Ezra 10

aymara-1997

1Esdras sacerdotex killt'ataw Tatitun utapan markan juchanakap jacht'asis arsuskäna, ukchañkamasti walja chachanaka, warminaka, wawanakaw tantachasïna, wali jacht'asisarakiw jupar muyuntapxäna.

2Ukatsti, Elam wila masinkir Jehiel chachan Secanías yuqapaw Esdrasar parlxayäna akham sasa: “Nanakax janiw chiqa chuymamp Tatitusar arkapkti, kunayman diosanakar luqtir yaqha markanakankir warminakampiw jaqichasipxta; ukampis Israel markatakix suyt'añax utjaskiwa.

3Jichhasti nanakax uka yaqha markankir warminakaxaru, wawanakapamppachar jaqunukxañatakiw arsupxä, kamachix phuqhaspan, kunjämtix jumasa, Tatitun kamachi arunakap jaysirinakas iwxt'apkitu ukarjama.

4Sayt'asim, ak lurañax jumaruw wakt'tam; nanakasti yanapapxämawa. ¡Ch'amañcht'asim!” sasa.

5Esdrasasti sayt'asïnwa, ukatsti sacerdotenakana, levitanakan jilïrinakaparu, ukhamarak taqpach israelitanakaruw arsutanakap phuqhapxañapatak juramento lurayäna, jupanakasti ukham lurañatakiw arsupxarakïna.

6Ukxarusti Esdrasax Tatitun utapat mistuwayxäna, Eliasib chachan Johanán yuqapan utaparuw sarxäna, ukansti uka arumax jan manq'ata, jan umt'ataw qhantatïna, jupax wali llakitapunïnwa, Babilonia markat kutt'anir jaqinakan jan jaysasirïpxatap layku.

7Ukxarusti Judá uraqina, Jerusalén markan taqiniruw yatiyasïna, khitinakatix Babilonia markat kutt'anipkatayna ukanakan Jerusalén markan tantachasipxañapataki.

8Khitinakatix kimsa urukam jan purinipkaspa ukanakaruxa, jilïrinakana, amuyt'ayirinakan amtataparjamaxa, kutt'anirinakan tamapat jaqunukuta, uraqinakapas apaqataw uñjasipxaspa.

9Ukatsti Judá, Benjamín uka uraqinakankir taqi jaqinakaw Jerusalén markan tantachasipxäna, llätunkïr phaxsita pä tunka uru saraqataru, kimsa uru phuqhatarupuni. Jupanakasti taqiniw Tatitun utapan utjkäna uka plazan khathatt'asis qunt'asipxäna, uka arunak yatisina, ukhamarak jallun purintatapata.

10Ukatsti Esdras sacerdotex sayt'asisin jupanakaruw säna: —Jumanakax yaqha diosanakar yupaychir warminakamp jaqichasisaw juch lurapxtaxa, ukhamat Israel markasan juchap jilxatayapxtaxa.

11Ukhamasti awkinakaman Tatit Diosap nayraqatan juchanïpxatam uñt'asipxam, Tatitun munañap phuqhapxarakim. Yaqha diosanakar yupaychir jaqinakatsa, anqa markanakankir warminakatsa jithiqtapxam —sasa.

12Ukxarusti jaqinakax taqiniw jach'at arsupxäna: —Walikiwa, kuntix jumax sapkitäta uk lurapxäwa.

13Ukampis nanakax waljanïpxtwa, ukhamarus jalluskakiwa; janiw anqan qhiparapkiristti; uka lurañax janiw mä urutakiki, pä urutakïkisa, uka juch luririnakax waljanïpxtwa.

14Jilïrinakaxana akanak askichañatak nanak lanti Jerusalenan qhiparapxañapax askïspawa, ukatsti khitinakatix yaqha markanakankir warminakamp jaqichasipki ukanakax markapankir jilïrinakapampi, taripirinakapamp chikt'ataw mä uru jutapxañapa. Ukhamat uka jucha layku Diosan jach'a phiñasiñapax jiwasat apaqtañapkama —sasa.

15Ukatsti jaya markat kuttanirinakax “Walikiw” sapxänwa, ukampis Asael chachan Jonatán yuqapaxa, Ticvá chachan Jahazías yuqapasa, janiw kamsapkänsa, ukatsti Leví wila masinkir Mesulam chachampi Sabtai chachampix jupanakaruw jaqkattapxäna. Esdras sacerdotesti wila masinkirinakat yaqhip jilïrinakapar ajllisinxa, sapa mayni jaqin juchap yatxatapxañapatakiw utt'ayäna. Ajllitanakasti lurañanakap qalltapxäna Tébet sat tunkïri phaxsina, qallta uru saraqataru.

17Ukat qhipa marana, Abib qallta phaxsita, qallta uru saraqataruw yaqha markanakankir warminakamp jaqichasirinakar taripañ tukuyxapxäna.

18Sacerdotenakat yaqha markanakankir warminakamp jaqichasirinakax akanakänwa: Josadac chachan Josué yuqapan wawanakapa, ukhamarak wila masinakapata Maaseías, Eliézer, Jarib, Guedalías,

19jupanakasti taqi chuymaw warminakapar khithanukxañatak arsupxäna, ukatsti mä oveja uchapxäna juchanakapat waxt'äwi luqtañataki.

20Imer chachan wawanakapatsti: Hananí, Zebadías ukanaka.

21Harim chachan wawanakapatsti: Maaseías, Elías, Semaías, Jehiel, Ozías ukanaka.

22Pashur chachan wawanakapatsti: Elioenai, Maaseías, Ismael, Natanael, Jozabad, Elasá ukanaka.

23Levitanakan wawanakapatsti: Jozabad, Simí, Petahías, Judá, Eliézer, Quelaías ukanaka, jupax Quelitá sutimp uñt'atarakïnwa.

24Q'uchurinakatsti: Eliasib ukaraki. Punku uñjirinakatsti: Salum, Télem, Urí ukanaka.

25Ukat ukxar utjir israelitanakat yaqha markankir warminakamp jaqichasirinakax utjarakïnwa, jupanakasti akanakänwa: Parós chachan wawanakapata: Ramías, Jezías, Malquías, Mijamín, Eleazar, Malquías, Benaías ukanaka.

26Elam chachan wawanakapatxa: Matanías, Zacarías, Jehiel, Abdí, Jeremot, Elías ukanaka.

27Zatú chachan wawanakapatsti: Elioenai, Eliasib, Matanías, Jeremot, Zabad, Azizá ukanaka.

28Bebai chachan wawanakapatxa: Johanán, Hananías, Zabai, Atlai ukanaka.

29Baní chachan wawanakapatsti: Mesulam, Maluc, Adaías, Jasub, Seal, Ramot ukanaka.

30Pahat-moab chachan wawanakapatxa: Adná, Quelal, Benaías, Maaseías, Matanías, Besalel, Binuy, Manasés ukanaka.

31Harim chachan wawanakapatsti: Eliézer, Isías, Malquías, Semaías, Simeón,

32Benjamín, Maluc, Semarías ukanaka.

33Hasum chachan wawanakapatxa: Matenai, Matatá, Zabad, Elifélet, Jeremai, Manasés, Simí ukanaka.

34Baní chachan wawanakapatsti: Madai, Amram, Uel,

35Benaías, Bedías, Queluhu,

36Vanías, Meremot, Eliasib,

37Matanías, Matenai, Jaasai ukanaka.

38Binuy chachan wawanakapatxa: Simí,

39Selemías, Natán, Adaías,

40Macnadbai, Sasai, Sarai,

41Azarel, Selemías, Semarías,

42Salum, Amarías, José ukanaka.

43Nebo chachan wawanakapatsti: Jeiel, Matatías, Zabad, Zebiná, Jadau, Joel, Benaías ukanakaraki.

44Taqi uka chachanakaw yaqha markankir warminakamp jaqichasipxatayna, ukampis jupanakax warminakaparusa, wawanakaparus khithanukxapxänwa.