Job 24

aymara-1997

1¿Kunatarak taqi ch'aman Diosasti juchañchañatak urunak jan wakt'aykpachasti, ukhamat jupar munasirinakan uñjapxañapatakisti?

2Ñanqha lurir jaqinakax qurpanakap jithiyapxi, ovejanak lunthatapxi, tamanakapar yapt'asiñataki,

3wajchanakatsa, ijma warminakatsa uywanakap aparapxaraki.

4Jan kunan jaqinakarux thakhitsa maysaruw saranukuyapxi, jan yäqat jaqinakasti imantasxapxarakiwa.

5Jan kunan jaqinakasti, wasarankir asnonakar uñtataw wali ch'ama tukusin manq'añap thaqhir mistupxi, wawanakapatakix wasarat manq'añ apsupxaraki.

6Yaqha jaqinakan yapunakapat cebada puyanak apthapisir sarapxi, qhuru jaqinakan uva yapunakapat achunaksa pallasipxi.

7Arumanakasti jan kunampi janxatasiñaniw qhantatipxi, janiw thayan llawuntasiñatak kunapas utjkiti.

8Jallumpiw qullunakan ch'aranjayasipxi; jan jark'aqasiñ utjipansti qarqanakarukiw imantasipxi.

9Ijma warminakat asu wawanakap aparapxi, pisin jakasirinakat qullqi manutsa isinakap lluch'supxi.

10Pisin jakasirinakax q'alalakiw sarnaqxapxi, jaqin trigo yapup apthapkäwisti manq'atjam jiwarasipki.

11Aceite apsuñatak aceitunanak piqapxi, vino apsuñatak uvanak takipxi, ukañkamasti umatjam jiwarasipkaraki.

12Chhuxriñchjata, niyas jiwirpacha, markat jayanakan Tatitun yanapap mayisis wararisipki, ¡ukampis Diosax janiw jupanakan mayisitap ist'kiti!

13Qhanar uñisir jaqinakaw utji, taqi sarnaqäwipan qhanat jithiqtapxaraki.

14Jaqi jiwayirixa, jan kunanir jiwayirix willjtat sartasi, arumthapirusti lunthataruw tukxi.

15Jaqin warmipampi sarnaqir jaqixa, ch'amakthapiñap suyi, ajanupsti sum imantasiraki: janiw khitis uñjkitaniti, sasa.

16Lunthatax arumaw utanakar manti; urusti janiw mistupkisa; jupanakax qhanar uñisipxiwa.

17Uru qhanasti jupanakatakix arum ch'amakawa; arum ch'amakan jan walinakak lurañ munasipki.

18Ñanqha lurir jaqix umampi apatawa. Uraqinakapas ñanqhachataw uñjasi, janiw khitis uva yapupan irnaqkxiti.

19Lupin junt'upampiw khunux chullutati; juchani jaqix amay imäwiruw chhaqtawayxaraki.

20Pachpa taykapaw jupat armasxani; laq'unakaw jupar manq'antxarakini, janiw khitis jupat mayampi amtaskxaniti. Ñanqha lurir jaqix khuchhunukut quqjamaw tinkuni.

21Jan wawachasiri warminakaru, ijma warminakaruw chhuxriñchjapxi, janipuniw kunapachas ijma warmin askip munapkiti.

22Ukampis Diosax ch'amapampiw munañaninakar tinkuyi; jupax sartasi ukkhasti, janiw khitis jakañapat yatiskiti.

23Diosaw jupanakarux sumak jakayaski, ukampis sapa chillqtatap uñch'ukiski.

24Ñanqha lurir jaqix mä juk'atakikiw sarti, ukampis akatjamat jiwawayxi. Jik'inukut alir uñtataw pharsuwayxi, k'umuptat trigo puyar uñtataw ankuntawayxaraki.

25Ukatix jan ukhamäkchi ukasti, ¿khitirak sitaspa: “Janiw ukhamäkiti” sasasti? ¿Khitirak qhanañcharakitaspa nayan pantjasitaxsti?

← Chapter 23 Chapter 25 →