Jeremiah 39

aymara-1997

1Sedequías reyix tunka mara, llätunka phaxsinaka Judá uraqi apnaqkän ukkhawa, Nabucodonosor reyix Babiloniat jutantäna taqi ejercitopampi Jerusalén markar katuntañataki, ukatsti q'al muyuntarakïna.

2Mä mara chikataniw Jerusalén markax muyuntat uñjasïna, uñisirinakapax uka markan pirqap p'iyjasaw taqi ejercitopampi Jerusalén markar mantantapxäna,

3uka p'iyanjamarak Babiloniankir ejerciton jach'a jilïrinakapas mantantapxäna, ukatsti taqinin mantañäki uka punkuruw utjnuqtapxäna. Ukanakasti: Nergal-sarézer, Samgar, Nebo-sarsequim, uka jilïrinakänwa.

4Sedequías reyimpi, soldadonakapampisti ukanak uñjasin markat jaltxapxänwa. Arumpachaw reyin utapan panqar uyunakäkis uksa chiq mistuwayxapxäna, pä pirqa taypinkkisa uka punkunjama, ukatsti Jordán qhirwa tuqir sarkis uka thakhinjam jaltxapxäna.

5Ukampis Babiloniankir soldadonakax Sedequías reyiruw arktapxäna, ukatsti Jericó pamparuw jikxatapxäna. Katuntasinsti Nabucodonosor reyin nayraqataparuw irpapxäna; uka reyisti Riblá sata uka chiqankaskänwa, Hamat sata uraqina. Ukan Nabucodonosor reyix mä juchañchäwi mistuyäna: pachpa Sedequiasan uñjkataw wawanakaparux p'iqi khariqas jiwarayäna, ukhamaraki Judá uraqin apnaqapkän taqi uka jach'a jilïrinakaparusa.

7Sedequías reyirusti nayranakap apsuyañatakiw arsurakïna, ukat Babiloniar cadenanakampi ñach'antata apayañataki.

8Babilonionakasti reyin utaparu, markan utjkis taqi utanakarus ninampiw phichhantapxäna, Jerusalén markan pirqanakapsti q'al allinukupxarakïna.

9Qhiparusti, Nebuzaradán sata uñjirinakapan jach'a jilïripasti, khitinakatix markar qhiparapkatayna ukanakarux katuntat apxäna, uka kipkarak kawkïrinakatix babilonionakar jaqkattxapxatayna ukanakarusa.

10Judá uraqirux kawkïrinakatix jan kunan jaqinakäpki ukanakarukiw jaytanukuwayxapxäna, jupanakasti uva yapunaka, yapuchasiñatak uraqinak katuqapxarakïna.

11Babiloniankir Nabucodonosor reyix Nebuzaradán sata uñjirinakan jilïriparux akham arunak Jeremías tuqit churarakïna:

12“Jeremiasarux juma kipka uñjam, janirak kuna ñanqhsa luramti, jan ukasti taqi kuntix maykätam uk churam” sasa.

13Ukhamasti Nebuzaradán chachaxa, Nebusazbán chachampi chika, Nergal-sarézer sata jach'a jilïrinakampi chika, ukhamaraki Babiloniankir reyin taqi jach'a jilïr yanapirinakapampi kunaw,

14Jeremiasarux uñjirinakan uta anqapat irpsuyanipxäna, ukatsti Ahicam jaqin Guedalías yuqaparu, khititix Safán jaqin allchhipäki ukaruw uñjañapatak katuyapxäna, ukatsti utaparuw irpxapxäna. Ukhamat Jeremiasax markan utjir jaqinakampi chika jakasiñatak qhiparxäna.

15Jeremías profetax uñjirinakan uta anqapan katuntatäskän ukapachaw Tatitux jupar parläna, akham sasa:

16“Saram, ukatsti Ébed-mélec sata uka etiope jaqir sarakim: ‘Israelan taqi ch'amani Tatitu Diosapax akham siwa: Kuntix aka markatak arskta uka arunak phuqhapunïwa, ukasti uka markan jan walt'añapatakïniwa. Kunapachatix taqi ukanakax luraskani ukkhasti jumax ukankaskarakïtawa.

17Ukampis axsarkta uka ñanqha jaqinakar jan jalt'añamatakix nayaw jumarux imarakïma. Naya, Tatituw uk arsta.

18Nayaw jumarux jiwayatäñat qhispiyäma. Nayar iyawsatam laykusti, janirakiw jiwayapkätamti. Naya, Tatituw uk arsta’ ” sasa.

← Chapter 38 Chapter 40 →