Isaiah 56

aymara-1997

1Tatitux siwa: “Kunatix aski uñjäwïki uk lurapxam, kunatix chiqapäki uka lurapxam, qhispiyañaxax niya jak'ankxiwa, ch'amaxsa qhispiyañatak uñacht'ayarakïwa.

2Khititix aka kamachinak taqi chuymampi phuqki ukax kusisiñaniwa, Sábado uru jan takisis sum imirix kusisiñaniwa, kuna jan walsa janirak lurkiti ukas kusisiñaniwa.”

3Mayni yaqha markankir jaqitix Tatitur katuyasinixa, janiw sañapäkiti: “Tatitux markapat yaqhachitaniwa” sasa. Janirakiw jan wawan jaqis sañapäkiti: “Nayax mä waña quqar uñtatätwa” sasa.

4Tatitusti siwa: “Taqi aka jaqinakatix nayan sábado urux imapxanixa, munañaxsa phuqhapxanixa, arust'äwinakaxansti sum sayt'asipxanixa,

5nayaw jupanakarux wawanakat sipansa juk'ampi sumanak churä, jupanakan sutinakapasti wiñayataki qillqatäniwa, nayan utaxana, pirqanakax taypinsa; wiñay suti juparux churarakï, janipuniw kunapachas uka sutix chhaqtayatäkaniti.

6Jaya markat jutir jaqinakatix nayar katuyasipxitanixa, nayar arkañataki, nayar munañataki, nayan arkirinakax tukuñapataki, nayan samarañ uruxsa jan takisis imapxani, arust'äwixan sum sayt'asipxani ukapachaxa,

7nayax qullana qulluxaruw jupanakarux irpanï, nayar mayisiñ utaxansti k'uchikïpxaniwa. Altaraxan wilañchanak luqtasitanakapsti katuqarakïwa, nayan utaxax taqi markanakatakix Tatitur mayisiñ uta satäniwa.”

8Kawkïri israelitanakatix jayan apanukutäsipki ukanakaruxa, nayaw kuttayanisin markapar tantachthapxä.” Uk Tatitux arsu.

9Tatitux siwa: Uñisir markanaka, Jutapxam, markaxar nuwantapxam; ch'umi animalanakjam manq'arpayapxam;

10markaxar uñjirinakax juykhur tukutäpxiwa, janiw kunankatsa amuyasipkiti. Taqi jupanakasti jan wajtir anunakjamäpxiwa, ukat jan wajtasiñsa yatipkarakiti; sapürus liwirtasakiw ikirasipki, ikt'añak munasipki.

11Manq'at jiwat anunakjamäpxiwa, janirakiw sisthapipkisa, jan kun amuyiri awatirinakäpxiwa; sapa maynis thakhipanak sarasipki, kunatix jupanakatakix askïki ukak thaqhasipki.

12Ukatsti sapxarakiwa: “¡Jutapxam! Jichhax wal machapxañäni. Qharürus uka kipkarak lurapxañäni, ukat sipansa juk'ampi machjasipxañäni” sasa.

← Chapter 55 Chapter 57 →