Isaiah 26

aymara-1997

1Uka urunsti Judá uraqin aka q'uchuw q'uchusini: “Mä jach'a ch'amani markaw utjistu; jiwasar qhispiyañataki, Tatituw uka markan jach'a pirqanak sayt'ayi.

2Jerusalén markan punkunakap jist'arapxam, chiqpacha aski markaxa uka punkunjam mantani.

3Tatituw samarañan jakayani khitinakatix jupatakjam tukupkani, ukhamarak jupar iyawsapkani ukanakaru.

4Tatiturupun katuyasipxam, jupaw jiwasan wiñay arxatirisaxa.

5Jupaw jach'a jach'a tukur jaqinakarux liwisiyi, uraqkam liwinukusaw jach'a jach'a tukur markarux jisk'achji,

6ukhamat aynacht'at jaqinakasa, jan kunaninakas jupanakar takichasipxañapataki.”

7Aski jaqinakan sarnaqäwinakapax chiqapawa; Tatay, jupanakan thakhipsa jumaw khuskhachtaxa.

8Tatay, juman kamachinakarjam sarnaqasaxa, nanakax askin jikxatasipxta. Chuymanakaxasti jumatak lup'iñ munaski.

9Arumanakas taqi chuymaxampiw jumat llakista; taqi chuymaxampiw thaqsma; kunapachatix jumax taqi aka uraqpachar uñjkäta ukkhaxa, jaqinakax kunatix chiqapäki uk yatipxani.

10Ñanqha jaqinakat khuyapayaskäta ukasa, jupanakax janipuniw chiqapäñ yatiqapkaniti; aski jaqinakan uraqipansti sinti qhurunakaw tukupxi, janirakiw Tatitun jach'a kankañapsa yäqapkiti.

11Tatay, jupanakatakix mutuyäwimax wakichatawa, ukampis jupanakax janiw amuyasiñ munapkiti; kunapachatix juman markamar wali munasitam uñjapkan ukkhaxa, jupanakax mä p'inqaw uñjasipxani. ¡Phiñasiñamampiy jupanakar tukjam!

12Tatay, jumaw nanakar aski kankañ churapxista; chiqpachansa juma sapakiw taqi lurañanakax lurtaxa.

13Nanakan Tatit Diosaxa, yaqha diosanakaw nanakarux apnaqapxitäna, ukampisa jichhax jumakïtaw nanakan Diosaxaxa.

14Uka yaqha diosanakax janiw jakañanïpkiti; jiwarat diosapxiwa, janirakiw unxtapkisa, jumaw jupanakarux mutuytaxa, tukjaraktasa, jan mayampi amtaskañatakiw tukjtaxa.

15Tatay, jumaw markamarux jiltaytaxa; juman askimatakiw jiltaytaxa, taqi qurpanakapsa jithitatayaraktawa.

16Tatay, kunapachatix mutuyapkista ukkhaxa, usuchapkchista ukkhasa, jumarukiw makhatanipxsma.

17Tatay, juman mutuyäwimax walpin t'aqhisiyapxitu; nanakan ayquñanakaxax wali jach'apunïnwa.

18Ukampis uka t'aqhisiñax janiw kuna askinaksa apankiti. Markaxan atipt'atapatsa janiw kusisiñ churapktti, janirakiw walja wawanakanïpxataxatsa kusisiñ churapktti.

19Ukampisa juman markamäpxtwa, t'unjat uñjasitäpkta ukasa, wasitat jakatatasipkakïwa. Jumaw jakañampi, kusisiñampi aka jiwat markarux phuqhantäta.

20Nayan markaxa, utamar mantam, utaman punkupsa jist'katasinim. Tatitun phiñasiñap mäqipañapkamax imantasim.

21Tatitusti jach'a utapat mistunini, aka uraqin jakir jaqinakaruw juchanakapat mutuyani. Qhurumpi jaqinakar jiwayirinakasti mutuyataw uñjasipxani.

← Chapter 25 Chapter 27 →