Jeremiah 16

aymara-1997

1Tatitux nayaruw parlxayitu, ukatsti sarakituwa:

2“Aka markanxa, jan jaqichasimti, janirak wawanakanïmsa.

3Naya, Tatituw yatiyäma kunäkanitix aka markan yurir wawanakatakixa, awkinakatakisa ukanaka.

4Jan qullkaña usunakampiw jiwarapxani, janiw khitis jupanakat jachkaniti, janirakiw khiti imt'iris utjkaniti; q'añu t'unanakjam uraqin wartatäpxaniwa. Nuwasiñampi, manq'at jiwarañampiw jupanakar tukjani, janchinakapasti siwiq'aranakana, monte animalanakan manq'antatarakïniwa” sasa.

5Tatitux sarakituwa: “Maynin jiwatap layku lutt'atäsipki uka utarux jan mantamti; uka jiwatat jan jachamti, janirak llakisiñamsa jupan jiwatapat uñacht'ayamti. Aka markatsti suman sarnaqasiñaxa, munasiñaxa, khuyapayasiñaxa q'al apaqxta. Naya, Tatituw uk arsta.

6Aka markanxa jisk'as jach'as taqiniw jiwarapxani; janiw khitis jupanakarux imt'kaniti, janiw jachapkanisa, janirakiw janchinakapsa chhuxriñchasipkaniti, ñik'utanakapsa mururasipkaniti jupanakan jiwarapxatapatxa.

7Janiw khitis uka jiwaratanakan wila masinakapar chuymachañatakix, manq'äwinak wakichkaniti, uka jiwatax pachpa awkipa jan ukax taykapäskpasa.

8“Janiraki jach'a manq'äwi utjki uka utarus mantamti, jupanakampi chika qunt'asisin manq'añataki, umañataki.

9Naya, Israelan taqi ch'aman Dios Tatitupasti sistwa: Nayaw aka markan phunchhäwinaka, kusisiñanaka, jaqichasiñ q'uchunaksa q'al chhaqtayä. Taqi ukanaksti jumanak pachpaw uñjapxarakïta.

10“Kunapachatix aka arunak jaqinakar yatiykäta ukapachasti, jiskt'apxarakïtamwa: ‘¿Kunatsa Tatitux nanakatak uka jan walt'añ apayani? ¿Kuna jan walsa lurapxtxa? ¿Kuna juchsa Dios Tatitu nayraqatan lurapxtxa?’ sasa.

11Jumasti jupanakarux sarakim: ‘Tatitux siwa: Jumanakan nayra awkinakaman nayar apanukusin yaqha diosanakar killt'asis yupaychapxatapat taqi akanakax juti; nayarusti apanukupxitänwa, janirakiw kuntix nayax jupanakar siskäyäta ukanak phuqhapkänti.

12Jumanakasti uka nayra awkinakamat sipansa juk'ampi jan walïpxtawa, sapa maynis chuymapan jan wali amtatanakaparukiw arki, janirakiw nayarux ist'kituti.

13Ukatpï jichhax aka uraqit jaya markar apayapxämaxa, kawkïr marktix jumanakasa, nayra awkinakamasa jan uñt'apkäna ukaru, ukansti uruy arumaw yaqha diosanakar yupaychapxäta, nayasti janiw jumanakat khuyapt'ayaskarakïti.’

14“Naya, Tatituw uk arsta: Pachasti purininiwa kunapachatix jan siskxapxäta: ‘Israelitanakaru Egiptot irpsunki uka Diosax jach'añchatäpan’ sasa;

15jan ukasti sapxätawa: ‘Israelitanakaru Asirio markata, Babilonia markata, yaqha markanakaru ananukutat kuttayankistu uka Tatitux jakaskiwa’ sasa. Nayaw jumanakarux uraqimar kuttayanxapxäma, kawkïr uraqtix nayra awkinakamar churkta ukaru.

16Tatitusti sarakiwa: “Nayax walja uñisirinak khithanï, jupanakaw israelitanakar katurapxani. Ukatsti israelitanakar katurapxañapatakix jiwarayirinak waljani khithanirakï, jupanakaw taqi israelitanakarux qullunak tuqita, qarqa p'iyanakat wayuranipxani.

17Nayasti taqi jupanakan luratanakap uñjtwa; janiw kuna luratanakapas nayat imt'askiti, juchanakapas janirakiw nayan nayraqataxat imt'askaspati.

18Nayraqatax mä ukkhampi jupanakarux mutuyä ñanqhanaka, juchanak lurapxatapata, uka axtaskañ diosanakapampisti nayan suma uraqix q'añuchapxatapata, kawkïr uraqtix jupanakar churkta uka uraqinsti nayax axtaskta ukanak lurapxarakïna.”

19Tatay, nayar ch'am churiri, nayar arxatiri; jan walt'añ pachansa nayar imirïtawa; aka uraqi tukusitpach markanakax juman ukaru jutapxani, ukatsti sapxarakïtamwa: “Nanakan awkinakaxax, k'ari diosanaka, jan ch'amani, jan kunatak inamay diosanakak katuqapxäna.

20¿Mä jaqix pachpa diosanakap lurasispati? ¡Ukhamasti uka diosanakax janiw chiqäpkiti!”

21“Ukatpï jichhax mäpita jach'a ch'amax uñacht'ayäxa; ukhamat yatipxani nayan sutixan Tatitütapa.”

← Chapter 15 Chapter 17 →