Isaiah 24

aymara-1997

1Uñtapxam, Tatitux aka uraq tukjaniwa, q'al allthapini, mayjt'ayaniwa, jaqinakarusti uksar aksaruw ananukuni.

2Taqiniruw uka kipka lurani: Sacerdoterusa, markachirinakarusa, uywirinakarusa, uywatanakarusa, alasirinakarusa, aljirinakarusa, mayt'irinakarusa, mayt'asirinakarusa, qamirirusa, jan kunanirusa.

3Uraqix q'ala tukjatäniwa, q'ala lunthatjatäniwa. Tatituw ukham lurañatak arsu.

4Uraqix q'alaw wañsuwayxi, taqi akapachaw ankuntatjam tukuwayxi, alaxpachas, akapachas wali llakitawa.

5Uraqisti jaqinakapan takisitawa, kamachinak jan phuqhatap layku, arsutanakaparus janiw jaysapkiti, Tatitun wiñayatak arust'äwipsa p'akintapxarakiwa.

6Taqiniw juchañjasipxi; ukat aka uraqix ñanqhachat uñjasi. Juk'anikiw jakañan qhiparapxi, markasti mä ch'usa wasarar tukutawa.

7Uva yapunakax q'ala wañsutawa, ukat vinox jan utjkxiti. Khitinakatix kusisiñat q'uchupxirïn ukanakax, jichhax llakisiñatsa jiwirpachäpxiwa.

8Tamboranakampi, arpanakampi kusisiñas tukusxiwa, kusisiñat uxuñanakasa tukusxarakiwa.

9Janiw jichhax q'uchuñanakamp chika vino umañax utjkxaniti; umañanakas umirinakatakix k'allk'uw tukxani.

10Jan wali sarnaqir markax q'ala aynacht'atawa, janiw mä utarus mantañjamäkiti.

11Jaqinakasti marka thakhinakan vinon pist'atapat jachapxi; taqi kusisiñas tukusiwayxiwa, aka uraqitsti apanukutäxarakiwa.

12Markasti q'ala tukjatapuniwa, punkupas jisk'a jisk'a t'unjatawa.

13Aka uraqin utjir taqi markanakanxa ukhamarakïniwa, kunjämatix aceitunanakax thalsutax willirtanix ukhama, jan ukax uva apthapiñ tukutatxa, pallsuñsa munasipkaki ukhama.

14Tatitun jach'a kankañap uñjasaxa, qhiparirinakax kusisiñat arnaqasipxani, inti jalanta tuqitpach wararinipxani.

15Ukhamarakiw inti jalsu tuqinsa, jach'a quta taypin utjir markanakansa, Tatitu, Israelan Diosaparuw jach'achapxani.

16Uraqi tukuyapatpach q'uchutanakapax ist'asi: “Aski jaqix jach'ar aptatäpan” sasa. Ukampis nayax saraktwa: ¡Ay kunas akaxa, kunas akaxa! ¡Ch'uxña lurir jaqinakax jach'a ch'uxñpin lurapxi!

17Aka uraqin jakir jaqinakasti jiwayañ animalanakjam arknaqatäpxaniwa, mä jach'a p'iyaru, jan ukax mä sipitar jalt'irjamäpxaniwa.

18Jiwayirinakat jaltirixa, p'iyaruw jalantani, uka p'iyat misturisti sipitaruw jalt'ani. Alaxpachatsti jallux walipuniw purxatanini, aka uraqin qalltanakapas khathatirakiniwa.

19Aka uraqisti axsarkañaw khathatini, khathatisinsti jisk'a jisk'aw tukusini.

20Mä machat jaqjamaw aytinkini, mä thantha chhujllar uñtataw khathatini. Juchanakapasti jupxarux walpun jatxattani, liwisiniwa, ukatsti janirakiw mayampsa sartkxaniti.

21Uka urunsti, alaxpachan utjir ch'amaninakaru, aka uraqinkir reyinakarusa, Tatitux mutuyaniwa,

22mayjaruw tantachthapini, ukatsti mä mutuñäwjaruw jaquntani, ukan katuntat uñjasipxani, ukatsti jaya urunakat mutuyaskarakini.

23Kunapachatix taqi ch'aman Tatitux reyjama taqi kunsa lurkan ukkhaxa, Sión qullunsa, Jerusalén markansa, intis phaxsis ch'amakt'aniwa, markapankir jilïrinakasti, Tatitun qhapaq kankañap uñjapxani.

← Chapter 23 Chapter 25 →