Genesis 34

aymara-1997

1Mä kutixa, Liampina, Jacobumpina wawapäkäna uka Dina tawaqusti, uka chiqankir tawaqunakar tumpt'iriw saraskäna;

2ukampisa juparux Jamor sat heveo jaqin Siquem sat yuqapaw uñjäna. Uka Jamor jaqisti uka chiqan mä jach'a jilïrïnwa, ukatsti munkir jan munkir jupampi ikintäna, ukhamat tawaqur jisk'achjäna.

3Ukampisa Siquem jaqix sintpun Dinarux munatayna, ukatsti kunayman tuqit munayasiñ munäna.

4Ukat Jamor awkipampi parläna: —Nayax uka tawaqumpiw jaqichasiñ munta, sart'arapitaya —sasa.

5Jacobusti Siquem jaqin Dina phuchhapar p'inqachjatap yatïnwa, ukampisa wawanakapan uywanakampi pampankasipkatapat jan kuns arskänti, jupanakan puriniñapkama.

6Ukkañkamasti Siqueman Jamor awkipax Jacobumpi parliriw saräna.

7Kunapachatix Jacobun yuqanakapax pampat purinxapxän ukkhasti, kunatix luraskatayna uk yatisin walpun q'apisipxäna, Israelatakix Siquem jaqin ukhama Jacobun phuchhapampi ikintatapax sinti jach'a p'inqänwa. ¡Janipuniw ukham lurañapäkänti!

8Ukampisa Jamor jaqix jupanakampiw parläna, ukat sarakïna: —Siquem yuqaxax sintpun jumanakan kullakamarux muni. Achikt'asipxäma, jaqichxakiñäniya,

9ukhamat jumanakax nanakan wila masixa tukupxäta; ukhamat nanakas phuchhanakamampi jaqichasipxä, jumanakas phuchhanakaxampi jaqichasipxarakïta.

10Nanakampi jakasipxam. Aka markax jumanakankiwa, ukan jakasisipkam, alakipanak lurapxam, uraqinaksa alasipxam —sasa.

11Ukxarusti Siquem waynax Dinan awkipampiru, jilanakapampiruw sarakïna: —Iyawsapxakitaya, janikiy “Janiw” sapxamti. Kuntix mayipkitäta uk churapxäma.

12Jumanakay sapxita, qawqsa jupat churapxirisma uka, nayasti qawqtix sapkitäta ukkha churapxäma, ukampisa, kullakamamp jaqichasikïxaya —sasa.

13Ukampis Jacobun wawanakapax janiw juparusa, Jamor jaqirus qhana arsupkänti, jan ukasti sallqjasaw

14akham sapxäna: —Janiw nanakax circuncisión jan katuqir jaqirux kullakaxa churapkiristti, nanakatakix ukax mä p'inqäspawa.

15Ukampis maya lurapxasma ukkhakiw nanakax “Iyaw” sapxirisma: jumanak taypinkir chachanakax taqini circunsión katuqapxpan nanakjamäñapataki.

16Ukapachakiw jumanakax phuchhanakaxampi jaqichasipxäta, nanakas phuchhanakamampi jaqichasipxä; ukhamat jumanakampi jakapxä, ukatsti mä sapa markakïñäniwa.

17Ukampisa janitix jumanakax nanakan mayitaxarjama circuncisión katuqapkätaxa, nanakax akat sarxapxäwa, kullakaxsti nanakampi chikaw irpasxapxarakï —sasa.

18Jamor jaqimpi Siquem yuqapampisti Jacobun yuqanakapan mayitaparux “Walikiw” sapxänwa.

19Siquem waynasti jank'akiw circuncisión katuqatayna, Jacobun Dina phuchhapar sinti munatapata. Siquem waynax awkipan wila masipa taypin wali yäqat jaqïnwa,

20ukat jupampi, Jamor awkipampi marka mantaña punkur sarapxäna, ukatsti markan jilïr jaqinakaparuw sapxarakïna:

21—Aka jaqinakax jiwasanakan masinakasawa, aka markan jakapxani, alakipanaksa lurapxarakini, uraqix jupanakatak waliw utjaski; ukhamat jiwasanakax phuchhanakapampi jaqichasiñäni, jupanakas phuchhanakasampi jaqichasirakini.

22Ukampisa mä sapa markakïñasatakisti, jiwasampi jakañatakisa maya jupanakax mayipxi: Ukasti jiwasanak taypinkiri taqi chachanakan circuncisión katuqatäpxañapa, jupanakan sarapäki ukhamarjama.

23Jiwasax jaysak jaysañäni, jupanakan jiwasampi jakañapataki. Ukhamat uywanakapasa, taqi yänakapas jiwasankani —sasa.

24Markan jilïrinakapasti Jamor jaqimpiru, Siquem yuqapampirus jaysapxänwa, ukatsti yuqall wawanakax taqiniw circuncisión katuqapxäna.

25Ukampisa Jacobun yuqanakapa Simeón, Leví, Dinan jilanakapäkaraki ukanakax; kimsa uru qhipat markar sarapxäna. Espadas ayt'ataw circuncisión katuqat jaqinakar akatjamat jalxatapxäna ukatsti jiwayapxarakïnwa, janiw khitis jupanakat kutkatasirjamäkänti janchipan ususkatap layku.

26Jamorampiru, Siquemampiru jiwarayasasti, Dinarux Siqueman utapat irpsunipxäna ukat sarxapxäna.

27Uka qhipatsti Jacobun maynïri wawanakapaw purinirakïna, jupanakasti jiwatanak patxa sarakipasin markat taqi kun lunthatsuwayapxäna, Dina kullakapar jan wali lurapxatapat phuqsusisa.

28Jupanakasti ovejanaka, vacanaka, asnonaka, taqi kunatix markansa, pampansa utjkatayna ukanak apasipxäna;

29kunanakatix utanakan utjkatayna ukanak q'ala lunthatsuwayapxäna, ukatsti wawanakampiru, warminakampirux katuntat apapxäna.

30Ukat Jacobux Simeonampiru, Levimpirux säna: —Ukham luratanakamampixa, jumanakax jan walt'añanak utjayarapipxistaxa. Jichhax aka chiqankir cananeonakasa, ferezeonakasa uñisipxitaniwa. Mayacht'asisax nayatakiw sayt'asipxani, jiwasax juk'anikïtanwa, taqinirupuniw jiwarayistani —sasa.

31Jupanakasti ukxaruw sapxäna: —Ukhamasti, ¿kullakasarux jan wali warmirjamat uñjañ munpachänsti? —sasa.

← Chapter 33 Chapter 35 →