Leviticus 21

aymara-1997

1Tatitux Moisesar akham sänwa: “Aaronan yuqanakapa sacerdotenakampi parlam, jupanakarusti sarakim, jan q'añuchasipxpati mayni wila masin amayap llamkt'asa,

2jak'a wila masi jiwïpanak llamkt'aspaxa, taykapäspa, awkipäspa, yuqall wawapäspa, jan ukax imill wawapäspa, jilapäspa,

3jan ukax jupa jak'ankir jan chachani kullakapäspa; ukanak laykukiw q'añuchasispaxa.

4Ukampis chachanïki uka kullakapan amayaparusti, janipuniw llamkt'añapäkiti.

5“Janipuniw ñik'utanakapsa, sunkhanakapsa mururasipxañapäkiti, janirakiw janchinakapsa chhuxrinuqasipxañapäkiti,

6jan ukasti, Tatit Diosaparuw katuyasipxañapa, jupan sutip janirakiw ñanqhachapxañapäkiti, jupanakaw taqi nakt'at waxt'anaksa, Tatitun t'ant'apsa luqtapxi; ukhamasti jupanakax Tatitutak yaqhachatapuniw sarnaqapxañapa.

7“Sacerdotenakax Tatit Diosatak yaqhachatäpxatap laykux janiw chachanakampi sarnaqir warminakampisa, jaljtat warminakampis jaqichasipxañapäkiti.

8Jupanakarusti yaqhachatpun utjayam, jupanakax Tatitun t'ant'ap luqtirinakäpxiwa. Juma nayraqatansti q'uma jaqinakäpxañapawa; naya Tatitun qullanätax layku, nayarakiw jumanakarux qullana tukuyapxsma.

9“Mä sacerdoten phuchhapatix jan wal sarnaqani, ukatsti chachanakampi sarnaqir warmirak tukxani ukasti, pachpa awkiparuw ñanqhachaski, uka warmix jakkirpach nakhantayatäñapawa.

10“Sacerdotenakan jilïripasti, taqi sacerdotenakat sipansa wali askipuniwa, kunapachatix nayar luqtañatak yaqhachatäkän ukkhaxa, sacerdoten isip katuqäna, p'iqipxarus luqtañ aceitempi warxatatarakïnwa. Ukatpï uka sacerdotex janipun ñik'utap t'isatatatax sarnaqañapäkitixa, isipsa janirakiw mä llakisiñ uñacht'ayañ laykux ch'iyanuqasiñapäkitixa;

11kawkhantix mä amayax kallnuqatäski ukarux janiw mantañapäkiti, uka amayax awkipana jan ukax taykapan amayapäskpasa; janipuniw ukanakampix q'añuchasiñapäkiti.

12Tatitun qullan utapatsti janipuniw mistuñapäkiti, janirakiw uka qullan utsa jisk'achayañapäkiti, jupxar luqtañ aceitempi warxatatätap layku. Nayätwa Tatituxa.

13“Warmipäñapatakisti uka sacerdotex chacha jan uñt'ir mä q'uma tawaqu thaqhasiñapawa.

14Janipuniw mä ijma warmimpisa, jaljtat warmimpisa, munkay jan munkay warmisit warmimpisa, chachanakampi sarnaqir warmimpis jaqichasiñapäkiti; warmipasti chacha jan uñt'iri warmïñapawa, ukhamarus jupan wila masipatäñaparakiwa,

15ukhamat taqi jaqinakap taypin wawanakapax jan jisk'achatäñapataki; naya Tatituw juparux nayatak yaqhachasta uka layku.”

16Tatitux Moisesaruw akham sarakïna:

17“Aaronarusti akham sarakim: Akat uksarusti, kawkïr wawanakamatix janchipan jan k'umaräpkani ukanakax janipuniw t'ant'a waxt'anak Diosar luqtapkaniti.

18Jan ukax qhana arunxa, juykhünisa, kayu wixchünisa, nasapas wist'üni, jinchupas ch'ulla ch'ulläni,

19charanakapasa, amparapas p'akitäni,

20atipas k'umüni, jisk'a tansa jaqïnisa, nayrapas quyrüni, sarna usunïnisa, janchipas phallaraskani, jan ukax q'urutapas usuchjatäni ukanakax janipuniw waxt'anak Diosar luqtapkaspati.

21Aaronan yuqanakapatsti khitinakatix jan k'umaräpki ukanakax janipuniw waxt'anak Diosar luqtapkaniti; jupanakax janiw k'umaräpkiti, ukat jupanakax Tatit Diosarux waxt'anak jan luqtapkaspati.

22Ukampisa janchipan jan k'umaräpxatapatxa, kuna suma waxt'anaktix israelitanakax apanipkani ukanakat manq'asipkaspawa,

23ukampis janipuniw velo qhipäxarux mantkaniti, altararus jak'achaskarakiniti, ukhamat jan k'umarätapampix uka qullan uta jan q'añuchaskañapataki. Naya Tatituw uka qullan uta nayatak yaqhachasta.”

24Moisesasti taqi aka arunakxa Aaronaru, yuqanakaparu, uka kipkaraki taqi israelita jaqinakaruw yatiyäna.

← Chapter 20 Chapter 22 →