Ezekiel 30

aymara-1997

1Tatitux sarakituwa:

2“Jumasti Ezequiel, nayan sutixampi parlam, ukatsti sarakim: “ ‘Tatitux akham siwa: Niya jak'achasiniri urut

3wal arnaqasipxam; ¡Tatitun mutuyäwi urupax jak'ankxiwa! ¡Qinayan phuqhantat urüniwa! ¡Taqi markanakatakisti mä axsarkañ urüniwa!

4Egipto markaruw nuwantapxani. Ukan walja jaqinak jiwarayapkani, qamir yänakapsa lunthatsupkani, Egipton qalltapsa t'unjapkarakini ukapachasti, Etiopía markax khathatiniwa.

5Uka nuwasïwinsti Libia, Lidia, Etiopía markanakan soldadonakapaw jiwarapxani, Arabia, Cub markan soldadonakapa, juparu jaqkattatäki uka markanakamppacha.

6“ ‘Tatitux akham siwa: Egipto markar yanapirinakasti nuwasïwin jiwarapxani, Migdol chiqata, Asuán sat chiqakama. Egipton jach'a jach'a tukutapasti jisk'achjataw uñjasini. Naya, Tatituw uk arsta.’

7“Egipto markax taqi markanakat sipansa q'ala tukjatapunïniwa, markanakapasa q'ala t'unjatarakïniwa.

8Egipto markar nayax ninampi phichkatkä, taqi yanapirinakaparus tukjkarakï, ukapachaw nayan Tatitütax yatipxani.

9“Egipto markar mutuyañ urux purinkani ukkhasti, yatiyirinak jach'a quta tuqinjam khitharakï, Etiopiankir jan yäqasir jaqinakar yatiyañapataki, jupanakasti ukanak ist'asax axsarañampiw phuqhantasipxani. Uka urun puriniñapasti jak'ankxiwa.

10“Tatitux akham siwa: Egiptonkir taqi qamir yänakap t'unjañatakix, Babiloniankir Nabucodonosor reyiruw yanap mayï.

11Jupasti, wali qhuru jaqinakani ejercitopampiw markar t'unjirix jutantani. Egipto markarusti espadanakapampiw nuwantapxani, uka markarusti jiwatanakampi phuqhantat jaytapxani.

12Nilo jawirsti wañt'ayarakïwa, Egipto markarux qhuru jaqinakan amparaparuw katuyä; uka jaya markat jutir jaqinak tuqiw aka markar t'unjä, ukan utjiri taqi yänakapamppacha. Naya, Tatituw uk arsta.

13“Tatitux akham siwa: Idolonak q'al t'unthapï, Menfis uraqinkir k'ari diosanaksti tukjarakïwa. Egipto markax jan reyiniw uñjasini, uka markarusti axsarañampiw phuqhantarakï.

14Patros sat marka q'al tukjä, Soan sat marksti ninampiw phichkatä, Tebas markarusti mutuyarakïwa.

15“Egipto markan sayt'asiñapa Sin sat markxarusti phiñasiñax warxatanï, Tebas markan qamir yänakapsa t'unjarakïwa.

16Egipto markarux ninampiw phichkatä, Sin sat markasti walpun t'aqhisini; Tebas markan pirqanakapansti jach'a k'ajllanakaw jist'artani, Menfis markasti urpach katuntataw uñjasini.

17On, Bubastis sata markanakan jakir waynanakasti nuwasïwin jiwarapxani, mayni jaqinakarusti katuntat apasxapxarakini.

18Egipto markax wali ch'aman markawa, uka ch'amapaw jach'a jach'a tukuyaraki, ukampis uka ch'amap t'unjkä ukkhaxa, taqpach markaw ch'amakan jikxatasini; Tafnes sata markas ch'amakan jikxatasini, markanakapan jakir jaqinakarusti katuntat apasxapxarakini.

19Nayaw Egipto markataki arsutaxa phuqhä, ukapachaw yatipxani, nayan Tatitütaxa.”

20Tunka mayanïr marana, nayrïr phaxsina, paqallqu uru saraqatarusti, Tatitux sarakituwa:

21“Nayaw Egipton faraón reyiparux amparap p'akjta, ukatsti janirakiw k'umarachasiñapatakix khitis qullxatt'asin ch'uqxatkiti, ukhamat wasitat espada aytañapataki.

22Ukatpï naya, Tatitux sistxa: Nayax Egiptonkir faraón reyin uñisiriparuw tukta. Niyaw mä amparap p'akjta, jichhasti paypach amparap p'akjä, ukhamat espada jan aytañapataki.

23Egiptonkir jaqinakarux yaqha markanak taypiruw ananukurakï.

24Babiloniankir reyirusti ch'am churä, espadax ayxaruyarakï. Faraonan amparanakap p'akirä, ukham usuchjatasti uñisirinakapan nayraqatapan wararini.

25Babiloniankir reyirux ch'am churä, faraonatsti ch'am apaqxarakï. Nayax Babiloniankir reyir espadaxa ayxaruykä, ukatsti jupax Egiptor nuwantkarakini, ukapachaw yatipxani, nayan Tatitütaxa.

26Egipcio jaqinakarusti yaqha markanak taypiruw ananukü, ukapachaw yatipxani, nayan Tatitütaxa.”

← Chapter 29 Chapter 31 →