Leviticus 16

aymara-1997

1Tatitux Moisesampiw parläna Aaronan yuqanakapan jiwarxatap qhipata, jupanakasti Tatitun nayraqatapar sinti jak'achasipxatap laykuw jiwarapxäna.

2Ukat Tatitux Moisesar säna: Aarón jilamarux akham sas yatiyam, jan kuna pachas mantkpati kawkïr qullan chiqatix velo qhipäxan utjki uka chiqaruxa, janirak arcar qhupxatatäki uka nayraqatarus mantkpati, ukhamat jan jiwañapataki; nayasti mä qinay taypin uka juchat pampachayasiñäki uka qhuphiñ patxan uñstarakï.

3Aaronasti uka qullan chiqarux mä urqu vaca irpt'ataw mantañapa, ukasti jucha luratat wilañcha luqtañatakiwa, ukhamarak mä urqu ovejampi, ukasti taqpach nakt'ayas luqtañatakirakiwa.

4Kunatix sacerdoten isipäki uka isimpi isthapitaw mantani, linot lurat calzoncilloni, wak'amp chint'ata, linot lurat mä ch'uqañampi p'iqipar ch'uqt'ataraki. Aka isisti qullan isiwa, uka isimpi janïra isthapiskasax umampiw sum jariqasini.

5“Israelita jaqinakatsti, Aaronax pä cabritompi mä urqu ovejampi apani, uka cabritonakxa jucha luratat wilañcha luqtani, urqu ovejsti taqpach nakt'ayasaw luqtarakini.

6Jupan kipka juchapat uka urqu vaca wilañchat luqtani, ukhamat jupan juchapasa, wila masipan juchanakapas pampachatäñapataki.

7Uka qhipatsti uka pä urqu cabrito Tatitur katuyxani Tatitump Jikisiñ Carpa nayraqatana;

8ukxarusti uka pä cabritotxa, kawkïris Tatitutakïni, kawkïris Azazelatakïni uk yatxatarakini.

9Kawkïri cabritotix Tatitutaki satäkani uksti Aaronax jucha luratat wilañcha luqtxani,

10ukampis kawkïri cabritotix Azazelatakïkani uksti, jakkirpach juchat pampachatäñataki Tatitun nayraqatapar uñstayani, ukatsti uka cabritorux wasararuw Azazelatak antutnukxani.

11“Uka qhipatsti Aaronax jucha luratat uka urqu vaca wilañcha luqtxani, jupan pachpa juchapata, wila masipan juchanakapan pampachatäñapataki.

12Ukxarusti altarxan Tatit nayraqatan jikxataski uka sank'anakampi phuqxatat incienso q'aphichañ aptani, ukhamarak pä jach'i k'iyat suma q'apkir inciensompi, uksti velo qhipäxaruw apani,

13uka inciensompisti, Tatit nayraqatan uka ninxaruw jach'xatani, uka incienson jiwq'ipasti Tatitumpi amtäwi arcapar qhupxatatäki ukaruw chhaqtayani. Ukhamat Aaronax jan jiwkaniti.

14Ukatsti, Aaronax uka urqu vacan wilapar luk'anap juricht'asaw arcan qhuphiñapan maysäx thiyat ch'allt'ani. Ukxarusti paqallqu kutirakiw uka arcan qhuphiñap nayräxar ch'allt'ani,

15uka qhipatsti jaqinakan juchanakapat mä wilañchäkaspas ukham luqtañatakiw cabritorux jiwayxani, wilapsti velo qhipäxaruw apxani; uka manqhan arcan qhuphiñaparux kunjämtix vacan wilapampix ch'allt'käna ukham ch'allt'arakini.

16Ukhamat uka qullan chiqa taqi uka q'añunakat q'umachxani, israelitanakan Diosar saykatatapata, ukhamarak taqi jucha luratanakapatsa. Uka kipkarakiw Tatitump Jikisiñ Carpampis lurasiñapa, kawkïritix jupanak taypinkki, ukhamarak q'añu luratanakap taypinkki uka.

17“Janipuniw khitis Tatitump Jikisiñ Utäkis uka jak'ankañapäkiti, Aaronan uka qullan chiqan jikxataskani taqinitak juchat pampachatäñ jikxatañapkama. Juchanakat pampachatäñ jikxatxani ukkhasti,

18kawkïri altaratix Tatitun nayraqatapankki ukar q'umachañatakiw mistunini. Uka vacan wilapata, cabriton wilapat mä juk'a aptani, uka wilampix altaran waxranakaparuw jawikipani,

19luk'anapampisti paqallqu kutiw altarar ch'allt'arakini. Ukhamat israelitanakan q'añu luratanakapax q'umachatäxani, ukatsti Tatituruw katuyxarakini.

20“Kunapachatix Aaronax uka qullan chiqa, Tatitump Jikisiñ Carpa, ukhamarak altarsa q'umachxani ukkhasti, jakaski uka cabritoruw aptayanini,

21uka cabriton p'iqipxar amparap luqxatasasti, israelita jaqinakan ñanqha juchanak luratanakap arsuni. Ukhamat uka cabriton p'iqipxaru taqi juchanak apxatxani, ukatsti khititix uk apañatak ajllitäki ukaw uka cabrito irpasin wasarar antutnukunxani.

22Uka cabritosti, taqi jaqinakan juchanakap q'ipt'ataw wasara uraqinak tuqir sarawayxani.

23Ukxarusti Aaronax Tatitump Jikisiñ Carparuw mantxani, kawkïri lino isimpitix qullan chiqar mantañatak isthapiskäna ukanak isirasiri, uka isinaksti uka chiqaruw jaytawayxarakini.

24Ukatsti qullan chiqan umampi jariqasxani, isthapisitatsti, jupa kipkat wilañcha luqtiri, taqi jaqinakatak luqtiriw mistunxani, ukampiw jupan juchanakapata, jaqinakan juchanakapatsa pampachasïwi jikxatani.

25Kawkïr uywatix jucha luratat wilañcha luqtatäkän ukan lik'inakapsti altarxaruw nakt'ayxani;

26ukxarusti, khititix Azazelataki uka cabrito wasarar apkäna ukasti, isip t'axsuqasxani, jupa kipkas umampix jariqasxarakiniwa, ukat campamentor mantanxani.

27“Jucha luratat wilañcha luqtatäkän uka urqu vacampi, cabritompi, ukanakan wilapas qullan chiqar juchanakat pampachasïwi jikxatañatak apatäkän ukanakax, campamentot anqäxar apatäxañapawa, lip'ichipasa, aychapasa, thaxanakapas taqpach nakhantayatäxaniwa.

28Khititix taqi ukanak nakhantaykani ukasti, isinakap t'axsuqasxañapawa, jupa kipkas umampix jariqasxañapawa, uka qhipat campamentor mantanxarakini.

29“Aka kamachinakasti jumanakatakix wiñayatakïniwa: paqallqüri phaxsina tunka uru saraqatarusti jumanakax ayunapxätawa, uka urusti janiw kunsa lurapxätati, taqi israelita jaqinaka, jaya markat jutasin jumanak taypin jakir jaqinakasa,

30ukürurakiw jumanakax Tatitun nayraqatapan juchanakamat pampachatäñ jikxatapxäta, taqi jucha luratanakamatsa q'umachataw uñjasxapxarakïta.

31Aka kamachisti wiñayatakiwa: uka urusti jumanakatakix samaraña mä jach'a urüniwa, Tatitutak yaqhachata ayuno lurañ ururakïniwa.

32Kawkïri sacerdotetix ajllitäkani jupaw kuna luqtañanakatix juchat pampachatäñatak wakiski ukanak luqtani; jupasti linot lurat sacerdote isimpiw isthapisini,

33juparakiw uka qullan chiqa, Tatitump Jikisiñäkis uka Carpampi, altarampi q'umachani, ukatsti sacerdotenakataki, taqi jaqinakatakis juchat pampachatäñ jikxatani.

34“Aka kamachisti jumanakatakix wiñayatakïniwa: maran mä kutiw akanak lurapxäta, kuna juchanaktix israelitanakax lurapkani ukanakat pampachatäñ jikxatapxañamataki.” Taqi ukanakasti, kunjämtix Tatitux Moisesar siskäna ukhamarjamapuniw phuqhasïni.

← Chapter 15 Chapter 17 →