Job 10

aymara-1997

1¡Jakañax nayatak ch'amäxiwa! Jachkäwiw tukusxä, t'aqhisitanakaxat taqi ch'amampiw arsusirakï.

2¡Dios Tatay, janikiy nayar juchanit uñt'istati! Sitaya, ¿kunatarak juchañchistasti?

3Jumaxay nayar uskuschistaxa; ¿walikit ukham nayar jisk'achasin t'aqhisiyatamasti? ¿Walikit ñanqha jaqinakan nayatak jan wali amtatanakapasti?

4¿Jumasti janchi nayranïtati, jaqinakjam uñjañamatakisti?

5¿Jakañamasti jiwir jaqin jakañapjam juk'a urunakatakikiti?

6Ukhamasti, ¿kunatarak pantjasitaxampi, juchanakaxamp thaqhas sarnaqtasti?

7nayan jan juchanïtax yatkasasa, amparamat jan khitin nayar qhispiyañap yatkasasa.

8Jumaw nayarux pachpa amparamampi irnuqista, ¡jichhasti t'unjañ munarakista!

9Amtasimaya, nayarux ñiq'it luristaxa, jichhasti ¿wasitatti laq'ar tukuyxitäta?

10Jumaw janchixan ukhamäñapatak luristaxa, kunjämatix lechex quesor tukuwaykxi ukhama;

11jumaw patxa janchixsa, manqha janchixsa uchistaxa, ch'akhanakaxsa, ankunakaxsa k'anarakistaxa;

12jumaw jakañ churistaxa, munasiñam churarakistaxa, nayar uñjatamaw jakayaskitu.

13Ukampis jichhax amuytwa, chuyma manqhaman imxäsiskatätaxa:

14jucha lurtti, janicha uk uñch'ukisinkistästaxa, juchaxat nayar juchañchañataki.

15Nayatix juchanïsta ukasti, nayatak kunakïkani; jan juchanïksta ukasti, janiw p'iq waytkiristti, llakimp phuqhantat uñjasitax layku.

16Nayatix sayt'asiristxa, jumax leonar uñtataw qhamisiyitasma, nayar t'unjañatakix kunsa lurirjamätawa.

17Nayar irkatir jaqinakax janiw jumatak pist'arapktamti; nayatak q'apisitamax juk'ampiw jilxatti, ¡ejercitor uñtataw jan inakt'as katuntañ munistaxa!

18¿Kunatarak nayarusti yuriyistasti? Khitinsa janïr uñjkat jiwxañaxaw walïsapäna.

19Taykaxan purakapat amay imäwir chiqak sarxañaxaw walïsapäna, janis kunapachas nayax utjkiriskäyät ukhamäsapänwa.

20Jakañ urunakaxax jakhutäxiwa, ¡janiy juk'amp t'aqhisiyxistati! Mä juk'aksay kusist'ayita,

21jan mayampitaki sarxañäki ukar janïr sarxarkipana, ch'amakan markaparu, ch'iyär qinayanakan markaparu,

22ch'iwin markaparu, jan walt'añan markaparu, kawkhantix pachpa qhanasa ch'amakampix mayakïki ukaru.

← Chapter 9 Chapter 11 →