Jeremiah 21

aymara-1997

1Sedequías reyix Malquías jaqin Pashur yuqapampiru, Maasías jaqin Sofonías sacerdote yuqapampiruw Jeremiasan ukar khithäna akham sasa: “Babiloniankir Nabucodonosor reyiw nanakampi nuwasiñ muni. Achikt'asipxsmawa, Tatituruy nanakar yanapt'añapatak mayirapipxita, inampis Tatitux mä muspharkañ lurañ munaskaspa, ukhamat Nabucodonosor reyin aka chiqat sarxañapataki” sasa. Ukhamasti Tatitux Jeremiasaruw parlxayäna,

3Jeremiasasti Sedequías reyin khithatanakaparux aka arunak sarakïna: “Sedequiasarux akham sapxam:

4Israelan Tatitu Diosapax akham siwa: ‘Babiloniankir reyisa, soldadonakapasa Jerusalén markar muyuntasaw nuwantaski. Ukham nuwantatasti, kawkïr soldadonakampitix jumanakax nuwantapkta ukanakax qhiparuw jitt'apxani, ukatsti pachpa marka taypiruw imantasipxarakini.

5Ukampis naya kipkaw jumanakar nuwantapxäma, wali jach'a ch'amampi, jach'a aqkir phiñasiñaxampi.

6Aka markankir taqi jaqinakarusti, uywanakarusa mä jach'a usumpiw jiwarayä.

7Uka qhipatsti, Judá uraqinkir Sedequías reyiru, taqi jilïr yanapirinakaparu, khitinakatix usunakana, nuwasiñanakana, mach'anakan utjatapat jan jiwarapki taqi ukanakaruw Nabucodonosor reyin amparapar katuyarakï, ukhamarak yaqha uñisirinakapan amparaparusa. Jan jumanakat khuyapt'ayasisaw uka reyix espadampi jiwarayapxätam. Naya, Tatituw uk arsta.

8“ ‘Aka markankirinakarusti naya, Tatitun arsutax sarakim: Nayax jumanakarux pä thakhi ajllisipxañamataki uskurapipxsma: Jakañ thakhimpi, jiwañ thakhimpi.

9Aka markar qhiparirinakax, nuwasïwina, jan ukax manq'atjama, jan ukax usumpiw jiwarapxani. Ukampisa, kawkïrinakatix babiloniankirinakar katuyasxapxani ukanakasti, janiw jiwarayatäpkaniti.

10Nayasti aka markxarux aski lantxa, ñanqha apaniñ amtta. Aka markxa Babiloniankir reyiruw katuyä, jupasti ninampiw aka markxa phichhantani. Naya, Tatituw uk arsta.

11“ ‘Judá uraqinkir reyin utaparu, David reyit saraqirinakarusa, nayan sutixar akham sarakim: ‘Tatitun arunakap ist'am: Sapa urus kunatix chiqapäki uk lurarakim; t'aqhisiyatanakarusti t'aqhisiyirinakapat qhispiyam, ukham jan wali luratanakamat phiñasiñaxax ninjam aqtaspa, jan khitinsa jiwaraykayaw nakharakispa.

13‘Jerusalén markan jakirinaka, nayax jumanakatakix wali phiñasitätwa. Jumanakasti sapxtawa: ¿Khitis nuwantitaspa? ¿Khitis imantasitäktan ukkhakamax purkatanispa? sasa.

14Nayasti luratanakamarjamaw mutuyapxäma; ch'uminakamarusti ninampiw phichhkatä, uka ninasti taqi uksa tuqinak nakhantani. Naya, Tatituw uk arsta.’ ”

← Chapter 20 Chapter 22 →