Jeremiah 42

aymara-1997

1Taqi jilïrinakasti, Caréah jaqin Johanán yuqapampi, Hosaías jaqin Azarías yuqapampi, taqi jaqinakampi, waynanaka, awki jaqinaka, taqi jupanakasti

2Jeremías profetaru jak'achasisin sapxarakïna: —May jumar mayiñ munapxsma, janikiy janiw sapxistati. Tatitu Diosamaruy nanak juk'a jaqinaka qhiparapkta ukanakatak mayirapipxita, nayrax waljanïpxäyätwa, uñjasktawa, jichhasti juk'anikïxapxtwa.

3Tatitu Diosamaruy achikt'arapipxita, kawki chiqsa nanakax sarapxä, kunsa lurapxä ukanak tuqita —sasa.

4Jeremías profetasti jupanakarux sarakïnwa: —Walikiwa. Nayaw jumanakatak Tatitut mayirapipxäma, kunjämtix sapkista ukhamarjama, ukatsti jan kunsa imt'asaw kuntix Tatitux siskitani taqi ukanak yatiyxapxarakïma —sasa.

5Ukhamasti jupanakax Jeremiasarux sapxarakïnwa: —Tatitu Diosamaw chiqpach qhanañchirïni janitix nanakax kuntix jupax siskätam uka arunakar phuqhapkä ukkhaxa.

6Jupan arunakapax walïnisa, jan walïkanisa, Tatitu Diosarupuniw nanakax jaysapxä, khitin ukarutix jiskt'añatak khithapksma uka Tatituru, ukhamat taqi kunas nanakatak walt'añapataki —sasa.

7Tunka uru qhipatsti Tatitux Jeremiasaruw parläna,

8Jeremiasasti Caréah jaqin Johanán sat yuqaparuw jawsäna, kawkïr jilïrinakatix jupampi chikäpkän ukanakaru, taqi jaqinakaru jisk'at jach'akama,

9sarakïnwa: “Israelan Dios Tatitupax, khitirutix jumanakax mayirapipxita sapkista ukasti siwa:

10‘Jumanakatix aka uraqin qhiparañ munapxstaxa, nayax jumanakarux jach'aruw tukuyapxäma; janiw tukjapkämati, jan ukasti nayaw mä quqarjam ayruntapxäma, janirakiw jik'inukupkämati, uka jan walt'añanak apayanitaxatsti walpun amtarakta.

11Babiloniankir reyirux jan axsarapxamti, uka reyin munañapat qhispiyañatakix nayaw jumanakampïskta. Naya, Tatituw, uk arsta.

12Nayasti jumanakat khuyapt'ayasipxämawa, Babiloniankir reyis jumanakat khuyapt'ayasipxarakïtamwa, ukatsti jumanakan uraqimaruw kuttayanxapxätpa.’

13“Ukampis jumanakatix aka markar jan qhiparañ munapkstaxa, ukat Tatitu Diosamar jan ist'añ munasin

14sapxarakïta: ‘Egiptor jakirik sarxañäni, ukansti janiw nuwasiñ uñjkañäniti, janiw trompetan phust'asitapsa ist'kañäniti, janiw manq'atsa jiwarkarakiñäniti’ sasa.

15Ukhamax jichhax aka arunak ist'apxam, khitinakatix aka Judá uraqir qhiparapkta ukanaka, kuntix Israelan Tatitu taqi ch'aman Diosapax siski uka: ‘Jumanakatix Egiptor jakir sarañpin munapxäta ukkhasti,

16kuna nuwasiñarutix jumanakax wali axsarapxta ukhamaraki uka jach'a mach'arusa, ukanakax pachpa Egipton jumanakarux jikxatapxätam, ukatsti uka pachpa uraqin jiwarapxarakïta.

17Taqi khitinakatix Egiptor sarxañ munapki ukanakasti, uka pachpa markan nuwasïwin jiwarapxani, manq'atjama, kunayman usunakampiw jiwarapxani; janirakiw maynis kuna jach'a t'aqhisiñtix apayankä ukat qhispipkaniti.’

18“Israelan Diosapa, taqi ch'aman Tatitusti siwa: ‘Kunjämatix phiñasiñaxampi qhuruchasiñaxampix taqi khitinakatix Jerusalén markan jakapkäna ukanakatak ninjam aqtänxa, ukhamarakiw jumanak tuqix phiñasiñaxax aqtani jumanakatix Egiptor sarapkäta ukapachaxa. Jumanakax jaqinsa uñtkañ ñanqhachatäpxätawa, axsarkañ tukjataw uñjasipxarakïta, janirakiw mayampsa aka uraqi uñjapkxätati’ sasa.

19Jumanaka, khitinakatix Judá uraqir qhiparasipkta ukanakarusti, Tatitux sapxtamwa, ‘Egiptor jan sarapxamti’ sasa. Jichhasti sum ist'apxam, nayaw ukxa jumanakar yatiyapxsma.

20Jumanakax pantjasipxtawa, jumanakpachaw mayipxista nayan Tatitur jiskt'añaxataki, nayarusti sapxarakistawa: ‘Tatitu Diosasat nanakatak mayim, ukatsti kuntix jupax siskani uk yatiyapxarakita, arsutapar nanakan phuqhañaxataki’ sasa.

21Nayasti jumanakarux yatiyapxsmawa, kuntix Tatitu Diosamax jumanakar yatiyañataki siskitu ukanakxa, ukampis jumanakax janiw ist'añ munapktati.

22Ukhamasti, jichhax sum yatipxam, kawkïr uraqirutix jakir sarapkäta ukanxa, nuwasiñanak utjatap layku, manq'atjam jiwarañ utjatap layku, kunayman usunakan utjatap laykuw jumanakax jiwarapxäta.”

← Chapter 41 Chapter 43 →