Isaiah 38

aymara-1997

1Uka urunakansti Ezequías reyix walpun usuntäna, ukat Amós chachan yuqapa Isaías profetax uñjir saräna, juparusti sarakïnwa: —Tatitux akham siwa: ‘Kuna iwxanaksa wila masinakamarux iwxt'asiwayxam, janiw qullaskätati, jan ukasti, jiwxätawa’ —sasa.

2Ukatsti Ezequiasax pirqa tuqir uñkatasaw Tatitur akham sasa mayisïna:

3“Tatay, nayax achikt'assmawa, kunjämtix taqi chuymaxampi jumar arksma uk amtasimaya, kunjämarutix jumax munkta ukhamarjam lurkta uksa amtasirakimaya” sasa. Ukatsti Ezequiasax walpun jachäna.

4Tatitusti Isaías profetan

5Ezequiasan ukar sarañapatakiw mayïna akham yatiyiri: “David awkiman Tatitu Diosapax siwa: ‘Nayax mayisitam ist'twa, jachatamsa uñjaraktwa. Ukat tunka phisqan marampi jakañamar yapxatäma.

6Jumarusa, Jerusalén markarusa asirionakan amparapat qhispiyäxa. Nayaw aka markarux arxataskäxa’ ” sasa.

7Isaías profetasti sarakïnwa: —Tatitun chimpupax akäniwa, kuntix jumar arsktam uk phuqhañapataki:

8Ahaz reyin intimpi sarir relojupanxa, ch'iwix tunka chillqinak qhipar jitt'ani. Ukatsti kunjämtix Tatitux siskatayna ukhamapuniw lurasitayna.

9Kunapachatix Ezequías reyix k'umaraptxän ukkhasti aka q'uchu q'ucht'asïna:

10Nayax saskäyätwa: Waynpachakiy jiwawayxchï, jiwatanakax kawkhankapkitï ukkharukiy sarxchï, ukanakxay wiñay jakxchï sasa.

11Sarakïyätwa: Janikiy Tatitur aka uraqin mayampsa uñjkchïti, janirakiy aka uraqin jakirinakarus uñjkchïti.

12Utaxsa t'unthapipxiwa, aparapxarakituwa, awatirinakan chhujllanakapäkaspas ukhama. Jakañaxax mä sawurin sawupäkaspas ukhamänwa, telarat khuchhuqki ukar uñtata. Uruy arumaw t'aqhisiyista.

13Usuñaxansti paqaraw wararta, mä leonas ch'akhanakax t'unarkaspa ukhama. Uruy arumaw t'aqhisiyista.

14Jamach'inakjamaw chhiwiqta, palomanakjamaw ayqt'askta. Nayranakaxas alaxpach uñch'ukkäwix qaritäxiwa. Tatay, t'aqhisiñanakaxatay arxatt'ita.

15¿Ukampis, kamsarakïsti? Jupaxay ukham lurchixa. Nayan t'aqhisitax laykusti, ikis janiw purkxituti.

16Khitinakarutix Tatitux arxatki ukanakax jakapxaniwa, taqi jupanakampiw nayax jakarakï. Jumaw nayarux qullt'asista, jakañsa kutt'ayxarakista.

17Uñtapxam, t'aqhisiñat sipansa, jichhax samarañaw utjitu. Aynacht'añanakatxa, jumarakiw imista, taqi juchanakaxsa pampacharakistawa.

18Sepulturan imantatanakax janiw yupaychapkiristamti, jiwatanakas janiw jach'achapkiristamti, kawki manqhar mantirinakasti janirakiw juman chiqa kankañamarux suyapkaspati.

19Jakirinakakiw yupaychapxiristamxa, kunjämtix jichhürux jumar yupaychksma ukhama. Awkinakax wawanakaparux juman chiqapätam parlapxi.

20Tatituw nayar qhispiyañatakix akankaski. Arpanakas toct'asipxañäni, sapüru sarnaqäwinakasan q'uchusipxañäni. Tatitun utapansa q'uchusipxarakiñäni.

21Isaías profetasti higot mä masa lurt'ayäna, ukampiw reyirux kawkhatix uski ukkhar jawintayäna, reyisti k'umaraptxänwa.

22Ukat Ezequías reyix Isaías profetarux jiskt'asïna: —¿Kuna chimpu tuqis amuyasiristxa Tatitun utaparu nayan sarañaxatakixa? —sasa.

← Chapter 37 Chapter 39 →