John 20

aymara-1997

1Domingo qhantatisti, Magdalankir Mariax wali willjta ch'amakäkipan sepultura uñjir saräna, ukatsti sepulturar atkatatäkän uka qala atiqat uñjäna.

2Ukham uñjasinsti, Simón Pedrompiru, Jesusan wali munat yatiqiripampir yatiyiriw jaläna, jupanakarusti sarakïnwa: —Tatitun amayap sepulturat apasxapxatayna, janiw kawkir apapxatapsa yatipkti —sasa.

3Ukatsti Pedrompi maynïr yatiqirimpix sepulturaruw jalapxäna.

4Panpachaniw jalapxäna; ukampis maynïr yatiqiriw Pedrot sipan juk'amp jaläna, ukatsti nayraqat sepulturar purïna.

5Ukatsti alt'asin sepultur uñantäna, ukansti ch'uqañ isinakak uñjäna, ukampis janiw mantkänti.

6Simón Pedrosti qhipapat purïna, ukatsti sepulturkamaw mantäna, jupasti ch'uqañ isinakakirak uñjäna;

7ukatsti Jesusan p'iqip ch'uqt'atäkän uka isix janiw ch'uqañanakamp chikäkänti, jan ukasti, yaqhawjan suk'thapit apnuqatänwa.

8Ukatsti nayraqat sepulturar purkatayna uka yatiqiriw mantäna, jupasti kunatix luraskatayna uk uñjäna, ukat iyawsäna.

9Jupanakax janïraw amuyt'apkataynati, kuntix Qillqatax siskäna uka: “Jiwatanak taypit jaktañapaw wakisi” sasa.

10Ukatsti uka yatiqirinakax utaparkamaw kutt'awayxapxäna.

11Mariax sepultura anqäxan jachaskäna. Ukham jachkasin sepultura manqha uñantañatak alt'äna,

12ukatsti janq'u isini pä angelaruw uñjäna, jupanakasti kawkharutix Jesusan jiwat janchip uchapkatayna ukawjan qunt'atäsipkänwa; maynix p'iqi tuqina, maynisti kayu tuqina.

13Angelanakasti juparuw jiskt'äna: —Warmi, ¿kunatarak jachasktasti? —sasa. Mariasti sänwa: —Tatituxan janchip apasxapxatayna, janiw kawkir uskupxatapsa yatkti —sasa.

14Uk arskipanxa, qhipäx uñakipasi, ukatsti Jesusaruw uñjäna, ukampis janiw Jesusätap amuykänti.

15Jesusasti juparuw jiskt'äna: —Warmi, ¿kunatarak jachasktasti? ¿Khitirurak thaqtasti? —sasa. Mariasti, uyu uñjirïkaspas ukham amuyäna, ukat jupar sarakïna: —Tata, jumatix apstaxa, kawkharus uskta uk yatiyita, ukat apasxañaxataki —sasa.

16Jesusasti juparux sänwa: —¡María! —sasa. Jupasti kutikipstasin hebreo arun säna: —¡Rabuni! —sasa. (Ukasti “Yatichiri” sañ muni.)

17Jesusasti juparux sänwa: —Jan katxäsistati, janïraw Awkixan ukar makhatkti. Ukampis jilanakaxar yatiyir saram, jupanakarusti sarakim: Nayax kawkinkkitix Awkixax ukaruw saraskta, jupasti jumanakan Awkimarakiwa, nayan Diosaxawa, jumanakan Diosamarakiwa —sasa.

18Ukatsti Magdalankir Mariax yatiqirinakar yatiyiriw saräna, jupan Tatitur uñjatapata, taqi akanak Tatitux siskatayna ukanak yatiyiri.

19Uka domingo arumasti, Jesusan yatiqirinakapax judionakar axsaratap laykuw uta punkunak jist'antasisin tantachasipxäna. Jesusasti ukaruw mantäna, jupanak taypin sayt'asin aruntäna, akham sasa: —¡Sumankañax jumanakampïpan! —sasa.

20Ukatsti, amparapampi, ch'illapamp uñacht'ayäna. Yatiqirinakasti Tatitur uñjasin wal kusisipxäna.

21Jesusasti wasitampiw jupanakar säna: —¡Sumankañax jumanakampïpan! Kunjämtix Awkix nayar khithankitu, ukhamarakiw jumanakar khithapxsma —sasa.

22Ukatsti jupanakxaruw phust'äna, ukat sarakïna: —Qullan Ajay katuqapxam.

23Jumanakatix mayninakan juchanakap pampachapxätaxa, Diosax jumanakar pampachapxarakïtamwa; janitix pampachapkätaxa, Diosax janirakiw pampachapkätamti —sasa.

24Tomasix tunka payan yatiqirit maynïrïnwa, juparusti Ispa sapxänwa. Jesusax jutkän ukapachax janiw jupax ukankkänti.

25Ukat maynïr yatiqirinakax Tomasirux sapxäna: —Tatituruw uñjapxta —sasa. Ukampis Tomasix sänwa: —Janitix amparanakapan clavompi p'iyjat uñjkä, luk'anaxampis uk jan llamkt'kä, ch'illaparus amparaxampi jan llamkt'karakï ukax, janiw iyawskäti —sasa.

26Kimsaqallqu uru qhipatsti, yatiqirinakapax wasitampiw mä utan tantachasipxäna, Tomasisti ukapachax jupanak taypinkänwa. Punkunakax suma jist'antatänwa, Jesusasti ukaruw mantäna, jupanak taypiruw sayt'asïna, ukatsti aruntarakïnwa: —¡Sumankañax jumanakampïpan! —sasa.

27Ukatsti Tomasiruw säna: —Luk'anamamp amparanakax llamkt'am, ukat uñxatarakim; ukatsti amparamamp ch'illax llamkt'am. Jan pächasimti; jan ukasti, iyawsam —sasa.

28Ukatsti Tomasix sänwa: —¡Tatituxay, Diosaxay! —sasa.

29Jesusasti juparux sänwa: —Tomás, ¿nayar uñjasakit iyawstasti? ¡Kusisiñanïpxiwa jan uñjkas iyawsirinakaxa! —sasa.

30Jesusax yatiqirinakapan nayraqatapan walja yaqha unañchanaka, muspharkañanak luräna, ukanakax janiw akan qillqatäkiti.

31Ukampis kunanakatix akan qillqatäki ukanakax Jesusan Cristötapa, Diosan Yuqapätap iyawsapxañamatak qillqatawa, jupar iyawsasinsti, wiñay jakañ katuqapxañamataki.

← Chapter 19 Chapter 21 →