Isaiah 36

aymara-1997

1Ezequías reyix tunka pusin mara apnaqkän ukkhaxa, Senaquerib reyiw nuwantir jutäna, jupasti Asiria markan reyipänwa, Judá uraqin ch'amani markanakarusti q'al nuwjäna, atipjasinsti katuntasirakïnwa.

2Laquis siski uka chiqatpach jilïri comandanteparux Ezequías reyin ukar khithanïna, jupasti Jerusalenankänwa. Asirionakan ejercitopax wali ch'amanïnwa, ukatsti Siloé sata uma puña jak'aruw purintapxäna, Isinak T'axsurin thakhipäkis uka chiqaru.

3Ukkharuw Hilquías chachan Eliaquim yuqapax mistsunïna, jupasti Ezequías reyin utap uñjirïnwa, Sebná qillqiri, Asaf chachan Joah yuqapa, khititix reyin qillqiripäki ukanakaw katuqañatak mistunipxäna.

4Asirio oficialasti sänwa: —Aka arunak Ezequías reyir yatiyapxam, uka arunakax Asiria markankir jach'a reyin yatiyäwipawa, sapxarakim: ‘¿Kunatsa jumax jan unxtasta?

5Nuwasïwin atipjañatakix janiw arunakampik atipjkasmati, jan ukasti, mä jach'a ejercitonïñamawa, nuwantañatakis suma wakicht'ataraki. ¿Khitirus alkatasta nayar saykataskañamatakisti?

6Amuyatax Egiptoruw alkatastaxa. Walikiwa. Egiptox nayatakix mä jisk'a p'akit suqusampi sasikiwa, maynitix uka p'akit suqusaru katt'aschixa, uka p'akit suqusax amparaparuw junuranttani. Khitinakatix uka reyir alkatasipki ukanakatakixa, Egiptonkir faraón reyix uka p'akit suqusampi sasikiwa.

7Ukampis jumatix sitasmaxa: Nanakax Tatitu Diosaxaruw katuyasipxta sasaxa, ¿janit Ezequías reyisti uka Diosan altaranakapa, Tatitur yupaychañ chiqanaksa q'al t'unthapiykisti, ukatsti Jerusalenankirinakaru, Judänkirinakarusa, mä altaranak yupaychapxam siskisti?

8Jichhax mä arust'äwir Asiriankir reyimpi mantam, jupax nayan jilïrixawa; nayax pä waranqa caballonak churäma, inach ukanakataki jaqinak jikxatäta.

9Jumatix Egipton yanapap suyasksta ukaxa, may säma: Egipton caballonakapasa, nuwasiñ carronakapas janiw mä juk'a ch'aman soldadoxarus khathatiyañatak ch'amanïkiti.

10Ukhamarus aka marka t'unjiriw nanakax jutapxta, Tatitu Diosaw ukham lurañatak mayipxitu’ —sasa.

11Eliaquim, Sebná, Joah ukanakax asirio oficialarux sapxarakïnwa: —Achikt'asipxsmawa, arameo arut parlt'apxita, nanakax uka arxa yatipxtwa. Hebreo arut jan parlxayapxistati, taqi khitinakatix pirqa patankapki ukanakax parlatas ist'apxiwa —sasa.

12Ukampisa asirio oficialax sänwa: —Asiriankir reyix janiw jumanakan jilïrimar sañatak khithankituti, janirakiw uka arunak jumanakar sañatakis khithankituti, jan ukasti khitinakatix uka pirqa patankasipki uka jaqinakar sañatakiw khithanitu, jupanakax jan manq'añani, jan umañaniw jikxatasipxani. Ukhamïpansti, manq'at awtjayasiñasa, umat pharjayasiñas walipunïniwa, pachpa jamanakap manq'apxani, pachpa chhuxup umapxarakini —sasa.

13Ukatsti uka oficialax sayt'asisin hebreo aruta wali jach'at art'äna: —Kuntix Asiriankir jach'a reyix sapktam uka arunak ist'apxam:

14‘Ezequiasampix jan k'arintayasipxamti, jupax janiw qhispiyapkätamti.’

15Ezequiasatix ‘Diosar jaysañäni, jupaw qhispiyistani’ sapxätamxa,

16juparux jan ist'apxamti. Asiriankir reyix jumanakampi sumar mantiriw khithanitu, ukatsti atipjayasxapxam, ukhamat sapa maynis uva yapunakamata, higo quqanakamatsa manq'asisipkäta, ukhamarak pachpa uma phuch'umatsa umasisipkäta.

17Ukatsti mä markaruw apapxätam, uka markasti jumanakan markamjamarakiwa, trigos uvas wal achuraki, ukan t'ant'a lurapxäta, ukhamarak vino apsupxarakïta.

18Ezequiasatix ‘Tatituw qhispiyistani’ sapxätamxa, jupampix jan k'arintayasipxamti. ¿Yaqha markanakarusti diosanakapax Asiriankir reyin amparapat qhispiyiti?

19Hamat, Arpad, Sefarvaim siski ukanakan diosanakapas janiw Samaria markarux Asiria reyin amparapat qhispiykiti.

20Taqi uka markanakatxa, ¿kawkïri markan diosanakapas Asiriankir reyin amparapat qhispiyixa? ¿Kunjämatarak jumanakan Diosamasti Jerusalenar qhispiyaspasti? —sasa.

21Jupanakasti amukiw qhiparapxäna, janiw mä arsa arsupkänti, reyiw jupanakarux jan kunsa sapxañapatak arsutayna.

22Ukat Eliaquim chachax, khititix reyin utapan uñjirïkäna, Sebná qillqirisa, Joah reyin qillqiripäkäna ukasa, jupanakax llakisiñat isinakap ch'iyanuqasipxäna, ukatsti Ezequías reyir uñstiriw sarapxäna, kuntix asirio oficialax siskatayna ukanak yatiyiri.

← Chapter 35 Chapter 37 →