Isaiah 47

aymara-1997

1“Babilonia marka, saraqanim, uka qunuñamat saraqanim, aka uraqir qunt'asim. Jumax mä ijma warmir uñtatäxtawa, janiw jichhax mayampsa ‘Suma wawa tawaqu’ sasax sapkxätamti.

2Janirakiw suma yänakan phuqt'ata, jach'a kusisiñanakansa sarnaqkxätati; jichhax irnaqañamaw wakisini. Piqäñ qala katum, ukatsti grano piqam ukhamat jak'unïñamataki, jichhax q'ala tukjatätawa, juma pachpaw kunjäm sarnaqañsa yatïta.

3Janchimas q'alal uñstpan, mä p'inqapuniw chhuxurasiñamas uñstani. Jichhaw jumanakampix phuqsusïxa, janirakiw khitis achikt'asitapampix jark'kitaniti”.

4Jiwasan qhispiyirisa, Israelan Qullan Diosapa, taqi ch'amani Tatitux siwa:

5“Babilonia marka, amuk qunt'asim, ch'amak manqhar qunt'asim, janipuniw jichhax mayampsa ‘Markanakan reyipa’ sasax siskxapxätamti.

6Markaxampi nayax phiñasitäskayät ukkhaxa, naya kipkaw markaxarux mä p'inqa katuyta, ukatsti juman amparamaruw antutta. Jumasti janiw khuyapt'ayaskäyätati, chuymani jaqinakxarusti uka jathi yukum apxattaxa.

7Saraktawa: ‘Nayax wiñayatakiw reinäyäxa’ sasa; janiw taqi ukanakat amuyt'asktati, janirakiw kunjämarus tukuyapxani uksa lup'ktati.

8Babilonia marka, jichhax aka arunak ist'am: suma k'achachatäñ munir warmi, qunuñaman k'uchikiw qunt'astaxa, chuyma manqhamansti saraktawa: ‘Nayakïtwa, nayat sipan yaqhax janiw utjkiti. Janiw nayax ijma warmi uñjaskäti, janirakiw jan wawanis uñjaskäti’ sasa.

9Inas akatjamat jumxarux uka jan walt'añanakax jutchini, inamayäskaniw layqasitanakamasa, ijma warmi, jan wawanakaniw uñjasïta.

10Jumax ñanqha lurañaman wali sum amuyasïyätaxa, sarakïyätawa: ‘Janiw khitis uñjkituti’ sasa. Yatiñ kankañamasa, ch'ikhi kankañamasa jumarux k'arintapxtamwa. Chuymamansti sarakïyätawa: ‘Nayakïtwa, nayat sipan yaqhax janiw utjkiti’ sasa.

11Ukampis jumxarux jan suyktas uka jan walt'añaw jutani, layqasitamampisti janiw jarkt'kätati.

12Uka layqasiñanakam luraskakim, jumax tawaqutpach ukanak lurtaxa, inach uka layqasitanakamax kunatakis walïskani, inach uka luratanakamampix jaqix axsarätam.

13Iwxirinakamax waljanipunïnwa. ¡Jichhax warawara uñch'ukirinakax uñstanipxpan, khitinakatix warawaranak uñch'ukis yatxatapki ukanakaxa, kunatix akat qhiparu luraskani ukanak yatiyirinakasa, khitinakatix jumar qhispiyañ munapktam ukanakas jichhax uñstanipxpan!

14Ukampis uka layqanakax jichhur uñtatäpxiwa, ninarakiw jupanakarux q'al nakhantani; janiw uka ninat qhispipkaniti. Uka ninax janiw aliq sank'ir ninakïkiti, janirakiw aliq junt'urt'asiñ ninjamakïkisa.

15Ukaruw jichhax juman layqanakamax puriwayapxi, khitinakarutix wiñayatak alkataskäyäta ukanakaxa. Sapa mayniw kipka pantata thakhipanjam saranukuwayapxi, janirakiw jichhax khitis jumar qhispiyirix utjkiti.

← Chapter 46 Chapter 48 →