Joshua 18

aymara-1997

1Israel markax taqiniw Siló chiqan tantachasipxäna, uka chiqan Tatitump Jikisiñ Carpa sayt'ayañataki, ukapachatakix uraqix niyaw katuntatäxäna,

2ukampis israelitanakat paqallqu ayllunakaruw uraqix janïr churatäkänti.

3Ukat Josué chachax israelitanakarux säna: “¿Kunapachkamarak jumanakasti suyapxäta, nayra awkinakaman Tatitu Diosapax churapktam uka uraq katuntasiñatakisti?

4Jichhax sapa ayllut kimsa chachanak ajllipxam, ukatsti nayaw jupanakar khithä taqi uka uraqinak uñjir sarapxañapataki, ukatsti kunjämas uka uraqinakax uk yatiyapxitani, ukhamat uka uraqinak lakinuqasipxañamataki.

5Uka chachanakasti uka uraqinak paqallquruw jaljapxani, Judá ayllun uraqipax aynach tuqir uñacht'ayatäniwa, Joseat saraqir wawanakaparusti uraqix amsta tuqir uñacht'ayatarakïniwa.

6Uka uraqinak paqallqu chiqar jaljasinsti, kunjämätaynas uk yatiyapxitani, ukatsti nayax Tatit nayraqatan lakinuqapxäma.

7Levitanakarux janiw kuna uraqis wakt'kaniti, jupanakarux Tatit nayraqatan sacerdote luräwinaka phuqhañaw wakt'i. Ukatsipana, Gad, Rubén ayllunkirinaka, ukhamarak Manasés ayllunkirinakan chikat jaqipax, Jordán jawirat inti jalsu tuqiruw uraqinak katuqxapxi, uka uraqinaksti Tatitun luqtiripa Moisesaw jupanakarux churxi” sasa.

8Kawkïr jaqinakatix uka uraqinak uñjanipxañapataki, ukatsti ukxat yatiyapxañapataki ajllitäkän ukanakax, jank'akiw sarxarupxäna, Josué chachasti jupanakarux sänwa: “Sarapxam, taqi uka uraqinak uñjanisin jalanuqanipxam, ukatsti tukt'ayasin mäkiw kuttanipxäta, nayan aka Siló chiqana, suertetkam Tatit nayraqatan wakt'ayañaxataki” sasa.

9Uka jaqinakasti sarasin taqi uka uraqinak uñatatanipxäna, markanakxa paqallq tamaruw jaljapxäna, taqi ukanaksti sum qillqt'anipxäna, ukatsti Siló campamentoruw kuttanxapxäna, Josué chachar yatiyañataki.

10Ukatsti Josué chachax, Siló chiqan israelitanakarux Tatit nayraqatan uka uraqinak lakinuqäna, suertetkam wakt'ayasa.

11Niyaki suerte jaqtatatsti, Benjamín ayllun wila masi tamanakapatakix, uraqinakax Judá, José ayllunakan uraqinakap taypiruw wakt'äna.

12Uka uraqin qurpapax amsta tuqit Jordán jawirat qalltäna, ukatsti Jericó marka amsta tuqi makhatäna, ukatsti inti jalanta tuqiruw saraskakïna qullu tuqinjama, Bet-avén sat wasarkama.

13Uka chiqatsti Betelat aynach tuqinkki uka qullukamaw purïna, ukatsti Atarot-adar aynachkamaw saraqäna, Bet-horón aynach tuqin qullunakäki ukkhakama.

14Ukxarusti qurpax aynach tuqiru Mediterráneo jach'a quta tuqiruw kuttäna, Bet-horón uñkatasinkki uka qullu aynach iram tuqi, ukat Quiriat-jearim chiqar puriñkama. Ukasti inti jalanta tuqin utjir qurpänwa.

15Aynacha tuqinkir qurpasti Quiriat-jearim thiyat qalltanïna, ukatsti inti jalanta tuqiruw saraskakïna Neftóah uma jalsur puriñkama,

16ukatsti qullu aynachkamaw saraqäna, Refaim qhirwat amsta tuqiru, kawkintix Ben-hinom qhirwax qalltki ukkhana. Ukatsti uka qhirwanjam saraqaskakïna, Jebús chiqat aynach tuqina, En-roguel sat uma jalsukama.

17Ukxarusti amsta tuqiruw kuttäna, En-semes chiqakama, ukawjatsti Guelilot chiqakamaw purïna, ukax Adumim amsta uñkatasinkiwa, uka chiqatsti Rubén chachan Bohan yuqapan qarqapkamaw saraqäna;

18ukatsti Jordán qhirwa uñkatasinkki uka qullunak chiqaw sarakipäna, uka chiqatsti, qhirwaruw saraqäna,

19Bet-hoglá amsta tuqinjam saräna, ukatsti kawki chiqarutix Jordán jawirax mistki ukawjaruw tukuyäna, Mar Muerto qutat amsta tuqiru. Ukaw aynach tuqit qurpänxa.

20Jordán jawiraw inti jalsu tuqit qurpänxa. Ukanakaw Benjamín aylluru churatäkän uka uraqinakan qurpanakapaxa.

21Kawkïr markanakatix Benjamín ayllunkir wila masi tamanakapar wakt'käna ukanakax akanakänwa: Jericó, Bet-hoglá, Émec-quesís,

22Bet-arabá, Semaraim, Betel,

23Avim, Pará, Ofrá,

24Quefar-haamoní, Ofní, Gueba uka markanaka, taqpachax tunka payan markanakänwa, jisk'a markanakapamppacha.

25Ukhamarusa yaqha markanakaw utjarakïna: Gabaón, Ramá, Beerot,

26Mispá, Quefirá, Mosá,

27Réquem, Irpeel, Taralá,

28Selá, Élef, Guibeá, Quiriat, Jebús marka, qhiparusti Jerusalén sutimpi uñt'ata. Taqpachax tunka pusin markanakänwa, jisk'a markanakapamppacha. Uka uraqinakaw Benjamín ayllunkir wila masi tamanakaparux wakt'äna.

← Chapter 17 Chapter 19 →