Leviticus 24

aymara-1997

1Tatitux Moisesar akham sänwa:

2“Israelitanakarux olivo achut apsuta aceite apanipxpan sama, ukasti lamparanakax jan jiwt'ayas aqayañatakïniwa.

3Aaronaw uka lamparanak askicht'askani, ukhamat Tatitun nayraqatapan Tatitump Jikisiñ Carpa manqhan arum paqari aqañapataki, uka lamparanakasti velo anqäxan aqani. Aka kamachisti wiñayatakiwa, awkinakata wawanakapkama.

4Uka lamparanakasti Tatit nayraqatanpun qurit lurat candelero patxan aqani.

5“Mä suma jak'uta, tunka payan suma muxsa t'ant'anak lurt'am, sapa t'ant'asti pusi kilo chikatanïñapawa,

6ukatsti Tatitun nayraqatapankki uka qurit lurat mesa patxar apxatam, ukasti pä siqïñapawa, sapa siqinsti suxta t'ant'anakaw utjañapa.

7Sapa siqinsti q'uma incienso uskum, uka inciensosti t'ant'a lanti amtasiñatak nakt'at waxt'a Tatitutak luqtatäniwa.

8Uka luräwisti sapa sábado urun lurasini, israelitanakan mä wiñay arust'äwipäkaspas ukhama.

9Uka t'ant'anakasti Aaronampitaki, yuqanakapampitakïniwa, jupanakasti uka t'ant'a qullan chiqan manq'apxani, uka waxt'an aski qullan waxt'ätapa, Tatitutak nakt'ayat waxt'ätap layku.”

10Israelitanak taypinsti mayni jaqiw utjäna, tayka tuqitxa israelita taykanïnwa, awki tuqitsti mä egipciorakïnwa. Taykapax Selomit satänwa, Dan ayllunkir Dibrí siski ukan phuchhapänwa. Mä urusti uka jaqimpi, mayni israelitampiw nuwasipxäna, ukatsti kawkïritix israelita taykanïkän ukaw Tatitun sutipar ñanqhachäna. Ukat uka jaqirux Moisesan nayraqatapar irpapxäna,

12kuntix Tatitux Moisesar uka jaqit siskani uk yatiñkamaw uñjapxarakïna.

13Ukhamasti Tatitux Moisesaruw akham säna:

14“Kawkïr jaqitix nayar ñanqhachkitu ukarux campamentot anqäxar irpsupxam, khitinakatix nayar ukham ñanqhachatap ist'apkäna ukanakasti amparanakap uka ñanqhachir jaqin p'iqipxar luqxatapxpan, ukatsti uka jaqirux qalampi k'upjas jiwayapxpan.

15Israelitanakarux sarakim: Kawkïritix Tatit Diosapar ñanqhachkani ukarusti, juchap uñt'asiyapxäta, ukatsti taqi jaqinakaw qalamp k'upjas uka jaqirux jiwayapxani. Yaqha markat jutirïskpasa jan ukax pachpa israelita jaqïskpasa, Tatitun sutiptix ñanqhachkani ukasti, uka jaqix jiwayatäñapatak juchañchatäniwa.

17“Khititix jaqi masiparu jiwayani ukasti jiwayatarakïniwa.

18“Khititix jaqin uywapa jiwayani ukasti ukhamat ukham yaqha uywa kutt'ayañaparakiwa.

19“Khititix mayni jaqi masipar mä ñanqhsa lurkani ukasti, kuna ñanqhtix lurki uka kipka ñanqharak katuqani.

20P'akjatatxa p'akjatarakïniwa; uñkatatasti, uñkatatarakïniwa; tuqjatax, tuqjatarakïniwa; kuna ñanqhtix lurkäna uka kipka ñanqha katuqarakini.

21“Khititix mä uywa jiwaykani ukasti, yaqha uywa kutt'ayxani. Khititix jaqi masipar jiwaykani ukasti jiwayatarakïniwa.

22“Aka kamachisti yaqha markat jutirinakataki, ukhamarak pachpa israelitanakatakïniwa. Nayätwa jumanakan Tatit Diosamaxa.”

23Ukhamasti Moisesax israelitanakampiw parläna, ukatsti kawkïr jaqitix Tatitur ñanqhachkatayna uka jaqirux campamentot anqäxar irpsusaw qalamp k'upjas jiwayapxäna. Kunjämtix Tatitux Moisesar siskatayna ukhamarjamaw israelitanakax phuqhapxäna.

← Chapter 23 Chapter 25 →