Ezra 6

aymara-1997

1Darío reyisti qillqatanak thaqtapxañapatakiw arsüna, kawkhantix Babiloniankir qillqatanakapax imatäkäna ukana.

2Ukatsti, Media suyunkir Ecbatana markan utjir jach'a utan mä qillqata jikxatapxäna, uka qillqatansti, aka arunakaw utjäna:

3“Persia markankir Ciro reyix nayrïr mara apnaqäwipan aka arunak arsüna: ‘Tatitun utapax Jerusalenan wasitat luraspan, ukan waxt'äwinakax luqtatäñapataki. Uka utasti sayt'urux pä tunk paqallqun metronïniwa, iram tuqirusti llätunk metroni, alay tuqirusti tunka kimsa chikatan metroniraki;

4ukxarusti, jach'a qalanakat kimsa siqi luraspan, mä siqisti machaq lawata luratäpan. Taqi ukanakasti reyin qullqipamp alatäniwa.

5Ukatsti, kawkïr qurita, qullqit lurata yänaktix Nabucodonosor reyix Jerusalenan Diosan utapat Babiloniar apankäna uka yänakax kutt'ayatäxpan. Uka yänakasti Tatitun utapan kawkhankirïkitix ukkhar uchatäxarakpan’ ” sasa.

6Ukatsti Darío reyix Éufrates jawirat inti jalant tuqinkir suyun Tatenai apnaqiriparu, Setar-boznai chacharu, maynïr jilïrinakampirux akham iwxarakïna: “Jerusalén markat mistupxam,

7judionakan apnaqiripampiru, sarayirinakapampir jan jark'xäsipxamti, Diosan utap wasitat lurapxpan.

8Nayan arsüwixax akawa: judionakan sarayirinakapar yanapt'añatakisa, uka luräwin jan sayantañapatakisa, kuna impuestonaktix reyix Éufrates jawirat inti jalant tuqinkir suyut katuqki ukanakxa, wakisitapar churatäpan.

9Ukatsti sapürurak jan armasis Jerusalenankir sacerdotenakar churaspan, vaca qallunakäpasa, mä maran ovejanakäpasa, jan ukax trigöpasa, jayüpasa, vinöpasa, aceitëpas jupanakan mayitanakaparjama, alaxpachankir Diosar nakt'at luqtäwinak luqtapxañapataki.

10Uka waxt'äwinakax alaxpachankir Diosan chuymapar purt'kirïñapawa, ukhamaraki nayan jakäwixatakisa, wawanakaxatakis mayipxpan.

11“Arsuraktwa, khititix aka arsüwixar jan ist'kanixa, utapat mä viga lawa apaqasin ukar warkkatatäpan; utapasti q'ala tukjatarakïpan.

12¡Diosay t'unjpan kawkïr reyitix, jan ukax kawkïr markatix aka arsüwi jan jayskani, ukhamaraki Diosan utap t'unjañsa yankarakini ukaruxa! Naya Darío reyiw aka arunak arsta. Qillqatarjam phuqhaspan” sasa.

13Ukatsti, Éufrates jawirat inti jalant tuqi suyun apnaqiripasa, Tatenai ukasa, Setar-boznai chachasa, masinakapas Darío reyin arsutaparjamaw phuqhapxäna.

14Judionakan sarayirinakapasti Hageo, Zacarías uka profetanakan ch'amañcht'atax irnaqäwinak lurasipkakïnwa. Israelan Tatitun arsutaparjamaw wasitat pirq lurañax tukuyasïna, ukhamaraki Persia markankir Ciro, Darío, Artajerjes uka reyinakan arsüwinakaparjama.

15Tatitun utap lurañasti tukuyatäxänwa, Adar phaxsita, kimsa uru saraqataru, Darío reyix Persia marka suxta mara apnaqaskäna ukapacha.

16Ukatsti kusisiñampiw Tatitun utap luqtapxäna, israelitanakasa, sacerdotenakasa, levitanakasa, ukhamarak khitinakatix jaya markar apanukut uñjasipkatayna ukanakasa.

17Ukürusti, wilañcha luqtapxäna: patak vaca qallunaka, pä patak khariñ ovejanaka, pusi patak mä maran ovejanaka, ukxarusti, tunka payan chivonaka, israelitanakan sapa ayllunakapatxa mayakama, Israel markpacha juchanakapat pampachat uñjasiñataki.

18Ukxarusti sacerdotenakampiru, yanapirinakapampirux lurañanakaparuw uchapxäna, kunjämtix Moisesax Jerusalenan Tatitur yupaychañataki yatichkatayna ukarjama.

19Ukatsti, khitinakatix jayar apayatat kutt'anipkatayna ukanakax Pascua uruyäwi amtapxäna, Abib sat qallta phaxsita tunka pusin uru saraqataru.

20Sacerdotenakasa, levitanakasa kamachinakarjam taqiniw q'umachasipxäna. Ukxarusti, Pascua wilañcha luqtapxarakïna, Babiloniat kuttanirinakata, yaqha sacerdote masinakapata, ukhamarak jupanak pachpatsa.

21Pascuan manq'añäki uka manq'atxa, Babiloniat kutt'anir judionakaw manq'apxäna, ukhamaraki khitinakatix ukan jakapkäna, jucharar markan jan wali luräwinakap apanukunipkatayna ukanakamp chika. Israel markan chiqpach Tatitupar taqiniw yupaychapxäna.

22Paqallq uruw jan levaduran t'ant'a manq'añ phunchhäwi, kusisiñamp uruyapxäna, Tatituw jupanakarux kusisiñamp phuqt'atayna, Persia markankir reyin aski luratapata, Israelankir Tatitun utap wasitat lurañanakan yanapt'asitap layku.

← Chapter 5 Chapter 7 →