Ezekiel 35

aymara-1997

1Tatitux sarakituwa:

2“Ezequiel, Edom qullunak tuqir uñtam, ukatsti nayan sutixampi jupanakar parlam:

3“ ‘Tatitux akham siwa: ¡Nayax jumanakan uñisirimaw sayt'ta, Edom uraqin jakir jaqinaka! ¡Luratanakamarjamaw mutuyapxäma! ¡Uraqinakamsti ch'usa wasararuw tukuyarakï!

4Markanakamasti q'ala apanukutaw uñjasini, q'ala tukjataw uñjasirakini. Ukapachaw yatipxäta, nayan Tatitu Diosätaxa.

5“ ‘Jumasti israelitanakan uñisiripapuniw tuktaxa, kunapachatix jupanakax jucha luratanakapat mutuyäwi katuqapkän ukkhasti, jumax nuwantaraktawa.

6Ukampis naya, Tatituw jichhax juramentompi arsta, jumarux jiwañaruw katuyäma, jiwasti jumarux arknaqarakïtamwa. Jumax jiwañatak juchañchatätawa, uka jiwaw jumarux arknaqarakïtam.

7Edom uraqi, ch'usa wasararuw tukuyäma, q'al t'unjäma, uka chiqa sarakipirinakarusa q'al tukjarakï.

8Jach'a qullunakamsa, jisk'a qullunakamsa, qhirwanakamsa, jawiranakamsa nuwasïwin jiwarir amayanakampiw phuqhantarakï.

9Wiñayatakiw ch'usa wasarar tukuyäma, janipuniw khitis markanakaman jakxaniti. Ukapachaw jumax yatïta, nayan Tatitütaxa.

10“ ‘Jumasti saraktawa: Israel uraqix paypach markapampix nayankaniwa; Tatitux ukan jakaskani ukasa, nayaw jupanakarux apnaqä, sasa.

11Ukampis naya, Tatituw jakañax layku juramentompi arsta, jumax Israel markarux phiñasiñampi, uñisiñampiw t'aqhisiytaxa, jichhasti uka kipka luratamampiw mutuyarakïma. Kunapachatix nayax jumar mutuykäm ukapachaw jupanakax nayan Tatitütax yatipxani.

12Ukapachaw jumax uñjäta, naya, Tatitun uka jan wali arunaka jumax Israel markataki arsutama sum ist'ataxa. Jumasti saskaktawa: ¡Uka qullunakax ch'usa wasarakiwa, jichhasti tukjaraksnawa! sasa.

13Naya tuqi jan wali arunak parlatamsa sum ist'arakta.

14“ ‘Jichhasti naya, Tatitux ak sista: Taqi aka uraqpachaw kusisini, nayax jumar t'unjkäm ukkhaxa.

15Jumasti, Israelan katuqat uraqipax t'unjatäkän ukkhax kusisïyätawa, jichhasti jumax ukham t'unjataw uñjasirakïta. Edom marka, Seir qullu, ch'usa wasarar tukuyataw uñjasïta. Ukapachaw yatipxani, nayan Tatitütaxa.’

← Chapter 34 Chapter 36 →