Jeremiah 8

aymara-1997

1Tatitux siwa: “Uka uru purinkani ukkhasti, sepulturat Judá uraqin reyinakapana, taqi jilïrinakapan ch'akhanakap apsupxani, sacerdotenakana, profetanakana, taqi khitinakatix Jerusalenan jakapkäna ukanakan ch'akhanakap apsupxarakini.

2Uka ch'akhanaksti uraqiruw willitatapxani, intinsa, phaxsinsa, taqi warawaranakansa uñjkat willinukutäniwa, jupanakax ukanakaruw yupaychapxatayna, arkapxatayna, jiskt'asipxarakitayna. Janirakiw khitis uka ch'akhanak imt'xañatakix apthapkaniti. Jan ukasti pachpa uraqiruw qhiparani, q'añu t'unar uñtata.

3Uka ñanqha jaqinakat qhiparirinaksti, aka uraqpacharuw ananukü, jupanakax jakaskañat sipansa, jiwañak munxapxani. Naya, taqi ch'amani Tatituw ukham arsta.

4“Jumasti Jeremías, aka arunak naya tuqit aka markar yatiyam: “ ‘Maynitix liwischi ukaxa, ukspachaw saythapi; thakhi chhaqtayaschi ukasa, jank'akiw wasitat jikxatxi.

5Ukampis aka markax nayar apanukutuwa janiw nayan ukar kuttaniñ munkiti. Jerusalenankirinakax nayar apanukuñpin munitu; k'ari diosanakarukiw arkañ munapxi, janiw naya chiqpach Diosan ukar kuttaniñ munapkiti.

6Taqi chuymaw ist'askarakïyäta, ukampis janiw maynis chiqpach arsurix utjkiti, janirakiw khitis ñanqha luratapat chuymay sirix utjkiti. ¡Janiw khitis nayaw ñanqha lurtxa sirix utjkiti! Taqinis kuntix munapki uk lurapxaraki, antutt'at caballonakar uñtataw uksa aksa jalanaqapxi.

7Cigüeña sat jamach'is kunapachatix kuttaniñapäki uk yatiwa. Qhurukutunakasa, jisk'a jamach'inakasa, kunapachatix yaqha chiqar sarxapxañapäki uk yatipxarakiwa. Ukampis jumax nayan markaxay, janiw kamachinakaxar jaysañ munktati.

8Ukhamasti, ¿kunjämarak jumanakasti sapxasmasti: ‘Taqi kunsa sum yattanxa, Tatitun kamachipasti jiwasampïskiwa’ sasasti? ¡Kamachinak yatichirinakax k'arikamak yatichapxi, ukatsti, Qillqatax ukham siwa sasaw sarnaqapxaraki!

9Ukampis uka yatiñan jaqinakax p'inqachjatäpxaniwa, jan mayan tukjatäpxarakiniwa. Jupanakax janipuniw kuna yatiñanïpkisa, nayan arunakaxsa janiw ist'añ munapkiti.

10Ukatpï jichhax, warminakapsa yaqha chachanakar katuyäxa, uraqinakapsa yaqhanakaruw katuyarakï. Jisk'a jaqinakasa, jach'a jaqinakasa, lunthatasiñak amtasipki; profetanakasa, sacerdotenakasa taqiniw lunthatasiñar katuyasipxi.

11Markaxan chhuxrinakapsti patatak qullxatt'apxi, taqi kunas jan walïki ukkhax, walikïskiwa sapxiwa.

12Ñanqha axtaskañ juchanakpin lurapxtaxa, ukham luratanakamat janiw p'inqasipktati, janirakiw kunäkitix p'inqasiñax uksa yatkxapxtati. Ukatpï mutuyapxämaxa, ukatsti taqiniw t'unjatäpxäta. Naya, Tatituw uk arsta.’ ”

13Tatitux siwa: “Markaxarux trigor uñtat yawinukü. Janiw uva yapun mä uvasa qhiparkaniti, janirakiw mä sapa higosa higo quqan qhiparkaniti. Pharsut laphinakakiw qhiparxani.”

14Markasti sarakiniwa: “¿Kunatakis akar qhiparaskakiñäni? ¡Taqinis jach'a pirqan markanakar sarxañäni, ukan mäpita jiwarayistpan! Tatitu Diosasax jiwarayistaniwa; umt'añatakis jiwayir qullani uma churistu, jupa tuqi jucha luratas layku.

15Taqi kunansa jiltañ munäyätan, ukampis jan walt'añanakakiw purinistu. K'umar sarnaqasiñ munäyätan, ukampis axsarañakiw utji.

16¡Uñisirinakasax niyaw jutantapxi! ¡Dan siski uka chiqatsti niyaw caballonakapan samaqitapax ist'asi! Uka caballonakan qanchisitapatsti, taqi uraqpachaw khathatiraki. Taqi aka markaru, yänakapamppach t'unjiriw jutapxi, markanakarusa, ukan jakirinakarusa.”

17Tatitux siwa: “Jumanakatakisti jiwayir katarinak apayanï, achjapxätam ukapachasti; janiw layqanakan ch'amapas kunäkaniti.”

18Chuyma usuyasitaxax janiw qullañjamäkxiti, chuymaxas käwkst'arakituwa.

19Markaxan ayqutanakapasti taqi chiqan ist'asi: “¿Janit Tatitux Jerusalén markankxpacha? ¿Janit reyipas ukankxpacha?” sasa. Tatitusti sarakiwa: “¿Kunatsa nayarux ñanqha lurapxista, yaqha diosanakar yupaychasaxa?”

20Ch'uxña pachax tukusxiwa, achunak apthapiñas tukusxiwa, jiwasatakisti janiw qhispiyasiñax utjkxiti.

21Markaxan t'aqhisitapampi chikaw t'aqhisirakta; llakisiñampi, axsarañampiw nayarux muyuntitu.

22¿Janit kuna qullas Galaad chiqan utjkpacha? ¿Janit ukan khiti qullt'iris utjkpacha? ¿Kunatarak markaxasti jan qullt'atäpachasti?

← Chapter 7 Chapter 9 →