Job 32

aymara-1997

1Uka kimsa jaqinakasti, Job chachar jan juchan aski jaqïtap arsusiri ist'asinxa, janiw jupamp parlañ munkxapxänti.

2Ukat mayni jaqix Elihú sutini, Buz markankiri, Ram chachat saraqir Baraquel jaqin yuqapax Job chachatak mayjt'asïna, Job chachan ukhama jan juchanïtap amuyasitapata, Diosar juchañchatap ist'asina.

3Job chachan kimsa masinakapatakis mayjt'asirakïnwa, Job chachar jan suma arusxatasin Diosaruw jan wal uñjayapxatayna.

4Elihú chachax taqinit sipan juk'amp waynakïnwa, ukat suyt'äna mayninakan Job chachampi parlañ tukuyañapkama;

5ukampisa, jupanakan Job chacharu jan suma arunakampi arusxatirjamäpxatap uñjasasti walpun q'apisïna, janiw amukt'irjamäkxänti

6ukat parlañ qalltäna: Nayax sullkäsktwa, jumanakasti chuyman jaqinakäpxaraktawa; ukat nayax kun arsuñsa axsaräyäta.

7Chuymaxan säyätwa: “Jila mara sarnaqäwini jaqinak parlpan; walja marani jaqinakax yatiñ kankañap uñacht'ayapxpan” sasa.

8Mä tuqitsti taqi jaqiw amuyt'a kankañani, taqi ch'aman Diosaw taqinir amuyt'a churaraki.

9Walja maranak jakañax janiw khitirus yatiñ kankañan tukuykiti, jaqix qawqhas sunkhanïskpan, janiw ukax suma amuyt'a churkapunirakispati.

10Ukat sarakta: “Jichhax nayar ist'apxitpan, nayan kuna arst'añaxas utjarakituwa” sasa.

11Nayax jumanakan arsutanakam amukiw ist'askta, wali suma amuyt'a arunak thaqhirsa uñjapxaraksmawa,

12janiw jumanakat maynisa Job chachan amuyt'äwipar wakiskir arunakampi arusxatirjamäpktati.

13Jumanakan wali yatiñanjam jan tukusipkañamatakisti, janiw mä jaqiti, jan ukasti Diosaw juparux suma arunak churani.

14Ukampis, janiw Job chachati nayarux maykitu, janirakiw nayax jupar jumanakjam parlkäti.

15Job, aka kimsa jaqinakax pantjasipxiwa, janirakiw jupanakan kuna arunakas arusxatañatakix utjkiti;

16ukampis jan jumax amuyamti jupanakan jan aruni uñjasipxatap layku nayan amukt'añaxa.

17Nayan arsuñaxax utjarakituwa, kunatix sañaxäki uk sarakï.

18Parlañaxax waliw utji, janiw amukt'irjamäkxti;

19vino imañ machaq wayaqar uñtat phallirjamätwa.

20Chuymaxat mistuñapatakiw arsü; amuyumar arusxatañatakiw lakax jist'arä.

21Janiw khitirus arsutaxamp sumachkäti; taqinirus khuskhak uñjarakï.

22Nayax janiw khitirus sumachañ yatkti; ¡khitir sumachirista ukapachaxa, alaxpach Diosax mutuyitaspawa!

← Chapter 31 Chapter 33 →