Joshua 24

aymara-1997

1Josué chachax Siquem chiqan Israelan taqi ayllunakaparu tantacht'äna. Jupasti chuyman jaqinakaru, jilïrinakaru, taripirinakaru, jilïr irpirinakaruw jawsäna, ukatsti Tatit nayraqatan

2taqpach Israel markaruw säna: —Israelan Tatitu Diosapax akham siwa: ‘Nayrapachax, jumanakan nayra awkinakama Térah chachax, Abraham, Nacor wawanakapampix Éufrates jawir thiyanakan jakapxäna, jupanakasti yaqha diosanakaruw yupaychapxäna.

3Nayaw Abrahamarux Éufrates jawir thiyanakat irpsunta, ukatsti Canaán uraqinak chiqa juparux irpanta. Juparusti mä yuqall wawa apayanta, Isaac sutinïnwa, uka yuqall wawat waljaniptayta,

4Isaacarusti pani wawanak churta, Jacob, Esaú sutini. Esaú wawaparusti Seír qullu uraqinak churta, ukampis Jacobumpi wawanakapampix Egipto markaruw sarxapxäna.

5Ukatsti nayax Moisesampiru, Aaronampiruw khitta, egipcionakarusti jan walt'añampiw mutuyta, jumanakar uka uraqit irpsuniñkama.

6Kunapachatix jumanakan nayra awkinakamax Egipto markat mistunipkän ukkhaxa, egipcio jaqinakax nuwasiñ carronakata, caballonakat Mar Rojo qutakam arktanipxäna.

7Jupanakasti nayaruw art'asinipxitu, ukatsti nayaw jupanakampi, egipcio jaqinakampi taypirux ch'amakt'ayta, ukatsti uka quta umampi antutxatasaw jupanakxarux chhaqtayta. Jumanakax kuntix Egipto markan nayax lurkta ukanak sum yatipxtaxa. “ ‘Ukatsti jumanakax walja maranakaw wasaran sarnaqapxtaxa,

8nayarakiw amorreonakan uraqiparux irpanipxsma, Jordán jawirat inti jalsu tuqiru. Jupanakax jumanakampiw nuwasipxäna, ukampis nayaw ch'ama churapxsma jumanakan atipjapxañamataki, ukat jumanakax uraqinakap katuntasipxtaxa.

9Ukatsti Sipor chachan Balac yuqapa, moabitanakan reyipaw jumanakampi nuwasir jutäna. Balac reyix, Beor chachan Balaam yuqaparuw jawsayanïna, jumanakar ñanqhachañapataki.

10Ukampis nayax janiw Balaam chachampi jumanakar ñanqhachayapksmati, ukat sipana, jumanakarux jach'añchapxtamwa. Ukhamat nayax jumanakar qhispiyapxsma.

11Ukatsti jumanakax Jordán jawir makhatasin Jericó markakam purinipxtaxa. Jericó marka jakapkän uka amorreonaka, ferezeonaka, cananeonaka, hititanaka, gergeseonaka, heveonaka, jebuseo jaqinakax, jumanakampiw nuwasipxäna, ukampis nayaw jumanakarux atipt'ayapxsma.

12Uka pani amorreo reyinakarux janiw jumanakax espadanakampi, arconakampi atipjapktati, jan ukasti nayaw chuymanakapar jumanak nayraqatan axsarañ uchta, ukat jupanakax jumanakas janïr puripkta ukkhax jaltxapxi.

13Nayaw jumanakarux jan yapuchapkta uka uraqinak churapxsma, janirak sayt'ayapkta uka markanaksa churapxsma. Jichhasti jumanakax ukan jakapxtaxa, ukatsti uvanaka, aceitunanaka manq'apxtaxa, kawkïrinaktix jan yapuchapkta ukanaka’ —sasa. Josué chachasti saskakïnwa:

14—Taqi uka luräwinakat Tatitur axsartapxam, ukatsti suma chuymampi, chiqa kankañampirak luqtapxam. Kawkïri yaqha diosanakarutix jumanakan nayra awkinakamax Éufrates jawir thiyanakansa, Egipto markansa yupaychapkän uka diosanak apanukupxam, ukatsti Tatitur luqtapxam.

15Ukampis janitix Tatitur yupaychañ munapksta ukaxa, jichhüruy ajllisipxam khitirutix yupaychañ munapkta ukaru: Éufrates jawir thiyanakan nayra awkinakamax yupaychapkäna uka diosanakaruti, jan ukax, aka uraqin jakir amorreo jaqinakan diosanakaparucha. Ukampis nayampi, wila masinakaxampix Tatituruw yupaychapxä —sasa.

16Ukatsti markax sänwa: —¡Tatitux jan munkpati, yaqha diosanakar luqtañ layku jiwasan juparu apanukuñasxa!

17Tatituw jiwasanakaru, nayra awkinakasarusa Egipto markat irpsunistu, kawkhantix t'aqhisiyata sarnaqkäyätan uka markata. Jupaw jiwasan uñjkata wali jach'a muspharkañanak luri, jupaw thakhinsa jiwasarux imistu arxatarakistu, kunapachatix walja markanak chiqa sarakipankäyätan ukapachaxa.

18Juparakiw thakhinjam jutkäyätan ukkhax, jiwasan nayraqatasat uka markanakar jaqunuküna, ukhamarak ukan jakir amorreo jaqinakarusa. Taqi uka luräwinakatsti, nanakax Tatituruw luqtapxarakï, jupakiw nanakan Diosasaxa —sasa.

19Ukampis Josué chachax jupanakarux sänwa: —Jumanakax janjaw Tatitur luqtapkasmati, jupax qullana jan kamskaya Diosawa, janiw jumanakan sayt'asitanakamsa, jucha luratanakamsa inak uñjkaniti.

20Jumanakatix Tatitut armasis yaqha diosanakar luqtapxät ukkhaxa, Tatitux jan walt'añanak apayanipxätam, jumanakar askinak lurkasin t'unjapxarakïtamwa —sasa.

21Israel markasti Josué chacharux sänwa: —Janiw ukax ukhamäkaniti. Nanakax Tatituruw luqtapxä —sasa.

22Josué chachasti sänwa: —Jumanak pachpaw qhanañchapxtaxa, Tatitur luqtañ ajllisipxatamxa —sasa. Jupanakasti sapxänwa: —Ukhamawa, nanak pachpaw qhanañchapxta —sasa.

23Josué chachasti jupanakarux saskakïnwa: —Ukhamasti jumanak taypin utjki uka yaqha diosanak apanukupxam, ukatsti taqi chuymampirak Israelan Tatitu Diosapar arkapxam —sasa.

24Israel markasti sänwa: —Nanakax Tatitu Diosaxarukiw luqtapxä, kuntix jupax sapkitani uk lurapxarakï —sasa.

25Uka pachpa uruw Josué chachax, Siquem chiqana, mä suma arust'äwi Israel markampi luräna, ukatsti kamachinakampi, arsutanakampi churäna,

26ukanaksti Tatitun kamachipa qillqata utjki ukaruw qillqantäna. Ukatsti mä jach'a qala aptasin encina quqa k'uchuruw uchäna, Tatitun qullan chiqawjap jak'ankän ukawjaru,

27ukatsti Israel markarux sarakïnwa: —Aka qalasti qhanañchirit uchatäniwa, aka qalaw taqi kuntix Tatitux siskistu uk ist'araki. Ukaw jumanakatak irkatirit sayt'ani, Tatitumar jan k'arintapxañamataki —sasa.

28Ukatsti Josué chachax sapaqat mayniruw uraqinakaparkam khithanukxäna.

29Ukanak qhipatsti, Nun chachan Josué yuqapax patak tunkani maranïkän ukkhaw jiwxäna.

30Juparusti Timnat-sérah chiqankir uraqiparuw imt'xapxäna, ukasti Efraín qullunakan jikxatasi, Gaas qullut amsta tuqina.

31Israelitanakax Josué chachan jakañapkama, ukhamarak jiwxäna una qhipatsa, Israelan Tatitu Diosaparupuniw jaysapxäna, kunanaktix Tatitux israelitanak layku lurkatayna ukanak yatir jilïr jaqinakan jakañapkama.

32Josean ch'akhanakapxa, kawkïrinaktix Israelitanakax Egipto markatpach apanipkatayna ukanaksti, Siquem markankir mä uraqiruw imantxapxäna. Uka uraqxa Jacob chachaw Hamor chachan wawanakapat patak qullqimpi alatayna, Siquem chachan awkipa, ukhamat uka uraqix José chachat saraqir wawanakapar wakt'arakïna.

33Kunapachatix Aarón chachan Eleazar yuqapax jiwxän ukkhaxa, juparux Finees wawapan jisk'a qulluparuw imantxapxäna, kawkïrtix Efraín qullunakan churatäkän ukaru.