Jeremiah 30

aymara-1997

1Tatitux aka arunak Jeremías profetarux parlxayäna. Sarakïnwa:

2“Naya, Israelan Diosapa Tatituw arsta: Taqi kuntix siskäma uka arunak qillqantam,

3mä uruw purinini, kunapachatix nayax Israel markaxaru, Judá markaxarus apanukutat kuttayankä uka uruxa. Naya, Tatituw uk arsta. Nayaw jupanakarux kawkïr uraqtix nayra awkinakapar churkta uka uraqir kuttayanxä” sasa.

4Akapï Israel markataki, Judá markataki Tatitun arsutanakapaxa.

5Tatitux akham siwa: “¡Axsarañat warariñanakaw ist'asi, axsarañat mayjt'asiñanakampi!

6Jiskt'apxam, ¿mä chachax wawachasispati? ¿Kunatarak chachanakarusti wawachasiñatak q'iwisipkaspa ukham uñjtsti? ¿Kunatarak taqinis q'illu tukupxisti?

7¡Mä axsarkañ uruw jak'achasini, uka urjamasti janiw yaqha urux utjkiti! Uka urusti Jacobun markapatakix mä llakiskañ urüniwa, ukampis nayaw jupanakarux qhispiyä.

8Naya, taqi ch'aman Tatituw arsta: Markaxarux t'aqhisiñat qhispiyä, janiw mayampis yaqha markankir jaqinakax t'aqhisiykxapxaniti.

9Jupanakasti naya Tatitu Diosaparuw yupaychapxitani, Davidaruw luqtapxarakini, khitirutix nayax reyit utt'aykä ukaru.

10“Naya, Tatituw arsta: Israel marka, nayan luqtirixa, jan axsaramti. Jumampiru, wawanakamampirux Babilonia markan t'aqhisiyañanakat nayaw qhispiyapxäma. Ukatsti jan khitin mulljayata sumakiw jakasxapxäta.

11Naya, Tatituw uk arsta, nayaw jumampïskta jumar qhispiyañataki. Kawkïr markanakarutix ananukkäyäsma uka markanaksti t'unjarakïwa. Ukampis jumarux janiw t'unjkämati; jan ukasti juchamatjamak mutuyäma, juchamatsti mutuyapunirakïmawa.”

12Tatitux siwa: “Chhuxrimax jan qullkayawa, usumatakix janiw qullax utjkiti.

13Janiw khitis jumat llakirix utjkiti; janiw khitis chhuxrinakam qullt'irix utjkiti, janirakiw qullañjamäktasa.

14Jumar munir markanakax apanuktamwa; janiw jumat amtaskxapxiti. Nayaw jumarux ukham chhuxriñchsma, uñisirimäkiristsa ukhama, walja jach'a juchanak luratamatxa, jan khuyapt'ayasisaw mutuyäma.

15¿Kunatarak uka chhuxrinakamat ayqtasti? Usuyasitamax jan qullkayawa. Walja jach'a juchanak luratamat ukham mutuysma.

16Ukampis jumar manq'antirix, manq'antatäniwa, taqi uñisirinakamasti jayar apanukutäniwa; jumar lunthatirinakasti, lunthatjatarakïniwa.

17K'umar sarnaqasiñ kuttayxäma, chhuxrinakam nayaw qullt'xäma, uñisirinakamax qawqhas parlaskpan: ‘Apanukut marka’ sasa. Naya, Tatituw uk arsta.”

18Tatitux siwa: “Israel markan sarnaqäwipxa, sumaruw tukuyxä, markapatsti khuyapt'ayasïwa; Jerusalén markax wasitat sayt'ayatäxaniwa, reyin utanakapas wasitat utacht'atäxaniwa.

19Marka taypinsti, yuspagarañ q'uchunaka, kusisiñat arnaqasiñanakaw ist'asini. Jupanakax walja wawanakanïpxaniwa, walja jaqinakan markaw tukxani; mä askin uñjat markaw tukxarakini.

20Israel markankirinaka, jumanakax aytat markat uñt'atäxapxätawa, nayaw jumanakarux ch'ama kuttayxapxäma. ¡Taqi uñisirinakamarusti mutuyarakïwa!

21Pachpa marka taypit mayni jilïrix mistuni, jupanak taypit jupanakar apnaqirix mistuni, ukatsti nayaruw jak'achasiyanï; ukampis, ¿khitis nayar jak'achasiniñ munaspa? Jupanakax markaxäniwa, nayasti Diosaparakïyäwa. Naya, Tatituw uk arsta.”

23Tatitun phiñasiñapax jach'a thayar uñtatawa, mä jach'a tutuka thayjama, qhuru jaqinakxaruw muyxattaraki.

24Tatitun phiñasiñapax janiw tukuskaniti, jupan taqi amtäwinakap phuqhañapkama. Mä uruw jumanakax taqi akanak amuyt'apxäta.

← Chapter 29 Chapter 31 →