Isaiah 60

aymara-1997

1Jerusalén, sartasim, k'ajtam, qhanamasti niyaw purinxi, Tatitun k'ajkir kankañapax jumxan qhani.

2Aka uraqirusti ch'amakaw muyunti, markanakarus aruma ch'amakaw muyunti, ukampis Tatituw jumxan qhanani, jumxanarak Tatitun qhanapax uñstani.

3Markanakax uka qhanamaruw jutapxani, reyinakas qhantati qhanamaruw jutapxani.

4Taqi tuqi uñatatasim, juman ukar jutañatakix taqiniw tantacht'asipxi. Yuqall wawanakamax jayatpach jutxapxani; imill wawanakamas amparar ichunitäpxaniwa.

5Quta tuqinkir markanakan qamir yänakap apanirapipxätam, markanakan qamir yänakap katuyapxarakïtam, jumasti, ukanak uñjasax walpun kusisïta, chuymamas kusisiñan phuqt'atäniwa.

6Walja camello tamanakan phuqhantataw uñjasïta, ukanakasti Madián, Efá uka chiqanakat jutapxani; Sabá tuqinkirinakasti taqiniw jutapxani quri, incienso ukanak apt'ata, ukatsti Tatitun suma luräwinakap yatiyapxani.

7Quedar tuqinkir taqi uywa tamanakasti jumankaniwa, Nebaiot chiqankir urqu ovejanakas jumankaniwa, uka urqu ovejanakampiw Tatiturux altarapan mä suma waxt'äwi churäta, jupasti utapxa juk'amp sum tukuyani.

8¿Khitinakas qinayar uñtata jalapki, palomanakar uñtat utanakapar jalapki ukanakaxa?

9Ukanakasti qutanjam jutir barconakawa, mayakiw Tarsisankir barconakamp irpat jutapxi, jayatpach wawanakam irpanxapxi, quripas qullqipas apt'ata, Tatitumaru, Israelan Qullan Diosaparu jach'añchäwi churasa, khititix jumarux wali sum tukuyktam ukaru.

10Yaqha markankir jaqinakaw pirqanakam wasitat sayt'ayapxani, reyinakapasti jumaruw luqtapxätam; Tatitux phiñasiñapan mutuykchïyätam ukasa, jichhax munasiñapan jumarux khuyapayasiraktam.

11Punkunakamasti jist'aratapunïniwa, janirakiw arumasa, urusa jist'antaskaniti, ukhamat markanakan qamir yänakap jumatak apaniñapataki, reyinakas jilïrinakapampi uka chiq mantapxañapataki.

12Kawkïr markanakatix jumarux jan luqtapkätamxa; uka markanakax q'ala tukjatäpxaniwa.

13Tatitusti Jerusalenarux siwa: “Líbano qullunkir qamir yänakasti, pinonakasa, abetonakasa, ciprés sat quqanakasa, nayan utax k'achachañatakïniwa, kawkharutix nayax qunt'askta uka chiq jach'achañataki.

14Khitinakatix t'aqhisiyapkäyätam ukanakan wawanakapasti, juman nayraqatamaruw alt'at jutapxani, khitinakatix jisk'achapkäyätam ukanakasti, kayunakamaruw killt'asipxani, sapxarakïtamwa: ‘Tatitun markapa’, ‘Israelan Qullan Diosapan Jerusalén markapa’ sasa.

15Janiw mayampis uñisita, sapaki apanukutäkxätati, jan ukasti nayaw jumarux wiñayatak k'ajkir tukuyäma, wiñayatak kusiskañaraki.

16Markanakasti suma manq'anakap churapxätam, reyinakasti qamir kankañanakap apanipxani; ukapachaw jumanakax yatipxäta naya, ch'amani Tatitun Israel markar qhispiyirïtaxa.

17“Bronce lantix quri churäma, hierro lantisti, qullqi churarakïma, lawa lantix, bronce churäma, qala lantisti, hierro churarakïma. Sumankañampiw apnaqayäma, kunatix chiqapäki ukaw irpätam.

18Uraqimansti ch'axwañanakax janipuniw mayampis ist'askxaniti, janirakiw t'unjatäñampi, aynacht'añampix utjkxaniti, jan ukasti pirqanakamarux: ‘Qhispiyasiña’ sasaw sutichäta, punkunakamarusti: ‘Yupaychaña’ sasaw suticharakïta.

19“Urusti janiw intin qhanañapax munaskxaniti, arumasti janirakiw phaxsin qhanañapas munaskxaniti, jan ukasti naya, Tatitu Diosamaw juman wiñay qhanamäyäxa.

20Intix janipuniw ch'amakt'kaniti, phaxsin qhanapas janirakiw chhaqtkaniti, naya, Tatituw juman wiñay qhanamäyäxa, llakisiñ urunakamas tukusxaniwa.

21“Markamankir taqi jaqinakasti aski jaqinakäniwa, wiñayatakiw uka markax jupanakankxani; kawkïr alirutix nayax ayruntkäyätxa ukat sartirïpxtawa, amparaxampi uskutäpxtawa, ukhamat nayan jach'a kankañax uñacht'ayañataki.

22Aka mä juk'a jaqinakasti waranqanakaruw tukupxani, aka mä qawqha jaqinakasti mä jach'a markaw tukuni. Nayätwa Tatituxa, nayaw taqi ukanak pachapar phuqhasiyä.”

← Chapter 59 Chapter 61 →