Isaiah 22

aymara-1997

1Unañchäwinak uñjañ qhirwataki profecía arunaka: ¿Kunas kamachi, taqinis uta patarkamakis mistupxixa?

2Markasti ch'axwañampi, uxuñanakampi phuqhantatawa, aka markax kusist'añak munaski. Juman jiwirinakamax janiw espadampi jiwayatäpkiti, janirakiw nuwasïwinsa jiwapkiti;

3jilïrinakamax taqiniw jaltxapxi, mich'inakat jaltapxatapatsti taqiniw katuntatäpxi. Wali ch'aman jaqinakamasti jayaruw jaltxapxi, uka kipka katuntatäpxarakiwa.

4Ukat sistxa: Nayat jithiqtapxam, chuymas kawkst'ataw jachañ munta; markaxan aynacht'atapatsti jan chuymachapxistati.

5Taqi ch'amani Tatituw uka axsarkañ mutuyäwinak jiwasxar apayani. Unañchanak uñjañ qhirwanxa, t'unjatäñampi, mulljasiñampik uñjta. Uñisirinakaw jach'a pirqanakas tinkuräwayi, qullunakansti arnaqasitanakapaw ist'asi.

6Elam, Quir markanakankir soldadonakaxa, nuwasiñatakix carronakapxat purintanipxi, jark'aqasiñanakampi, mich'inakamp nuwantañat wakicht'ata.

7Jerusalén markan suma qhirwanakapasti nuwasiñ carronakamp phuqhantatawa. Soldadonakas markaruw muyuntapxi.

8Judá markax jan jark'aqasiñaniw jikxatasi. Uka urux jumanakax amuyapxtawa, cedro quqanakat lurat utanxa, nuwasiñatak yänakan walja utjatapa,

9Jerusalenan pirqanakapas k'ak'atätap uñjapxaraktawa, aynachankki uka qutañarusti umampiw phuqhantapxarakta.

10Jerusalén markankir utanaksa uñakipapxtawa, yaqhip utanaksti pirqanak sum sayt'ayañatakiw liwinukupxta.

11Uka pä pirqa taypirusti, mirq'i qutañan umapatakiw uma qutañ lurapxaraktaxa. Ukampisa janiw jumanakax amuyasipktati khititix taqi ukanak lurki ukxa, jupax nayra maranakatpach taqi ukanak wakichäna.

12Uka urusti taqi ch'aman Tatitux jachapxañamataki, wararipxañamatakiw jawsapxtam, p'iqinakamsa q'ararasipxañamataki, ayquñ uñacht'ayañatakisti chhankha isinakamp isthapisipxañamataki.

13Ukampis jumanakax kusiskañ phunchhäwi lurapxtaxa; vacanaka, ovejanaka jiwarayapxtaxa, aycha manq'apxtaxa, vino umapxaraktaxa. Ukatsti, “manq'asiñäni, umt'asiñäni, qharürux jiwxchiñänixaya” sapxaraktawa.

14Ukampisa taqi ch'aman Tatitux nayaruw uñstitu, ukatsti sarakituwa: “Janipuniw uka jucha luratanakap pampachkäti; jan ukasti jumanakax jiwarapxätawa” sasa. Aka arunakax taqi ch'aman Tatitun arunakapawa.

15Taqi ch'amani Tatitusti sarakituwa: “Saram, ukatsti reyin utap uñjir Sená sat chachar uñjanim, juparusti sarakim:

16‘¿Kuns jumax akan lurta, khitis jumar reyinakan amay imaña chiqana amay imaña lurañatak churtam?

17Tatitux uka luräwimat jayaruw liwinukütam, kunjämtix mä ch'amani jaqix liwtki ukhama. Ch'amampiw jumarux katuntätam,

18mä muruq'ur uñtat qurumiyätam, ukatsti jaya pamparuw liwtätam. Ukan jiwarakïta, uka nuwasiñ carronakamas janiw kunatakïkanisa, reyi utankir jilïrimatakis mä p'inqaw liwisïta.

19Nayaw jichhax irnaqäwimat jaqunuküma, luräwinakamatsti apanukurakïmawa.

20“ ‘Uka urunsti nayan luqtirixaruw jawsä, Hilquías chachan Eliaquim yuqaparu;

21juman isimampiw jupar isthapiyä, jach'a kankañ churktam uka wak'ampiw wak'antayä, jilïr kankañamsti juparuw churxä. Jerusalén markankirinakatakisa, Judá markatakisa mä awkjamäniwa.

22Tatituw Davidan jilïr kankañap jupar churxani. Kuntix Eliaquim chachax siskani uka arsutapaw phuqhasini, janipuniw khitis arsutaparux “janiw walïkiti” siskaniti.

23Wila masinakapatakix jupax jach'ar aptatäniwa, Tatiturakiw taqi uñisirinakapat imani.

24Jupatxa taqi wila masinakapaw jach'a jach'a tukupxani, yanapapsa katuqapxarakiniwa.

25“ ‘Ukampis Eliaquim, khititix reyin utap apnaqirïkana, wila masinakapa, jupar jaqkattat jakapkäna ukanakas taqpachaniw juchar mantapxani.’ ” Ukham siw taqi ch'aman Tatituxa.

← Chapter 21 Chapter 23 →