Ezekiel 14

aymara-1997

1Israelan jilïr jaqinakapat waljaniw nayan ukar jutapxäna, Tatitur jiskt'añaxataki, ukat nayraqataxaru qunt'asipxäna.

2Ukhamasti Tatitux sarakituwa:

3“Aka jaqinakax diosanakar yupaychañaruw katuyasxapxi, kunatix juchar puriyki uka uñkatatakïsipkiwa. ¿Ukatti nayax jupanakan jiskt'asitanakaparu iyawsästi?

4Jichhax jupanakampi parlam ukatsti sarakim: ‘Tatitux akham siwa: Israelitanakat khitinakatix diosanakar yupaychañar uskusipxani, juchar puriyki ukanak uñkatatakïsipkani, ukat profetan ukar jiskt'asir jutapxarakini, ukanakarusti qawqha diosanakapatix utjki ukarjamaw mutuyä.’

5“Kawkïr israelitanakatix yaqha diosanakar yupaychañ layku nayat jithiqtapki ukanakarusti nayaw chuymap llamkt'arakï.

6Ukat jichhax israelitanakar sarakim: ‘Tatitux akham siwa: Nayan ukar kuttanxapxam; diosanakamsti apanukxapxam, uka axtaskañ luräwinakamsa apanukupxam.’

7Mä israelita jaqitixa, jan ukax mä yaqha markat jutir jaqisa, Israel uraqin jakkasa, nayat saraqas diosanakar yupaychañar katuyasxani, juchar puriyki ukanak uñkatatäskani, ukatsti mä profetar nayxat jiskt'asir sararakini, ukarusti naya kipkaw arusxatarakï.

8Nayaw uka jaqimpix jikintasï, taqininsa uñjkañ mutuyarakï, uka luräwix taqinitakis mä uñacht'äwïniwa, uka jaqirusti markaxat chhaqtayarakïwa. Ukapachaw jumanakax nayan Tatitütax yatipxäta.

9“Mä profetatix k'ari yatiyäwinak churanixa, nayaw uka profetar ukham yatiyañapatak lurtxa, ukampis uka profetarux mutuyasin Israel markaxat chhaqtayarakï.

10Jiskt'asir jaqisa, uka profetasa panpachaniw juchapat mutuyatäni,

11ukhamat Israel markax jan juk'ampi nayat jithiqtxañapataki, janirak uka ñanqha lurañanakampis q'añuchjasiskañapataki. Jupanakax nayan markaxäniwa, nayasti jupanakan Diosaparakïyäwa. Naya, Tatituw uk arsta.”

12Tatitux sarakituwa:

13“Mä markatix nayatak sayt'asis jucha lurani, janirak taqi chuymampi arkkitani ukaxa, uka markarux mutuyäwa, manq'añ imasitanakapsti q'al apaqarakï. Uka markxarusti mach'a apayanirakï, jaqinakasa, uywanakasa manq'atjamaw jiwarapxani.

14Uka markantix Noé, Daniel, Job chachanakax jakapxaspaxa, uka kimsanikiw aski jaqïpxatapat qhispipxaspa. Naya, Tatituw uk arsta.

15“Nayatix mä markar monte animalanak khitirista, uka markan utjir jaqinakar jiwarayapxañapataki, uka marka ch'usa wasarar tukuyapxañapataki, ukhamat monte animalanakar axsarasax uka chiqa jan khitis sarakipañapataki,

16uka markantix uka kimsa chachanakax jakapxaspa, janiw yuqanakaparusa, phuchhanakaparus qhispiyapkaspati; jupanakakiw qhispipxaspa, uka markasti mä ch'usa wasarar tukutäspawa. Naya, Tatituw jakañax layku juramentompi uk arsta.

17“Nayatix aka markxar nuwasiñanak apayanirista, ukatsti uywanakana, jaqinakan jiwarayatäpxañapatak arsurista,

18uka kimsa chachanakatix ukan jakapxarakispa, ukkhasti janiw yuqanakaparusa, phuchhanakaparus qhispiyapkaspati; uka kimsanikiw qhispiyasipxaspa. Naya, Tatituw jakañax layku juramentompi uk arsta.

19“Nayatix uka markxaru kunayman usunak apayanirista, phiñasiñaxantix jaqinakarusa, uywanakarus jiwarayarakirista,

20ukantix Noé, Daniel, Job chachanakax jakapxaspa, ukapachax janiw yuqanakaparusa, phuchhanakaparus qhispiyapkaspati; jupanak sapakiw aski jaqïpxatapat qhispiyasipxaspaxa. Naya, Tatituw jakañax layku juramentompi uk arsta.

21“Naya, Tatitux saraktwa: Kunakïkani nayax Jerusalén markxar pusi jach'a axsarkañ mutuyäwi apayankä ukkhaxa: nuwasiñanaka, mach'anaka, axsarkañ laq'unaka, kunayman usunaka, jaqinakarusa, uywanakarus q'al jiwaraykä ukapachaxa.

22Mä qawqhanikiw jiwañat qhispipxani, ukatsti uka chiqat yuqanakapampi, phuchhanakapampiw mistunxapxani. Kunapachatix jupanakax jumanakan ukaru jutapxani, ukapachaw jumanakax uñjapxäta kunjämtix sarnaqapkatayna, kunanaktix lurapkarakitayna taqi ukanaka, ukatsti Jerusalén markxaru apayanit mutuyäwitxa chuymachasipxarakïtawa.

23Jupanakan sarnaqäwipa, luratanakap yatisasti chuymachasxapxätawa. Ukapachaw jumanakax amuyapxäta, kuna mutuyäwinaktix Jerusalén markxar apayankta ukanakan wakisirïtapa. Naya, Tatituw ukanak arsta.”

← Chapter 13 Chapter 15 →