Joshua 5

aymara-1997

1Jordán jawirat inti jalanta tuqinkiri amorreo reyinakasa, Mediterráneo jach'a quta jak'ankir cananeo reyinakasa, kunjämtix Tatitux Jordán jawir wañt'ayas israelitanakar makhataykatayna uk yatipxäna, uk yatisasti, uka reyinakax wal axsarayasipxäna, ukatsti jupanakampi nuwasiñxa wal axsarapxäna.

2Ukapachaw Tatitux Josué chachar säna: “Jumax qalat cuchillonak lurasim, ukatsti wasitat israelitanakar circuncisión katuqayam” sasa.

3Josué chachasti cuchillonak luräna, ukatsti Aralot qullun israelit chachanakarux circuncisión katuqayäna.

4Uka lurañasti wakisïnwa, kawkïr chachanakatix Egipto markat janïr mistkasin circuncisión katuqapkatayna uka chachanakax, thakhin jutkasin wasaran jiwarxapxatayna uka layku.

5Egipto markat mistunipkatayna uka chachanakasa, waynanakasa taqiniw circuncisión katuqxapxatayna, ukampisa khitinakatix wasaran yuripkän ukanakax janiw circuncisión katuqatäpkänti.

6Israelitanakax pusi tunka mara wasaran sarnaqañkamax Egipto markat mistunkän uka nuwasir chachanakax taqiniw jiwarxapxatayna. Uka chachanakax janiw Tatiturux jaysapkänti, ukat Tatitux jupanakar kawkïr uraqtix nayra awkinakapar churapxämaw siskatayna uka uraqi jan uñjaykänti, lechesa misk'isa umjama jalaski uka uraqi.

7Ukat Josué chachax uka jaqinakan wawanakaparux circuncisión katuqayäna, jupanakax saräwinkasipkatap laykuw circuncisión jan katuqapkataynati.

8Kunapachatix taqini circuncisión katuqatäxapxän ukkhaxa, jupanakax campamentonaki qamarapxäna, ukhamata circuncisión katuqirinakax k'umarachasiñapkama.

9Ukatsti Tatitux Josué chacharux sänwa: “Aka circuncisión lurañampix jumanakat Egipto markan p'inqachat uywatar tukupxatamat apaqapxsma” sasa. Ukat uka chiqax jichhürkam Guilgal sutimpi uñt'ata.

10Israelitanakax Guilgal chiqaruw utjnuqtapxäna, ukatsti phaxsit tunka pusin uru saraqataruw jupanakax Jericó pampanakan Pascua uruyapxäna.

11Uka urusti jupanakax jan levaduran t'ant'ampi, trigo jamp'itampi manq'apxäna, ukampis qhipürux kuntix uraqin achkäna ukanak manq'xapxäna.

12Ukat uksarusti Diosax janiw mayampsa maná manq'xa apayankxänti, ukhamasti israelitanakax kunatix Canaán uraqin achkäna ukaki uka marax manq'asipxäna.

13Mä urusti, Josué chachax Jericó marka jak'ankasin, jupan nayräxapan mä chacharuw uñjäna, amparapar espadas apt'ata. Josué chachasti jupar jak'achasisin akham jiskt'äna: —¿Jumax nanakankirïtati, jan ukax uñisirinakaxankirïtacha? —sasa.

14Uka chachasti sänwa: —Janiw kawkirïktsa. Nayax Tatitun ejercitopan jilïripätwa, ukat jutta —sasa. Ukat Josué chachax p'iqip uraqir puriyañkam alt'äna, juparusti jiskt'arakïnwa: —¿Kamsis Tatituxax naya luqtiripatakixa? —sasa.

15Tatitun ejercitopan jilïripasti sänwa: —Wiskhum apsusim, kawkha chiqarutix takt'kta uka chiqax qullanawa —sasa. Josué chachasti jaysänwa.

← Chapter 4 Chapter 6 →