Ezekiel 38

aymara-1997

1Tatitux sarakituwa:

2“Jumasti Ezequiel, jichhax Magog uraqi tuqiru uñtam, ukatsti nayan sutixar Gog sat jilïritak arsum, jupasti Mésec, Tubal sata ukanakan jilïripawa.

3Jichhasti juparux sarakim: ‘Tatitux akham siwa: Gog, jumax Mésec, Tubal sata ukanakan jilïripätawa, jichhasti nayax juman uñisirimätwa.

4Jichhax jumar kuttayanïmawa, lakamarusti ganchonakampiw uskuntäma, jumarusa, caballonakar kachxatat suma isthapt'at soldadonakamarusa, espadanakampi, kunayman jark'aqasiñanakampi wakicht'ata uka jach'a ejercitorus apsunirakïwa.

5Jumasti Persia, Etiopía, Libia uksa markankirinakampi chikaw saräta, taqi jupanakasti nuwantasiñatakix escudonakampi casconakampi wakicht'atäpxarakiwa,

6amsta tuqinkir jaya uraqinakatsti Gómer, Bet-togarmá sata markanakankir taqpach tama soldadonakaw jutapxarakini, jumar jaqkattata ejercitonakax waljaniwa.

7Jichhax nuwantasiñatak sum wakicht'asim, juman p'iqichatax taqi ejercitonakas nuwantasiñatakix sum wachit'asipxpan.

8Akat walja maranakarusti, Israel markar nuwantañamatakiw khithäma. Aka markax q'ala tukjatänwa, walja maranakarakiw ukham tukjat uñjasïna. Jaqinakapax katuntataw uñjasïna, ukatsti yaqha markanakar apayatäpxarakïnwa. Ukampis nayaw jupanakarux uka markanakat irpsunxta, jichhasti Israel qullunakan wasitat tantacht'atäxapxiwa. Ukanarak k'uchik jakasxapxi.

9Jumasti mä ch'amak qinayjamaw jupanakxarux purïta, uka markarusti q'al chhaqtayarakïta, mä jach'a thayäkasmas ukhamaw uka markarux ejercitonakamampi, walja yaqha markanakampix nuwantarakïta.

10“ ‘Naya Tatitux akham sistwa: Uka urunakansti ñanqha amtäwinakaw p'iqimarux jutani.

11Ukatsti sarakïtawa: Mä pisi ch'ama markar nuwantiriw sarä, kawkhantix jaqinakapax k'uchik jakasisipki, markanakapas jan pirqanakampi muyuntayata, jan punkunakani, jan jist'añanakani markanakaruw nuwantä.

12Jupanakarusti lunthatjäwa, kawkïr markanakatix yaqha markanakat jutir jaqinakampi wasitat sayt'ayatäki uka markanakarux q'al tukjä, jupanakasti uywanakani, yaqha uraqinakani ukhamäpxiwa, ukampis taqi chiqat sipansa suma chiqäwjan jakapxi.

13Sabá, Dedán markanakankir jaqinakasti, Tarsis markankir alakip lurir jaqinakasa, yaqha markankirinakas jiskt'apxätamwa: ¿Jumax lunthatirit jutta? ¿Ukhamax uka ejercitonakam taqi qamir yänakaxa lunthatañatakit tantachtaxa?’ sasa.

14“Ukhamasti Gog jilïrirux nayan sutixar parlam akham sasa: ‘Tatitux akham siwa: Israel markaxax k'uchiki jakasiskani ukapachaw jumax markamatpach jupanakar tukjir sarantäta,

15uka jaya amsta tuqitpacha, walja ch'aman ejercitomampi, caballor kachxatat soldadonakampi,

16ukatsti Israel markaxaruw nuwantäta. Gog, jumasti uka markarux mä ch'iyar qinayäkasmas ukhamaw chhaqtayäta. Uka qhipa urunakansti nayax markaxar nuwantañamatakiw jumar irpanïma, ukhamat juma tuqi yaqha markanakax yatipxani, nayarus uñt'apxarakitani kunapachatix nayax jupanakaru q'uma kankañax uñacht'aykä ukapacha’ sasa.

17“ ‘Naya, Tatitusti saraktwa: Khä urunakan jumaruw nayan profetanakax tuqi parläyäsma, jupanakasti uka urunakan yatiyapxäna nayan jumampi Israel markar nuwantayañatakixa.’

18Tatitux sarakiwa: “Gog sat jilïrix Israel markar nuwantkani ukkhasti, phiñasiñaxax ninjamaw aqtani.

19Uka aqkir phiñasiñaxan arsta, uka urunakan mä jach'a uraqi khathatiw Israel uraqin utjani.

20Jach'a qutankir chawllanakasa, alaxpach jamach'inakasa, montenkir animalanakasa, katarinakasa, naya nayraqatan khathatipxani, ukhamaraki taqi jaqinakasa. Jach'a qullunakasa, qarqanakasa q'alaw allthaptani, taqi pirqanakas liwirtarakiniwa.

21Nayaw Gog jilïrirux kunayman axsarkañ jan walinak apayanï. Usunakampi, akatjamat jiwarañanakampiw juparux mutuyarakï. Jupxarusa, ejercitopxarusa, jupar alkatapki uka yaqha markanakxarusa, jach'a jallunakampi, chhijchhinakampi, nina azufrempi puriyanirakï, soldadonakapasti jupanakpachakiw espadanakapampi nuwarasxapxani. Naya, Tatituw uk arsta.

23Ukham lurasaw yaqha markanakarux nayan jach'a qullan kankañax uñacht'ayä. Nayaw jupanakampix uñt'ayasï, jupanakasti nayan Tatitütax yatipxarakini.”

← Chapter 37 Chapter 39 →