Jeremiah 28

aymara-1997

1Uka pachpa marana, phisqïr phaxsina, Sedequiasax Judá uraqin pusi mara marka apnaqkän ukapachaw, Gabaón markankir Azur jaqin Hananías sat profeta yuqapax sacerdotenak nayraqatana, taqi jaqinak nayraqatan Tatitun utapan Jeremiasar parläna, akham sasa:

2—“Israelan Diosapa taqi ch'aman Tatitux siwa: ‘Babilonia markan reyipan taqi munañap apaqäwa,

3akat pä mararusti kuna yänaktix Babiloniankir Nabucodonosor reyix templot apaskäna taqi ukanak aka chiqaruw kuttayanxarakï.

4Uka kipkarakiwa, Joacín jaqin yuqapa, Judá uraqin Joaquín reyiparus aka pachparu kuttayanxarakï, Judá uraqita Babilonia uraqir apatäpkän taqi uka jaqinakasa kuttanxapxarakiniwa. Jïsa, nayaw Babilonia uraqinkir reyipan munañap tukjä. Naya, Tatituw uk arsta.’ ”

5Jeremías profetasti Hananías profetarux Tatitun utapan sacerdotenak nayraqatana, taqi jaqinak nayraqatan akham säna:

6—¡Jïsa, añchakit Tatitux ukham luraspa! ¡Añchakit Tatitux, kuna arunaktix siskta ukanak phuqhaspa, taqi kunanakatix Tatitun utapat apatäki uka yänaksa aka chiqar kuttayanitäxarakispa, taqi khitinakatix Babiloniar katuntat apatäpki jupanakas kuttanxapxarakispa!

7Ukampis aka arunak ist'am, taqi jumanakasa uka arunak ist'apxarakim:

8Kawkïr profetanakatix nayra pachan utjkäna, janïra jumas, nayas yurkäyätan ukapacha; ukanakasti nuwasiñanaka, t'aqhisiñanaka, kunayman usunakan utjañap yatiyapxäna, walja jach'a ch'amani markanakataki.

9Ukampis kunapachatix mä profetax sumankañ yatiyi, ukatsti uka yatiyatanakapax phuqhasi ukkhakiw, Tatitun jupar khithanitap yattan —sasa.

10Ukhamasti Hananiasax Jeremiasan kunkapat uka yuku apaqxasin, jisk'a jisk'a tukjäna,

11ukham lurkasasti taqi jaqinak nayraqatan sarakïna: —Tatitux akham siwa: ‘Uka kipkarak akat pä mararux Babiloniankir Nabucodonosor reyin ch'amapsa, munañapsa taqi markanakat apaqxasin t'unjarakï’ sasa. Ukatsti Jeremías profetax sarawayxänwa.

12Mä qawqha pachatsti, Hananiasax Jeremiasan kunkapat yuku apaqasin t'unjkän uka qhipatsti, Tatitux Jeremías profetaruw parlarakïna akham sasa:

13“Hananiasan ukar saram ukatsti sarakim, naya Tatituw sista: ‘Lawat lurat yuku jisk'a jisk'a t'unjtaxa, ukampis jichhax nayaw jumatakix hierrot lurat mä yuku wakicharapisksma.

14Naya, Israelan Diosapa taqi ch'amani Tatituw arsta: Taqi aka markanakan kunkanakapxarusti nayaw hierrot lurat mä yuku uchta, ukhamat jupanakan Babiloniankir Nabucodonosor reyir t'aqhisit luqtapxañapataki. Ch'uminkir animalanaksa jupan amparaparuw katuyta’ ” sasa.

15Ukapachaw Jeremías profetax Hananías profetar säna: —¡Hananías, aka arunak ist'am! Tatitux janiw jumar khithanktamti, jumasti aka markarux k'ari suyt'äwi arunak yatiyasktaxa.

16Ukat Tatitux jichhax saraki: ‘Jïsa, khithämawa, ukampis aka uraqit chhaqtañamatakiw khithäma. Arunakamampiw aka markarux nayatak sayt'asir tukuytaxa. Ukat aka mara janïra tukuskipan jumax jiwäta’ —sasa.

17Hananías profetasti uka pachpa marana, paqallqu phaxsi saraqataruw jiwxäna.

← Chapter 27 Chapter 29 →