

30Pani juykhu jaqinakaw thakhin qunt'atäsipkäna, Jesusan ukawja saraskir ist'asinxa, Jesusarux jach'at art'apxäna: —¡Tatay, Davidan Yuqapa, nanakat khuyapt'ayasipxita! —sasa.

31Jaqinakasti ukham arnaqapxipan amukt'apxañapatakiw tuqinuqapxäna, jupanakasti juk'ampiw jach'at art'apxäna: —¡Tatay, Davidan Yuqapa, nanakat khuyapt'ayasipxitaya! —sasa.

32Jesusasti ukawjaruw sayt'äna, juykhunakar jawsasinsti, jiskt'änwa: —¿Kun lurañaxsa jumanakatak munapxta? —sasa.

33Jupanakasti sapxänwa: —Tatay, uñjañ munapxta —sasa.

34Jesusasti jupanakat khuyapt'ayasisin, nayranakap llamkt'äna. Juykhunakasti ukspachaw uñjxapxäna, ukatsti Jesusaruw arkxapxäna.

← Chapter 19 Chapter 21 →