Jeremiah 6

aymara-1997

1¡Benjamín tuqin utjir jaqinaka! ¡Imantasiñ thaqtapxam, Jerusalenat jaltxapxam! Tecoa chiqan trompeta phust'apxam, Bet-haquerem chiqansti mä chimpu sayt'ayapxam, mä jach'a jan walt'añampi, mä jach'a aynacht'añampiw, amsta tuqit jutantaski.

2Sión uraqix mä suma ch'uxña uraqjamawa, jank'akiw q'ala tukjat uñjasini,

3kawkirutix awatirinakax tamanakapampi sarapki ukhama; uka uraqiruw muyuntapxi, sapa tamanakarakiw ukan manq'arasipki.

4Uñisirinakapasti sapxarakiwa: “¡Jerusalenampi jichhax nuwasiñäni! ¡Jutapxam, chika urunpach jalxatapxañäni! Ukampisa, ¡llakiskañawa! Jayp'üxiwa, ch'iwis saraqanxarakiwa.

5¡Ukhamax aruma chhukt'añäni, pukaranakap t'unjarakiñäni!” sasa.

6Taqi ch'aman Tatitux akham siwa: “¡Quqanak tinkurayapxam, ukatsti uka lawanak arkt'apxam, ukanak patxat Jerusalenar nuwantañataki! Aka markax juchañchatäñatak katuyatawa, jupanakax t'aqhisiyir jaqinakäpxiwa.

7Jerusalenat ñanqha lurañax mistu, kunjämatix umax mä phuch'ut mistki ukhama. Uka markansti nuwasiñanakampi, ch'axwañanakampikiw ist'asiski; ukansti chhuxriñchjasiñanakampi, usuyasiñanakampik uñjarakta.

8Jichhax Jerusalén wanimaya, jan ukasti nayax jumat mayjt'ataw sarxä, mä ch'usa wasararuw tukuyäma, jan jaqin jaytarakïma.”

9Taqi ch'aman Tatitux siwa: “Kawkïr israelitanakatix qhiparkani ukanakarux q'ala thaqsutäniwa, kunjämatix uva alin layminakapax thaqsutäki jan mä sapa uva achus qhiparañapataki ukhama” sasa.

10Nayasti saraktwa: “¿Khitirak ist'itani aka yatiyäwixarusti? Tatay, jinchunakapax llupantatawa, janiw ist'irjamäpkiti; arunakamatsti larusipxiwa, janiw arunakam munapkiti.

11Tatay, phiñasiñaman phuqhantatätwa; janiw juk'ampi kunsa lurirjamäkxti” sasa. Tatitusti sarakituwa: “Uka phiñasiñam waynanakxar warxatam, tam tama sarnaqki uka waynanakxaru. Chachanakarux warminakapamppach katuntasin apapxani, ukhamaraki sinti chuymani jaqinakarusa.

12Utanakapasa, uraqinakapasa, warminakapasa yaqhankxaniwa. Nayaw amparax aytä, aka markan utjirinakar mutuyañataki. Naya, Tatituw uk arsta.

13“Taqinisa, jisk'as jach'asa, lunthatasiñampi jikxatañatak lup'isipki; profetanakasa, sacerdotenakasa, taqiniw lunthatasiñar katuyasipxi.

14Markaxan chhuxrinakapsti patatak qullañ munapxi; taqi kunas walikïskiw sapxiwa, ukampis taqi kunas jan walipuniwa.

15¡Kuntix nayax jan munkta ukanakat p'inqasipxañapänwa! Ukampisa, janiw p'inqasipkiti, ¡janirakiw kunatix p'inqasiñäki uksa yatipkiti! Ukatpï jichhaxa, kunapachatix mutuykä ukkhaxa, ch'anqtasisaw mayninakjam liwirtapxani. Naya, Tatituw uk sista.”

16Tatitux markaparux siwa: “Thakhi jak'anakar sayt'asipxam ukatsti uñatatasipxarakim, nayra thakhinakat jiskt'asipxam; kawkïris suma thakhix ukata; ukatsti uka thakhinjam sarapxam, ukapachaw samarañ jikxatapxäta.” Ukampis jupanakax sapxiwa: “Janiwa, janiw uka thakhinjam sarapkiristti” sasa.

17Tatitusti uñjirinak usku, markarusti sarakiwa: “Kuna unañchäwtix churapkäma uk sum amuyapxam” sasa. Ukampis markax siwa: “Janiw nanakax ist'apkäti” sasa.

18Ukatpï jichhax Tatitux sixa: “Markanaka, ist'apxam, kunanakatix markaxampi luraskani ukanak yatipxarakim.

19Aka uraqpachan ist'apxam: Aka markarusti mä jach'a jan walt'añ apayanï, jan wali lurañanakak amtasipkatapata; janiw arunakaxar ist'apkiti, kamachinakaxarus jisk'achapxarakiwa.

20¿Kunatakis jumanakax Sabá uraqit incienso apanirapipxista? ¿Kunatakirak jaya markanakat q'apkir alinak apanirapipxistasti? Janiw nayatakix uka luqtasitanakamax kuna askïkisa, janiw yaqha waxt'äwinakamas askïkarakiti.”

21Ukatpï Tatitux sixa: “Aka markarux ch'anqtasiyasaw liwisiyä. Awkinakasa, wawanakasa, uta jak'anakasa, jilat masinakasa, taqiniw mayak jiwarapxani” sasa.

22Tatitux siwa: “Amsta jaya uraqinakatpach mä ch'aman markax jutantañatak wakichasiski.

23Jupanakasti mich'inak antutt'añanakampi, espadanakampi wakicht'asitäpxiwa; sinti qhuru jaqinakäpxiwa, janiw khuyapt'ayasiñ chuymanïpkiti; arnaqasitanakapasti jach'a qutan qhuthutitapjamawa, caballonakar lat'xatatkamaw jutantapxi. Jerusalén markampi nuwantasiñatakix jank'akïpxarakiwa” sasa.

24Jerusalén markansti jaqinakax sapxiwa: “Nanakax uka yatiyäw ist'apxta, axsarañasti jan ch'aman antutapxitu; mä wawachasir warmjamaw t'aqhisiñat wal ayqupxarakta.

25¡Pampa tuqir jan mistupxamti, thakhinjamsa jan sarapxamti! ¡Uñisirisax wali wakichrantatawa, taqi chiqansa axsarañakiw utjaski!” sasa.

26¡Markaxay, jichhax chhankha isinakampi isthapisim ukhamat t'aqhisitam uñacht'ayañataki; qhillar sunt'intam, llaki isinakampi isthapisim, ukatsti wal jacharakim, kunapachatix mä sapa yuqall wawax jiwki ukhama; jiwasar t'unjiristi jank'akiw jutantani!

27Tatitusti sarakituwa: “Nayax aka markaxaru yant'añamatakiw jaytsma. Kunjämas sarnaqäwipax uk sum uñjam” sasa.

28Tatay, taqi jupanakax kutkatasirïpxiwa; qhuru k'ari jaqinakäpxiwa. Amuyatax aski jaqinakjamäpxiwa, ukampis lunthatkamakïpxiwa.

29Plomo metalax ninampi umatatayas q'umachatawa, ukampis uka jan wali jaqinakax janiw kunampis q'umachatäkaspati. ¡Jupanakax chhaqhatampi sasiwa!

30Jupanakarux “Apanukut qullqi” sasay sutichañächispa, juman jupanakar apanukutam layku.

← Chapter 5 Chapter 7 →