Jeremiah 44

aymara-1997

1Jeremiasax kawkïr judionakatix Egipto uraqinkir Migdol, Tafnes, Menfis uka markanakan jakapkäna, ukhamaraki aynach tuqi uraqinakan jakapkäna ukanakatakiw aka arunak katuqäna:

2“Israelan taqi ch'aman Diosapax siwa: ‘Jumanakax uñjapxtawa kuna t'aqhisiñanaktix Jerusalén markxaru, Judá uraqinkir yaqha markanakxarus apayankta taqi ukanaka. Jichhax uka markanakax q'ala aynacht'atawa, janirakiw khitis uka markanakan jakkxiti,

3kunayman ñanqhanak lurapxatanakap layku. Yaqha diosanakar killt'asisa, ukanakar inciensonaka luqtasisaw nayarux ñanqhachapxitu; uka diosanakampisti jumanakasa, nayra awkinakamas janiw kuna lurañanakamas utjkänti.

4Nayasti mayamp mayampi nayar luqtir profetanak khithanipxäyäsma, jumanakar uka axtañ luräwinak jan lurapxañamatak yatiyiri, nayasti uka luräwinakampix axtastwa.

5Ukampis jumanakax janiw nayarux ist'apkistati, arunakaxarus jaysapkaraktati. Uka ñanqha luräwinak apanukuñat sipansa, juk'ampikiw uka diosanakarux inciensonak luqtasipxtaxa.

6Ukatpï q'apisiñaxanxa Jerusalén markarusa, Judá uraqinkir markanakarusa q'al tukjaraktxa. Jichürkamas uka markanakax ch'usa wasarar tukutaw uñjasi.

7“ ‘Ukhampï naya, Israelan taqi ch'amani Diosapax sistxa: ¿Kunatsa jumanakpachar uka jach'a ñanqha apasinipxta? ¿Kunatsa jumanakax taqi Judá uraqinkir jaqinakar jiwarañar apt'apxta, chacharu, warmiru, wawanakaru, asu wawanakamppacharusa, jan maynin jiwarañapatakixa?

8Aka Egipto markar jakir jutasax yaqha diosanakar yupaychasaw incienso luqtasipxta, ukham luratanakamampix jumanakpachakiw ñanqha lurasisipktaxa, taqi markanakan uñjkañaw jumanakax t'unjatäpxäta, uka markanak nayraqatansti mä p'inqaw tukupxarakïta.

9¿Jumanakasti nayra awkinakaman jucha luratanakap armasxapxtati? Judá uraqina, Jerusalenan thakhinakapansa, jupanakampi warminakapampix kunayman juchanak lurapxäna, uka kipkarakiw Judá uraqin reyinakapasa, warminakapasa, sinti jan wali juchanakpun lurapxäna. ¿Janit uka jucha luratanakapat amtasxapxta?

10Jichhakamasti janiw jumanakax sarnaqäwinakamsa askichasipktati, janirakiw axsartañas utjapktamti, nayra awkinakamampiru, jumanakampir churata yatichäwinakarusa, kamachinakarusa janirakiw phuqhapktati.

11“ ‘Ukatpï naya, Israelan taqi ch'amani Tatitupax sapxsmaxa: Jumanakxarux ñanqha apaniñ amtta, Judá uraqirusti taqpach t'unjañ amtarakta.

12Khitinakatix Judá uraqir qhiparapkäna, ukatsti Egipto markar jakir sarxañatak wayt'asipki ukanakax uka markan jiwarapxani. Taqiniw jiwarapxani, nuwasïwina, jan ukax manq'atjamasa, jisk'at qalltasina jach'akama, ukatsti markanak taypinxa ñanqhachata, jisk'achjataw uñjasipxani.

13Egipton jakapki ukanakarusti kunjämtix Jerusalén markankirinakar mutuyktxa uka kipkarakiw nuwasiñampi, mach'ampi, kunayman usunakampi mutuyä.

14Egiptor sarxir uka mä qawqhani jaqinakatxa janiw maynis jilt'kaniti. Judá uraqir kuttaniñ munasipkaniwa, ukampis janiw kuttanipkaniti, inas mä qawqhani yaqha markanakar imantasirinakax kuttanipxchispa’ ” sasa.

15Ukhamasti taqi khitinakatix warminakapan yaqha diosanakar inciensonak luqtasipxatap yatipxäna ukanakasti, ukan jikxatasipkän taqi uka warminakasa, waljaniw tantacht'asipxäna, ukhamaraki kawkïr judionakatix Egipto tuqin utjapkäna ukanakasa, taqiniw Jeremiasarux sapxarakïna:

16—Janiw nanakax ist'apkäti Tatitun sutiparu yatiyapkista uka arunakamaru.

17Jan ukasti, nanakax lurañ amtasipkta ukham lurasipkakïwa, kunjämtix nayra awkinakaxasa, reyinakaxasa, Judá uraqin jilïrinakasa lurapxirïna ukhama. Alaxpach Mama sata diosarus inciensompi, vinompi luqtasax yupaychasipkakïwa. Nayrasti nanakatakix, manq'añax janiw pist'irïkänti, taqi kunas utjakipunirïnwa, janirakiw kuna jan walt'añas jutirïkänti;

18ukampis Alaxpach Mama diosaru inciensompi, vinompi jan luqtaskxapxta ukat aksarux, taqi kunaw pist'xapxitu, jaqinakasti nuwasïwinakana, jan ukax manq'atjamaw jiwarxapxaraki —sasa.

19Warminakasti ukxarux sapxarakïnwa: —Nanakax muxsa t'ant'anak uka Alaxpach Mamar uñtat lurasipxirïta, juparusti inciensompi, vinompi luqtasipxirïta, taqi uka luräwinakaxsti chachanakaxax sum yatipxarakïna, jichhasa lurasipkakïwa —sasa.

20Jeremiasasti uka chachanakampiru, warminakampirux sarakïnwa:

21—¿Jumanakasti Tatitux janis ukanak yatkaspa ukhamti amuyapxta? Janiwa, Tatitux sum yatïnxa, jumanakana, awkinakamana, reyinakamana, jilïrinakamana, taqi jaqinakana uka yaqha diosanakar Judá uraqina, Jerusalén marka thakhinakansa yupaychapxatanakamxa.

22Ukatpï Tatitux jan juk'ampi jumanakan jan wali luratanakam uñjañ munkxäntixa, uka luräwinakamasti juparux ñanqhacharakïnwa. Ukat jumanakan markanakamax q'ala t'unjata uñjasi, jan utjaskaya uraqir tukuraki; taqinin uñjkata ñanqhachata axsarkañaw tukxi.

23Yaqha diosanakar yupaychasaw Tatitu nayraqatan jucha lurapxtaxa, janirakiw kamachinakaparus ist'añsa, phuqhañsa munapktati. Ukatpï jichhax uka jan walt'añanakan jikxatasipxtaxa —sasa.

24Ukhamarus Jeremías profetax taqpach markaru, warminakarus sarakïnwa: —Judá uraqinkir jaqinaka, khitinakatix Egipto markar jakir jutapkta ukanaka, Tatitun arunakap ist'apxam.

25Israelan taqi ch'amani Tatitupax siwa: ‘Jumanakasa, warminakamasa, lakanakamampiw arsupxtaxa, uka arsutanakamsti luräwinakamampiw phuqhapxaraktaxa. Jumanakasti, Alaxpach Mamaru inciensompi, vinompi luqtasiñatakiw arsupxtaxa, uka arsüwinakamsti phuqhapxarakïtawa. ¡Jichhax walikiwa, kuntix arsupkta ukxa luräwinakamampix phuqhasipkakim!

26Ukampisa, Judá uraqit aka Egipto markar jakiri jutapkta ukanaka, ist'apxam, kuntix naya Tatitux sapksma uka arunaka: Nayax juramentompiw jach'a sutixxaru arsta, janipuniw maynis Judá uraqit jutir jaqinakax nayan sutix aka Egipto uraqin aytaskxaniti: ‘Tatitun sutipxaru’ sasaxa.

27Nayasti jumanakxarux askinak apayaniñ lantxa, t'aqhisiñanak apayanipxäma. Taqi khitinakatix Judá markat jutasin aka Egipto markan jakasipkta ukanakasti, manq'atjama, jan ukasti nuwasïwin jiwarapxäta.

28Mä juk'anikiw nuwasïwin jiwañat jaltxasin Egiptot Judá uraqiru kuttxapxani. Ukhamatwa, khitinakatix Judá uraqit jutasin Egipto markan utjasipki ukanakax yatipxani, khitin arsutapas phuqhasixa, nayan arsutaxati jan ukax jupanakan arsutanakapach phuqhasix uka.

29Naya, Tatitusti jichhax mä chimpu churapxäma, nayan jumanakar axsarañ arunak churapksma, ukhamaraki aka markan mutuyapkäma ukanak phuqhasiñapataki.

30Uka chimpusti akawa: Egipto markan reyipa Hofra sat faraonarux uñisirinakapan amparaparuw jiwayañapatak katuyä, kunjämtix Judá markan Sedequías reyiparux Babilonia markan Nabucodonosor reyipan amparaparu jiwayañatak katuyktxa ukhama.’

← Chapter 43 Chapter 45 →