Ezekiel 7

aymara-1997

1Tatitux nayaruw parlxayitu, akham sasa:

2“Naya, Tatituw Israel markar sista: Tukuy urupax purinxiwa, aka uraqin tukusiñapax purinxiwa.

3Israel, juman tukusiñamax purinxiwa. Jumxaruw phiñasiñax wartanï; sarnaqäwinakamat wayt'äma, axtaskañ luräwinakamatsti mutuyarakïmawa.

4Janiw khuyapayasiñampi jumarux uñjkämati, sarnaqäwimatsti mutuyarakïmawa, jan wali luratanakamatsa t'aqhisirakïtawa. Ukapachaw jumanakax yatipxäta, nayan Tatitütaxa.

5“Naya, Tatituw arsta: Amuyasim, tukuyan puriniñapax jak'ankxiwa, jan walt'añanakasti may mayaw jutani, juman tukusiñamasti niyaw jak'ankxaraki.

7Aka uraqin utjir jaqinaka, t'unjatäñ urux purinxiwa. Pachax purinxiwa, jan walt'añ uruw jak'ankxi. Qullunakan kusisiñax tukusxarakiniwa.

8Jichhpachaw phiñasiñax jumxar ukkhaki sañkam warxatanï, taqi sarnaqäwinakamatsti wayt'ämawa, taqi axtaskañ luräwinakamatsa mutuyarakïmawa.

9Jichhax janiw jumarux khuyapayasiñampi uñjkämati; taqi sarnaqäwinakamatsti mutuyapunïmawa, axtaskañ luräwinakamatsa t'aqhisiyapunïmawa. Ukapachaw jumanakax nayan Tatitütaxa, mutuyirïtaxsa yatipxäta.

10“¡Akax uka uruxa! ¡Purinxiwa! ¡T'unjatäñax purinxiwa! Taqi chiqansa ñanqha lurañanakakiw utjaski, jaqinakan ñanqha luratanakapasti sintipunïxarakiwa.

11Nuwasiñanakakiw sartaski, ukanakasti ñanqhanakak utjayi. Ukampis jupanakax qamir yänakapampisa, arnaqasitapampisa janiw kunsa jikxatapkaniti. Janiw jupanakan kuna askis utjkxiti.

12Pachax purinxiwa, uka urusti purinxarakiwa. Aljasiritakix janiw kunat kusisiñapas utjkiti, alasiritakis janiw kunat llakisiñapas utjkarakiti. Israel markan jach'a jach'a tukutapatsti q'apisiñampiw mutuyarakïxa.

13Aljirix janiw aljatap taqi jakañapan kutsuyaskaniti, janirakiw alakipa luratapsa ina ch'usar tukuykaniti. Ñanqha lurir jaqinakax taqiniw jiwarapxani.

14“Trompetsa nuwasiñar jawsañatak phust'asiskpan; taqinis wakichasiskpan, janiw maynis nuwasïwirux mistkaniti. Israel markan jach'a jach'a tukutapatsti phiñasiñaxampiw mutuyarakï.

15Marka anqäxan qhiparirinakasti, nuwasïwin jiwarapxani, marka manqhan qhiparirinakasti manq'atjama, kunayman usunakampiw jiwarapxarakini.

16Mulljat palomanakjamas qullunakar jaltapxpan, juchanak lurapxatapat jiwarasipkakipuniniwa.

17Taqiniruw qunqurinakapax aliqak khathatxani, amparanakapas jan ch'amanjamaw uñjasini.

18Llakisiñatsti chhankha isinakampiw isthapisipxani; janchinakapas inakiw khathatxani, p'inqasiñatsa ajanunakapax wilar tukuta, ñik'utanakapas mururataw sarapxani.

19Qullqinakapsa, qurinakapsa q'añu t'unar uñtat marka thakhinakarux wartapxani. Tatitun q'apisiñap urusti, janiw quripasa, qullqipasa jupanakarux qhispiykaniti, janirakiw manq'at awtjat purakanakapsa phuqt'kaniti, uka qurir munasaw ñanqha lurañanakarux puripxi uka layku.

20Ukataqi quri, qullqi yänakanïsasti, jach'a jach'aw tukupxäna, uka qurinakampiw uka axtaskañ diosanakapsa lurasipxarakïna. Ukatpï nayax uka qurit lurat yänakap q'añu t'unar tukuyarakïxa.

21Yaqha markanakat jaqinak uka qurinak lunthatapxañapatakix jutayarakï, sinti jan wali jaqinakaw jutapxani, jupanakasti uka qurinakap aparapxpan, mä q'añu yänakäkaspas ukham uñjapxarakpan.

22Nayasti aka markat jayaruw sarxä, nayan wali munat utaxsa takisiyarakïwa. Jan wali jaqinakaw jutasin q'añuchjapxani.

23“Ezequiel, cadenanak wakicht'am, aka markan jaqi jiwayirinakarux waljaniruw juchañchapxi, aka markasti nuwasiñanakampi phuqhantatawa.

24Nayaw wali qhuru jaqinak khithanï, jupanakaw utanak katuntasipxani. Munañaninakan jach'a jach'a tukutapasti tukusiniwa; diosanakapar yupaychañ chiqanaksti takisiyarakïwa.

25Axsarañaw jupanakarux q'ala katuntani; sumankañ thaqhapxani ukampis janiw jikxatapkaniti.

26Jan walt'añanakax mayat mayat jutani; jan wali yatiyäwinakasti may mayaw purinini. Inamayaw mä profetarus thaqhasipkani kuntix Tatitux siski uk qhanañchañapataki; janiw jupanakar yatichir sacerdotex utjkxaniti, janirakiw jupanakar iwxt'iri jilïr jaqis utjkxaniti.

27Reyix ch'iyar isimpiw isthapisini, marka apnaqiristi llakt'atäniwa, markankir jaqinakasti khathatipxarakiniwa. Nayaw jupanakarux sarnaqäwinakaparjam uñjarakï, luratanakaparjamaw jupanakar taripaskä. Ukhamat jupanakax yatipxani nayan Tatitütaxa” sasa.

← Chapter 6 Chapter 8 →