Genesis 6

aymara-1997

1Kunapachatix jaqinakax aka uraqir phuqhantxapxän ukkhaxa, phuchhanakanïpxänwa,

2Diosan wawanakapasti uka warminakan jiwakïpxatap uñjapxäna. Ukat uka warminak ajllisipxäna, ukanakampiw jaqichasipxäna.

3Ukampis Tatitux sänwa: “Janiw jaqirux wiñayatak jakaykäti, jupasti janchikiwa. Ukhamasti patak pä tunkan marakiw jakani” sasa.

4Kunapachatix Tatit Diosan wawanakapax jaqinakan phuchhanakapampi wawanïñatak mayachasipxän ukkhaxa, wali jach'a tansa jaqinakaw aka uraqin uñstäna. Jupanakasti nuwasiñatakix wali ch'amani jaqinakänwa, wali aytata jaqinakat nayratpach uñt'atänwa.

5Tatitux jaqinakan sinti jan walinak lurapxatap uñjäna, jaqin ñanqha lurañakpuni amtaskatapa,

6jupasti jaqir luratapxa wal amtäna. Chuymapsa walirak usuyasïna,

7ukat säna: “Nayan lurat jaqirux aka uraqit q'al chhaqtayä, ukhamarak uywañ uywanakaru, uraqin qatatnaqtir animalanakaru, jamach'inakarusa. ¡Walpun ukanak lurataxat amtta!” sasa.

8Ukampisa, Tatitux Noé chachan aski sarnaqäwip uñtasinkäna.

9Noé chachan sarnaqäwipax akhamänwa. Noé chachax aski jaqïnwa, Diosar jaysasapuniw sarnaqirïna. Jaqinak taypinsti, jupa sapakiw Diosan munañaparjam sarnaqäna.

10Noé chachax kimsa wawanïnwa, Sem, Cam, Jafet satäpxänwa.

11Diosatakix aka uraqix ñanqhana, kunayman jan wali lurañanakan phuqhantatänwa,

12jaqinakasti jan walïpxapunïnwa. Diosax taqi ñanqha lurañanakan aka uraqin phuqhantatätap uñjasin,

13Noé chacharux sänwa: “Taqi jaqinak tukjañ amtta. Jupanakan jucha luratanakap laykusti aka uraqin jan walt'añanakaw utjxi, ukhamasti jupanakarusa, akapacharusa q'al tukjä.

14Jichhax resinosa sat lawat mä arca luram, arca manqharusti utanak lurarakim, arcarusti, uman jan mantañapatakix manqhatsa, anqäxatsa alquitranampi sum lluch'ikipam.

15Arcax akham tupunakanïñapawa: Sayt'urux patak kimsa tunka phisqan metroni, iranarusti pä tunka payan chikatan metroni, alayarusti tunka kimsan chikatan metroniraki.

16Kimsa pisoni luräta, mä ventanani, uka ventänsti uta patat chika metrorjamaw uchäta, maysa tuqirusti mä punku ucharakïta.

17Nayasti mä jach'a jallu apayanï, uka jallun umapaw taqpach uraqi chhaqtayani, aka uraqin taqi kunatix jakki uksa q'al tukjani. Aka uraqin jakirinakas taqiniw jiwarapxani.

18Ukampis jumampix mä suma arust'äwi lurä, uka arcarusti yuqanakamampi, warmimampi, yuxch'anakamampi, jumampi ukanakaw mantapxäta.

19Jumamp chikasti, arcarux aka uraqin utjki taqi uka animalanakat mä qachumpi, mä urqumpi irpantäta, jamach'inakatsa, uywañ animalanakatsa, ukhamarak uraqin qatatnaqtir animalanakatsa, ukhamat uka animalanakan jakasipkañapataki.

21Ukxarux kunayman manq'añanak apthapisin imam, ukhamat jumasa, uywanakas manq'añanïpxañamataki” sasa.

22Noé chachasti kunjämtix Diosax siskatayna ukhamarjamaw taqi kunsa luräna.

← Chapter 5 Chapter 7 →