Jeremiah 50 — aymara-1997

1Tatituw aka arunak Babilonia markata Jeremías profetar yatiyäna:

2“Taqi markanak taypin aka arunak yatiyapxam. Yatiyäwi unañchanaksti uñstayapxam; jan kunsa imt'apxamti. Sapxarakim: ‘¡Babiloniax katuntatawa! ¡Bel diosax q'ala p'inqachjatawa, Marduc diosasti aliqakiw khathatxi! ¡Uka k'ari diosanakapasti laruskañ p'inqakïxapxiwa!’ sasa

3Amsta tuqit mä markax jutanti, Babilonia markar nuwantasin t'unjani. Jaqinakasa, uywanakasa, taqiniw ukkhat jaltxapxani, janirakiw khitis ukan wasitat jakxaniti” sasa.

4Tatitux siwa: “Khä urunakan Israelankir jaqinakax, Judá uraqinkir jaqinakasa jacht'asisaw naya Tatitu Diosapar thaqhir jutapxani.

5Jerusalén markar sarir thakhit jiskt'asipxani, ukatsti uksaruw akham sasa sarapxarakini: ‘Tatitun ukar sarxañäni, jupampisti wiñayatak mä arust'äwi lurañäni, jan mayampitak armaskiri’ sasa.

6“Markaxasti chhaqhat ovejanakar uñtatänwa, jan wali awatirinakan irpata, uka awatirinakapasti qullu tuqinakan ananukupxäna. Ukat mä qullut mä qulluru sarapxäna, pachpa uyunakapatsa armasxapxarakïnwa.

7Uñisirinakapasti jupanakar uñjasax p'inqachjapxänwa, ukatsti sapxarakïnwa: ‘Janiw nanakan juchaxäkiti, jupanakaw Tatitu nayraqatan jucha lurasipki, taqi kunsa churir Tatit tuqi, nayra awkinakapan suyt'äwipäkän uka Tatit nayraqatana’ sasa.

8“Nayan markaxa, ¡Babilonia markat mistunxapxam! ¡Taman nayrap sarir irpirinakjam mistunxapxam!

9Nayaw amsta tuqinkir ch'aman markanakampi Babilonia markarux nuwantayä. Jupar katuntañatakix wakicht'asipxaniwa. Nuwasiñataki suma yatxatat jaqinakäpxiwa, mich'inakapsti jan pantjasaw antutt'apxi.

10Caldeonakarux taqi yänakap lunthatsupxani; ‘ukkhaki’ sañkamaw lunthatsupxani. Naya, Tatituw uk arsta.

11“Babiloniankirinaka, markaxar lunthatirinaka, ¡jichhax kusisipxam, k'uchirt'asipxam! ¡Vaca qallur uñtat chuxlla taypin sink'usipxam! ¡Caballonakjam wararipxam!

12Ukampis yurïwi markamax mä p'inqaw qhiparani. Taqi markanakat sipansa qhipankapuniniwa, ch'usa waña wasararu, jan jaqini tukuyatarakïniwa.

13Nayax phiñasïwa, jan jaqin jaytarakï, ch'usa wasarar tukuyat jaytä. Uka chiqa sarakipirinakasti, wal mulljasipxani, uka mutuyäwi katuqatap uñjasa.

14“¡Mich'i antutt'añ apnaqir nuwasirinaka, Babilonia markar muyuntapxam! ¡Uka marka tuqir taqpach mich'inakam antutt'apxam, naya Tatitutak jucha lurapxatap layku!

15¡Nuwasiñ arunak taqi tuqin art'apxam! ¡Babiloniasti niya atipjatäxaniwa! ¡Pukaranakapax liwirtxiwa, pirqanakapas tinkurxarakiwa! ¡Akaw nayan phuqsusiñaxaxa, jumanakasti jupat phuqsusipxarakim! ¡Kunjämtix jupax jumanakampi lurkäna ukhamarak jichhax jupar lurapxam!

16Janipun maynis Babilonian qhiparpati, ukan yapuchañapataki, apthapiñapatakisa. Ukham t'unjir nuwasïwi uñjasaxa, yaqha markankirinakax markaparuw kuttawayxapxani, sapa maynis markaparkamaw jaltawayxapxani.

17“Israel markasti leonanakan arknaqat mä chhaqhat ovejar uñtatawa. Asiriankir reyiw nayraqat manq'anti, ukxarusti Babiloniankir Nabucodonosor reyiw ch'akhanakamppach manq'antaraki.

18Ukatpï naya, taqi ch'amani Tatitu, Israelan Diosapax arstxa: Babiloniankir reyirusa, markaparusa mutuyäwa, kunjämtix Asiriankir reyirux nayax lurkta ukhama.

19Israel markarusti uraqiparuw kuttayanxä. Carmelo uraqina, Basán uraqina, Efraín qullunakana, Galaad uraqinsa naya pachpaw ovejanakarjam suma chhuxllanak churarakï.

20Naya, Tatituw uk arsta: Uka urun Israel markasa, Judá markasa, taqi juchanakapat pampachatäxani, nayaw khitinakarutix jakaskir jaytkta ukanakarux juchanakap pampacharakï.

21“Merataim markar nuwantapxam, Pecod markankirinakar nuwantapxarakim. ¡Arktapxam, q'al t'unjapxam! ¡Nayan arsutaxarjam taqi phuqhapxam! Naya, Tatituw uk arsta.”

22Nuwasiñatak arnaqasirinakaw markan ist'asi, jach'a t'unjäwi uxutanakapaw ist'asi.

23¡Babilonia marka, jumax mä martillor uñtatäyätawa, taqi aka uraqpacharuw liq'jarakïyätaxa, jichhasti jan kunatak askikïxtawa; ¡jisk'a jisk'a p'akinuqataw uñjastaxa, yaqha markanakasa, ukham uñjasin wal muspharapxi!

24Babilonia, jumapachaw mä sipit wakichastaxa, jan amuyasispachaw ukarux jalt'taxa. Jichhax uka sipitan katuntataw uñjastaxa Tatitur saykatatam layku.

25Tatituw nuwasiñ yänakap imasiñ utanakap jist'ari, phiñasiñapan nuwasiñ yänakap apsusiraki, taqi ch'aman Tatitu Diosasti Babilonia markarux q'al tukjañapawa.

26¡Taqi tuqit Babilonia markar nuwantapxam! ¡Grano imasiñanakap jist'arapxam, uka granonak q'al apasxapxam! ¡Taqi yänakapsa mayjar apthapisin t'unjapxam! ¡Janirak kunas jupatak jilt'panti!

27Mutuyäwi katuqañ urupax purinxiwa! ¡Taqpach soldadonakapar jiwarayapxam! ¡Taqpach jaqinakapar tukusiyapxam!

28(Babiloniat jaltanxir jaqinakaw Jerusalén markarux purinipxi, kunjämsa Tatitu Diosax Babilonia markarux Tatitun utap t'unjapxatapat q'al tukjkarakitayna ukanakat yatiyiri.)

29“¡Nuwantir jaqinakax jutapxpan, Babiloniar nuwantapxpan! ¡Uka markar muyuntapxpan, ukhamat jan maynis jaltañapataki! Babilonia markax nayaruw saykatitu. ¡Lurataparjam jupanakarux churapxam! ¡Kunjämtix jupax mayninakar lurki, ukhamarak jumanakax jupar lurapxam! Nayätwa Israel markan Diosapaxa, nayax yaqha diosanakat sipansa mayjapunïtwa.

30Ukat waynanakax marka thakhinakan jiwarapxani, nuwasir jaqinakapas uka urux taqiniw tukusipxani. Naya, Tatituw uk arsta.”

31Taqi ch'amani Tatitu Diosax siwa: “Ñanqha lurir marka, nayax jumatakiw sayt'ta; juman urumax purinxiwa, jumar mutuyañ pachax purinxarakiwa.

32Ñanqha lurir marka, lanktasisin liwisïta, janiw khitis waytkätamti. Taqi markanakamsti ninampiw phichhkatä, uka ninaw marka jak'a chiqanaksa q'al nakhantani.”

33Taqi ch'amani Tatitux siwa: “Israel markampi, Judá markampix t'aqhisiyataw t'aqhisisipki. Uñisirinakapasti jupanakarux katuntat katxäsisipki janirakiw antutañ munapkiti.

34Ukampis qhispiyiripax jach'a ch'amaniwa, sutipasti “Taqi Ch'amani Tatitu” satarakiwa. Jupaw taqi kunsa chiqapar uñjani; markarusti sumankañ apanini, ukampis Babiloniankir jaqinakatakix jach'a axsarkañanak apanirakini” sasa.

35Tatitux siwa: “¡Babilonio jaqinakax jiwarapxpan! ¡Jilïrinakapasa, yatiñan jaqinakapas jiwarapxpan!

36¡Taqi k'ari profetanakapasti luqhirapxpan, jiwarapxarakpan!

37¡Soldadonakaparux nuwjapxam; axsarañatsa khathatipxpan! ¡Caballonakapax jiwarapxpan, nuwasiñ carronakapas t'unjatäpan! ¡Qullqi layku nuwasir soldadonakapasti, warminakjam tukupxarakpan! ¡Qamir yänakapsa q'al lunthatjapxpan!

38¡Jawiranakapas wañt'arakpan! Babiloniax axtaskañ idolonakar yupaychir markawa, ukat jan kunankatapsa amuyaskiti.

39“Babilonia markan janipuniw mayampis jaqinakax ukan jakxapxaniti, monte phisinaka, qamaqinaka, suri sat jach'a jamach'inakakiw jakxapxani.

40Kunjämatix Sodoma, Gomorra, uka jak'ankir markanakasa t'unjat uñjasipxäna, ukhamarakiw jichhax Babiloniax t'unjat uñjasini. Janipuniw ukan khitis jakkxaniti. Naya, Tatituw uk arsta.

41“Amsta tuqinkir jaya markanakatpacha, mä jach'a ch'amani markaw jutantaski jupa chikasti walja reyinakaw jutantapxaraki.

42Mich'inak antutt'añanakampi, lanzanakampi wakicht'ataw jutantapxi; jan khuyapayasir qhuru jaqinakäpxiwa, arnaqasitanakapasti quta qhuthutinakjamawa, caballonakar lat'xatatkamakiw jutantapxi. Babiloniar nuwantañatakis jank'akïpxarakiwa.

43Ukanak ist'asasti, Babiloniankir reyix, axsarañatsa pachpar jan unxtkiriw tuku, wali llakt'ata t'aqhisitaw jikxatasi, wawachasir warmjamaw t'aqhisi.

44“Babilonia marka, jan kamsasakiw jumarux nuwantäma, kunjämatix mä leonax akatjamat khitirus thuqxatki ukhama. Mä juk'a pachanak jumar atipjañapatakix nayaw uñisirim ajllï. Janiw yaqha Diosax nayjam utjkiti, janiw khitis nayar saykatirix utjkiti, janirakiw kawkïr awatiris nayar saykatkitaspati.

45Babilonia markatak naya, Tatitun amtatanakax ist'apxam; kuna amuyt'äwinaktix caldeonakatakis amtkarakta ukanaka. Jisk'a wawanakas taqpachan apatäpxaniwa, markapasti q'ala t'unjatarakïniwa.

46Babilonia markan t'unasitapasti wali jach'at ist'asini, uraqis uk ist'asax khathatiniwa, arnaqasitapasti yaqha markanakkamaw ist'asini.