Leviticus 27

aymara-1997

1Tatitux Moisesaruw säna:

2“Israelitanakarux akham sarakim: Kunapachatix maynix Tatitur mä arsüwi phuqhañ munani ukasti, qawqhäkitix mä jaqin alapax ukhamarjamaw churañapa,

3mä chachatix pä tunkat suxta tunka marankamäni ukanakasti phisqa tunka qullqinak churañapawa, qawqhäkitix qullan utan tantiyt'at qullqipax ukhamarjama,

4mä warmitsti, kimsa tunka qullqi churañapawa.

5Kawkïr chachatix phisqa maranita pä tunka marankamäni ukanakasti, pä tunka qullqi churañapawa, mä warmitsti tunka qullqiraki.

6Mä yuqall wawatix mä phaxsita phisqa marankamäni ukasti phisqa qullqi churañapawa, imill wawatsti kimsa qullqiraki.

7Kawkïr jaqinakatix suxta tunka maranit amstarüni ukanakatsti, chachatxa tunka phisqan qullqi, warmitsti tunka qullqi churañapawa.

8Uka jaqitix t'aqhin jakani ukatsti janirak ukkha qullqi churañatak utjarapkani ukasti, sacerdoten ukar sarañapawa, sacerdotew qawqtix uka jaqix churkaspa ukhamarjam alap sani.

9“Uywanak tuqitsti kawkïrinakatix Tatitur luqtatäkani ukanakax Tatitutakipunïniwa,

10janirakiw yaqha uywampix turkakipatäkaspati, uka uywax juk'ampi sumäskpasa jan ukax jan walïskpasa. Turkakipatapunïni ukkhasti, luqtat uywasa, turkat uywäki ukas paypachaw Tatitutak satäni.

11“Mä q'añu uywatix Tatitur luqtañatak yaqhachatächi ukasti, uka uywax sacerdoten ukar irpatäñapawa,

12ukhamat sacerdotex qawqhänis uka uywan alapax uk sañapataki. Qawqtix sacerdotex churam siskani ukax jaysatäñapapuniwa,

13jaqipatix uka uywa kutsuyasiñ munani ukkhasti, qawqtix sacerdotex churam siskäna ukat chikatan chikatapamp yapxatat churañapäniwa.

14“Maynitix Tatitur utap luqtani ukasti, sacerdotew uka utan alap tantiyt'ani. Sacerdotex qawqhaw siskanitix ukax jaysatäñapapuniwa.

15Ukampis khititix utap Tatitur luqtkäna uk kutsuyasxañ munani ukasti, qawqhatix churam satäkän ukxarux chikatan chikatapamp yapxatat churatäxaniwa, ukhamat uka utax wasitat jupankxani.

16“Maynitix uraqipat mä chikata Tatitur luqtani ukasti, uka uraqin alapax qawqhatix uka uraqin achkaspa ukhamar alapax tantiyt'atäniwa, sapa pä patak pä tunkan kilo cebada granonakatxa, phisqa tunka qullqi churasini.

17Uka jaqitix qhispiyasiñ maran uraqip churani ukasti, alapax qawqha satäkitix ukax phuqhasiñapapunïniwa,

18ukampis qhispiyasiñ mara qhipattix Tatitur luqtani ukkhasti, sacerdotew qawqha qullqitix uka uraqit churañäki uk amuyt'ani, qawqha maratix qhispiyasiñ maratak utjaski ukarjamaw alapax iraqasini.

19“Maynitix luqtat uraqip kutsuyasxañ munani ukasti, qawqhatix alapäki ukxarux chikatan chikatapamp yapxatat churani, ukat uka uraqix wasitat jupankxarakini;

20ukampis janitix uka uraqi kutsuyaskani, ukat uka uraqix yaqhar aljatäxarakini ukkhasti, janiw wasitat uka uraq kutsuyaskxaspati.

21Kunapachatix uka uraqix qhispiyasiñ maran qhispit uñjasxani ukkhasti, Tatitutaki sata yaqhachatäxaniwa, sacerdotew uka uraq katusxarakini.

22“Maynitix wila masipan jan uraqipäkasin mä alat uraqi Tatitur churani ukkhasti,

23qhispiyasiñ mara puriniñapkamax qawqha maräskis ukhamarjamaw sacerdotex uka uraqin alap sani, ukatsti uka jaqix uka urpachaw qawqhäkitix uka uraqin alapax ukarjam churxani, ukatsti uka uraq Tatituruw luqtxani.

24Qhispiyasiñ maransti, khititix chiqpach uraqinïkasin uraqip aljkatayna uka pachpa jaqir churatäxaniwa.

25“Taqi alanakax kawkïr qullqitix qullan utan apnaqatäki ukhamarjam amuyt'atäniwa, uka qullqix tunka mayan gramoniwa.

26“Uywanakan nayrïr qallunakapasti, vaca qallüpasa, jan ukax mä oveja qallüpasa, taqi ukanakax Tatitunkxiwa, janiw wakiskxiti yaqhachañaxa.

27Mä q'añu uywatix Tatitur luqtañatak yaqhachatächi ukasti, uka uywax kutsuyatäspawa qawqhäkitix alapax ukar chikatan chikatapat mä juk'amp yapxatasa. Ukampis janitix uka uywax kutsuyatäkani ukkhasti, nayra alapar aljatäxaniwa.

28“Maynitix Tatitur yänakapat luqtxani, jaqinakäpasa, uywanakäpasa, jan ukax tuti uraqinakäpasa, taqi ukanakax janipuniw aljatäkaspati, janirakiw kutsuyatäkaspasa; taqi kunanakatix Tatitur churatäki ukanakax qullan yänakapuniwa.

29Kawkïr jaqitix jiwayatäñatak juchañchatäkän ukas janipuniw qhispiyatäkaspati, jan ukasti jiwañapapuniwa.

30“Taqi achunakata, jathanakata, quqanakan achuri achunakatsa sapa tunkat mayax Tatitunkapuniwa, jupar katuyatarakiwa.

31Maynitix uka tunkat maya churatäkän uk kutsuyasiñ munani ukkhasti, qawqhäkitix alapaxa, ukxarux chikatan chikatapat mä juk'ampi yapxatat churañapawa.

32“Uywanakatsti sapa tunkat mayax Tatitur luqtatapunïniwa,

33kawkïritix sumäki, jan sumäki ukanaksa janiw ajllitäñapäkiti, janirakiw yaqhampis turkakipatäkaspati. Turkakipatäni ukasti, suma uywasa, jan sumäki ukas paypachaw nayankani, janirakiw kutsuyatäkaspati.”

34Aka kamachi arunak Tatitux Moisesar Sinaí qullun israelitanakatak churäna.