Isaiah 31

aymara-1997

1¡Ay, kunakïkani, khitinakatix Egiptor yanap mayir sarapki ukanakatakixa, uka walja carronakaparu, caballerianakaparu alkatasipki ukanakatakixa, jupanakax janiw Israelan Qullan Diosapar uñtapkiti, janirakiw thaqhapkisa!

2Tatitumpix janiw khitis phiskaskaspati, jupax khitir jan walt'ayañsa yatiwa, kunapachatix kunsa arsu ukkhaxa, phuqhapuniwa. Tatitux qhuru jaqinakarux t'unjaniwa, ñanqha luririnakar yanapapki ukanakarus tukusiyaniwa.

3Egipcionakax aliq jaqinakakïpxiwa, janiw jupanakax diosanakäpkiti, caballonakapax janchikiwa, janiw wiñay jakirinakäpkiti. Tatitux egipcionakarux mutuyaniwa, khitinakarutix yanap mayipkani ukanakarus mutuyarakiniwa, taqiniw tukusipxani.

4Tatitusti sarakituwa: “Kunjämtix mä leonax mä oveja jiwayixa, ukatsti janiw awatirinakapax axsartaykiti, taqpachanisay tantacht'asiskpan, arnaqatanakapampis axsartayañ munasipkpan, ukhamarakiw taqi ch'amani Tatitux jutani Jerusalén markan jakirinakar arxatiri.

5Kunjämatix mä jamach'ix tapapat jark'aski ukhamarakiw taqi ch'aman Tatitux Jerusalenarux arxatani; markarusti imaniwa, arxataniwa, qhispiyarakiniwa.”

6Israelan wawanakapa, khitirutix chuymap wal ust'ayapkta ukar kuttxapxam.

7Kunürutix jumanakax qurit qullqit lurat diosanakam apanukupkäta, jumanak pachpa lurat diosanakaruxa,

8uküruw Asiria markax atipjat uñjasini, janiw jaqin ch'amap laykuti. Uka nuwasïwix jaqinakaparuw jaltayani, nuwasir waynanakarusti katuntapxaniwa,

9axsarañatsa reyipax jaltxaniwa, jilïrinakapasti wiphalap apanukusaw jaltxapxani. Tatitun mutuyäwipasti niya wakicht'atawa, Jerusalén markan uka uñisirinakapar mutuyañataki.

← Chapter 30 Chapter 32 →