Isaiah 6

aymara-1997

1Rey Oziasax jiwkän uka maraxa, Tatituruw uñjta, mä jach'a qunuñan qunt'ata; isipas jupan utapar phuqhantatänwa.

2Ninjam k'ajkir serafines satanakaw jupa patxankapxäna. Sapa mayniw suxta chhiqhankamäpxäna. Pä chhiqhampix ajanup imantasipxäna, payampisti, jikhanit aynacharuw imt'asipxäna; payampisti jalnaqapxarakïnwa.

3Maynit maynikamaw jach'at arsupxäna: “Qullana, Qullana, Qullanawa taqi ch'amani Tatituxa; taqi aka uraqisti jupan jach'a kankañapampi phuqhantatawa” sasa.

4Uka arunak ist'asasti, Tatitun utapan punkunakapax khathatïnwa, jiwq'irakiw phuqharanttäna.

5Nayasti sarakïyätwa: “¡Ay, kunakïkan nayatakixa, jichhax jiwapunïwa! Nayraxampiw taqi ch'amani Tatitu Reyirux uñjta, nayasti jucharar jaqïtwa, jucharar jaqinak taypin jakarakta” sasa.

6Ukapachaw ninjam k'ajkir serafinanakat maynix nayan ukar jalanïna. Altarat aptanit mä nina sank'a tenazanakar achxaruyat apxäsiskäna,

7uka nina sank'ampi lakaxar apxatasasti akham sarakitu: “Aka nina sank'aw laka ispillumar puri. Ukampisti, Tatitux ñanqha luratanakam jichhax apaqxtam, jucha luratanakamas pampachatäxiwa” sasa.

8Ukatsti Tatitun arup ist'ta akham siri: “¿Khitirus khithäxa? ¿Khitis nayat parlir sarani?” sasa. Nayasti saraktwa: “Nayar khithita, nayaw jumxat parlanï” sasa.

9Tatitusti sarakituwa: “Saram, aka markarux akham sarakim: ‘Ist'kasinsa, janiw amuyt'apkaniti, uñjkasinsa, janiw amuyapkaniti’ sasa.

10Aka markan amuyupsa q'al pixtuntam, ukhamat jan amuyt'asipxañapataki, jinchunakapsti llupantam, ukhamat jan ist'apxañapataki, nayranakapsa juykhu tukuyam, ukhamat jan uñjapxañapataki, ukhamat nayan ukar jan kuttanisipkañapataki, nayan jupanakar jan qullaskañaxataki” sasa.

11Nayasti jiskt'araktwa: “Tatay, ¿kunapachkamarakïni ukasti?” sasa. Jupasti sarakituwa: “Kunapachatix taqpach markanakax q'ala t'unjatäkani, uka markanakas jan jaqin jikxatasipkani; utanakas jan mä jaqin uñjaskani, pampanakas ch'usa wasarar tukuyatäkani,

12Tatitusti jaqinakarux yaqha markar katuntat apaykani, aka markas jan mä jaqin uñjaskani, ukkhakamäniwa.

13Inas patak jaqitxa tunkan jilt'chini, uka tunkanimppachaw jiwarayatäni, kunjämatix mä quqax khuchhunukutaxa, k'ullu tunu sapak qhiparki ukhamäniwa.” Ukampis mä qawqha israelitanakax janiw jiwarayatäpkaniti, jupanakat mä jaysasir chiqap markaw jutirin sayt'ani.

← Chapter 5 Chapter 7 →