Joshua 8

aymara-1997

1Tatitux Josué chacharux sänwa: “Jan axsaramti janirak mayjt'asimsa. Taqpach ejercitomampi Ai markar nuwantir sarxarum, nayaw Ai markan reyiparu, jaqinakaparus atipt'ayäma. Markapasa, uraqinakapas jumankaniwa,

2jumasti kunjämtix Jericó markarusa, reyiparusa lurkta, ukhamarak Ai markampiru, reyipampiru luräta, ukampis jichha kutix jumanakaw taqi yänakapsa, uywanakapsa jumanakataki apasinipxäta. Jichhasti Ai markar qhipäx tuqit akatjamat tukjañatak wakicham” sasa.

3Josué chachasti taqpach soldadonakapampiw Ai markar sarañatak wakicht'asïna. Kimsa tunk waranqa nuwasir jaqinak ajllïna, jupanakarusti arumaw khithäna, akham iwxt'asa:

4“Sum ist'apxam: marka qhipäx tuqir sarapxam, ukatsti uka jak'an imantasipxäta, katuntañatakisti jank'akïpxätawa.

5Nayasti chikat jaqinakampiw markar jak'achasinï, ukatsti kunapachatix markankir jaqinakax nanakampi nuwasir mistunipkani ukkhaxa, nanakax nayrïr kutinjam jupanakatakix jaltxapxä.

6Jupanakax nanakar markat jaltir uñjasax arktapxitaniwa, wasitat jaltayapkitaspa ukham amuyasina.

7Ukapachaw jumanakax imantasipkta ukawjat mistunisin marka katuntapxäta, Tatit Diosamaw amparanakamar uka marka katuyapxätam.

8Marka katuntasinsti, ninampiw phichhantapxäta, kunjämtix Tatitux siskän ukhamarjama. Aka arunakax phuqhañatakiwa” sasa.

9Ukatsti Josué chachax sarapxam sasaw ejercitopar khithanuküna, jupanakasti sarasax Betel, Ai markanak taypiruw, inti jalanta tuqir imantasipxäna, ukchañkamasti Josué chachax campamenton uka arumax qhiparäna.

10Qhipürusti, Josué chachax willjtat sartasisax jaqinakaparuw tumpthapïna. Ukatsti Israel markan jilïrinakapampi chikaw ejercitop nayraqata sarantäna, Ai markar katuntañataki.

11Josué chachan soldadonakapax nayräx tuqit markarux jak'achasïna, ukatsti marka nayräxaruw utjnuqtapxarakïna, campamentompiru Ai markampirux mä qhirwaw jaljäna.

12Josué chachax niya phisqa waranqa jaqinak imantäna Betel, Ai taypiru, markat inti jalanta tuqiru,

13ukhamat mä tama soldadonakax markat alay tuqin imantasïna, mä tamasti markat inti jalanta tuqin imantasirakïna. Josué chachasti uka arumax chika qhirwakamaw nayrst'äna.

14Ai markan reyipasti uk uñjasin, jank'akiw taqpach ejercitopampi mistüna, israelitanakampi Jordán qhirwan nuwasiñataki, mayni israelitanakan marka qhipäxan imantasitäskatap jan yatisa.

15Josué chachampi jaqinakapampisti atipjata uñjasipkaspas ukhamaw wasar tuqir sarki uka thakhinjam jaltxapxäna.

16Ukatsti Ai markan ejercitopax jupanakar arktañatakiw mistuwayapxäna, Josué chachar arktasasti Ai markat jayarst'apxänwa.

17Janiw mä jaqis Ai, Betel markanakan qhiparkänti, taqinipuniw israelitanakar arktañatakix mistupxäna; ukatsti markaparux jan arxatirini apanukuwayapxäna.

18Ukatsti Tatitux Josué chachar sänwa: “Ai marka tuqir lanzam aytam, nayaw amparamar katuyäma” sasa. Josué chachasti amparap aytasin marka tuqiruw lanzap uñtayäna.

19Ukatsti imantasitäpkän uka tamanakax jank'akiw mistunipxäna, ukatsti markar jalakamakiw mantantapxäna, katuntasinsti ninampirakiw phichhantapxäna.

20Kunapachatix Ai markankir jaqinakax qhipa tuqir uñtanipkän ukkhasti, markapax nina nakhaskiri jiwq'isti chika alaxpachkam makhataskir uñjapxäna, janirakiw jupanakax kawksarus jaltirjamäpkänti, kawkïr israelitanakatix wasar tuqir jaltapkäna ukanakax kuttanisin jupanakaruw kutxatapxäna.

21Josué chachampi, taqpach israelitanakampisti, nuwantañatak imantasipkatayna uka chachanakan marka katuntatap uñjasa, ukhamarak ninampi phichkatapxatap uñjasinxa, kuttanisin Ai markarux nuwantapxarakïna.

22Ukatsti, khitinakatix markar katuntapkän ukanakax mistunxapxänwa, Ai markankirinakasti Israelan paypach tamap taypin katuntat uñjasipxäna, uka tamanakax taqiniruw jan maynin katurasin jiwarayäna.

23Ai markan reyiparukiw jan jiwayapkänti, juparusti katuntasin Josué chachan ukaruw irpapxäna.

24Ukxarusti kawkïri jaqinakatix jupanakar qhipat arkanipkatayna ukanakarux taqiniruw espadampkam jiwarayapxäna, israelitanakax Ai markaruw kutintanipxäna kawkïrinakatix markar qhiparapkatayna ukanakar jiwarayañataki.

25Uka urusti Ai markankirinakax tunka payan waranqaniw jiwarapxäna, chachanaka, warminaka,

26Josué chachasti Ai markar q'al tukjañ amtäwipampix phuqhänwa.

27Israelitanakax Ai markan utjir uywanakampi, ukhamarak kunatix utjkän uka yänakampi katuntasipxäna, kunjämtix Tatitux Josué chachar siskatayna ukarjama,

28ukatsti Josué chachax ninampiw Ai marka phhichhantäna, jan mayampitakiw tukjarakïna, kunjämtix jichhürkam uñjasiski ukhama.

29Josué chachax Ai markan reyiparux mä quqaruw warkkatayäna, ukasti jayp'ukamaw ukankaskäna, kunapachatix intix jalantkän ukkhaw amayap apaqirix khithäna, ukatsti marka mantañawjaruw amayap jaqtayäna, qalanakampirakiw phinxatayäna. Uka qala phinax jichhürkamaw ukankaski.

30Ukatsti Josué chachax mä altar Israelan Tatitu Diosapatakix Ebal qullun luräna,

31kunjämatix Tatitun luqtiripa Moisesax israelitanakar siskatayna, ukhamarak kunjämatix Moisesan qillqatapansa qillqatäki ukhamarjama: “Maypach qalanakat mä altar luräta” sasa. Ukatsti israelitanakax uka altar patxaruw nakt'at waxt'äwinaka, sumankthapiñ wilañchanak luqtapxäna.

32Ukxarusti Josué chachax israelitanakan uñjkataw altaran qalanakapar Moisesan churat kamachinakap qillqt'äna.

33Ukatsti taqpach markampi, ukhamarak Israelat saraqir jaqinakasa, yaqha markankirinakasa, chuyman jaqinakasa, jilïr irpirinakasa, taripirinakasa Tatitun arust'äwi arcap thiyaru sayt'asipxäna, kawkïrtix levita sacerdotenakax kallachinakapxar apasipkän uka uñkatasiru. Tatitun aski waxt'äwip katuqañatakisti chikat jaqix Guerizim sat qullu tuqinkänwa, chikatasti Ebal sat qullu tuqin jikxatasipxäna, kunjämatix Tatitun luqtiripa Moisesax qalltatpacha sawaykatayna ukarjama.

34Ukatsti Josué chachax Tatitun kamachinakapat ullaräna, aski arunaka, ukhamarak ñanqhachäwi arunaka.

35Josué chachax Israel marka nayraqatan kawkïr arunaktix Moisesax jaytawaykatayna uka arunak taqpach ullart'äna, jupanak taypinsti warminaka, wawanaka, jayat jutir jaqinakaw ukankapxäna.

← Chapter 7 Chapter 9 →