Judges 18

aymara-1997

1Khä urunakansti Israel markan janïraw reyix utjkänti. Dan ayllunkirinakax janirakiw uraqinïpkarakïnsa, ukhamasti jupanakax utjasiñatak uraq thaqhasaw sarnaqasipkäna.

2Ukat Dan ayllunkirinakax Sorá, Estaol chiqanakat phisqa jan axsarir jaqinak uraq uñaqanipxañapatak khithapxäna. Uka phisqa uñaqanakax Efraín qullunakaruw sarapxäna, ukatsti Micaías chachan utaparuw puripxäna, ukan uka arumax qurpachasipxäna.

3Micaías chachan utapankasinsti, levita waynarux parlasitapat yaqha chiqankirïtap amuyapxäna, ukat jupar jiskt'apxäna: —¿Khitirak akar irpantamsti? ¿Kunatarak akanktasti? ¿Kunatakirak akar juttasti? —sasa.

4Uka levita waynasti kunjämtix Micaías chachampi jupampi mä amtäwi lurkatayna, ukatsti kunjämtix jupan sacerdotëñapatak mink'katayna ukanak yatiyäna.

5Ukat jupanakax sapxäna: —Ukhamax Tatituruy jiskt'arapipxita, nanakan jutataxax walikïskaniti, janicha, uk yatiñataki —sasa.

6Levita sacerdotex sänwa: —Jan axsaras sarasipkakim, kawkharutix jumanakax sarapkäta ukkhanxa, Tatituw imasipkätam —sasa.

7Uka chiqawjatsti, uka phisqa uñaqanakax Lais markaruw sarxapxäna. Uka markan jakir jaqinakax Sidón markankirïpxänwa, jupanakasti kusisitakiw sumankañan jakasipxäna; janiw khitis kunsa kamskänti, janirakiw kunas jupanakar pist'känti. Sidón markapat jayan jakapxäna, janiw khitimpis parlapkänti.

8Ukhamasti uka phisqa uñaqanakax Sorá, Estaol chiqaruw kutt'xapxäna, kawkhankkäntix masinakapax ukawjaru, jupanakasti jiskt'apxänwa: —¿Kunjämakis sarnaqanipxta? —sasa. Jupanakasti sapxänwa:

9—Nanakax taqi uka chiqa uñjanipxta, uraqisti wali sumawa. ¡Sarantapxañäni! ¡Jupanakar katuntir sarapxañäni! ¡Janiy ukhamak qunurapxamti! ¡Wakisiw uka uraqinak katuntir sarañasaxa!

10Ukawjar purisinsti jaqirux wali kusisita, jach'a uraqinakani jikxatapxäta, jupanakarux janiw kunas pist'kiti. Diosaw uka uraqinak churapxätam —sasa.

11Ukatsti Sorá, Estaol chiqanakat Dan ayllunkiri jaqinakax suxta patakaniw nuwasiñatak wali wakicht'ata mistuwayapxäna,

12ukatsti Judá chiqar purisin ukawjan utjnuqtapxäna, Quiriat-jearim chiqat inti jalanta tuqina, kawki chiqatix jichhax Dan chachan campamentopa satäki uka chiqana.

13Ukawjatsti Efraín qullunakaruw sarapxäna, ukatsti Micaías chachan utaparuw puripxäna.

14Ukhamasti Lais uraqi uñaqiri sarapki uka phisqa chachanakax, masinakaparuw sapxäna: —¿Yatipxtati? Aka utanxa efod sat isimpi, wila masinakan diosanakapampiw utji, qullqimpi jawikipat suma lurat idolow utji. ¿Kun lurañsa amuyapxtaxa? —sasa.

15Ukhamasti uka uñaqanakax mayninakat jithiqtawayasin levita waynan utaparuw sarapxäna, uka utasti Micaías chachan utapänwa.

16Ukchañkamasti, suxta patak danita soldadonakax wali wakicht'ataw punkut suyt'apxäna.

17Uka phisqa uñaqanakax nayraqat utar mantasin, suma lurata qullqimpi jawikipat ídolo, ukhamaraki efod isimpi, wila masinakan diosanakapampi apsupxäna, ukchañkamasti sacerdotex uta punkun suxta patak soldadonakampïskänwa.

18Sacerdotex uka phisqa uñaqanakar Micaías chachan utapar mantiri, idolompi, efod isimpi, wila masinakan diosanakap apsunir uñjasasti, sänwa: —¿Kunarak lurasipktasti?

19Jupanakasti sapxänwa: —¡Amukïma, nanakamp chika jutam! Jumax nanakan amuyt'ayirixa, nanakan sacerdotexäyätawa. ¿Janit jumatak walïkaspasti israelankir mä aylluna sacerdotepäñamaxa, mä sapa jaqin wila masipan sacerdotepäñat sipansa? —sasa.

20Uk ist'asinsti sacerdotex chuymapan wal kusisïna, ukatsti efod isimpi, qullqimpi jawikipat idolompi, wila masinakan diosanakapampi apxaruwayasin, danita jaqinakamp chikaw sarxäna,

21jupanakasti, wawanakas irpt'asita, uywanakas ant'asita, taqi yänakapas apt'asitaw sarantawayxapxäna.

22Niya wali jaya sarxapxäna ukkhaw, Micaías chachax masinakapamp tantacht'asisin arktañatak mistuwayapxäna.

23Arktanirinakan arnaqasitanakap ist'asasti, danita jaqinakax kutikipstanisin Micaías chacharuw jiskt'apxäna: —¿Kunas kamachtam? ¿Kunatsa ukataq arnaqanipxista? —sasa.

24Micaías chachasti sänwa: —Jumanakax nayan lurata diosanakax apasipxtaxa, sacerdotexarus irpasxapxaraktawa, nayarux jan kunan jaytaniwayapxista, ukham lurkasasa nayar jiskhisipkakistawa “¿kunas kamachtam?” —sasa.

25Ukampis danita jaqinakax sapxänwa: —Jan ukham jach'at parlapxistati, ukatarak nanakat maynisa chuyma mayjt'ayasisin katuntapxiristam, ukatsti, jumasa wila masinakamas jiwarapxasmawa —sasa.

26Micaías chachasti jupanakar waljanïtap uñjasax, utaparuw kuttxäna; ukampis danita jaqinakax thakhip sarantasipkakïnwa

27Micaías chachax lurkatayna uka yänak apt'ata, ukhamaraki sacerdoteparu irpasa, ukatsti Lais chiqaruw puripxäna. Ukansti jaqinakax wali kusisitakiw jakasipkäna, ukhamaruw danita jaqinakax taqi ukankirinakar espadampkama jiwarayapxäna, marksa ninampiw phichhantapxäna.

28Uka markax Sidón markat jayankänwa, janirakiw khitimpis parlkänti, ukat jupanakarux khiti arxatiris jan utjkänti, uka markax Bet-rehob qhirwan jikxatasïna. Uka qhipatsti danita jaqinakax uka marka askichasin sayt'ayapxäna, ukat ukan jakxapxarakïna.

29Uka markan sutipax Lais satäkchïna ukasa, jupanakax Dan sasaw sutichapxäna nayra awkipan sutip amtasina, uka awkipasti Israelan wawapänwa.

30Danita jaqinakax uka chiqaruw Micaías chachan lurata idolopa uchapxäna, ukaru yupaychañataki, sacerdotepasti Jonatán chachänwa, jupasti Guersón chachan yuqapänwa, Moisesan allchhiparakïnwa. Uka qhipatsti danita jaqinakan sacerdotenakapax Jonatanan wawanakapänwa, jayaru apanukuta uñjasipkän uka urunakkama.

31Micaías chachan lurata idolox ukawjan jupanak taypinkäna, Tatitun qullan utapax Siló chiqankkän uka urunakana.

← Chapter 17 Chapter 19 →