Exodus 38

aymara-1997

1Ukxarusti Besalel chachax acacia lawat nakt'ayat waxt'anak luqtañ altar lurarakïna. Uka altarasti pusi tuqit mä tupunikïnwa, iranarux pä metro pä tunka phisqan centimetronïnwa, alayarusti mä metro pä tunka phisqan centimetronirakïnwa.

2Pusi esquinapatakisti pusi waxranak luräna, uka waxranakampi altarampix maypach luratakïnwa, broncempi lip'ikipayatänwa.

3Altaratakisti broncetkamak taqpach yänakap lurarakïna, qhilla apsuñanaka, lampanaka, jach'a qirunaka, achtayañanaka, nina sank'a nakhayañanaka.

4Ukxarusti broncet mä rejilla luraraki, uksti altar thiya aynach tuqiruw uchäna, altaran chikachikaparu.

5Ukxarux pusi argollanak luraraki, broncet lurat rejillan pusi esquinapar uchañataki, ukanjam muruq'u lawanak ayantañataki.

6Ukatsti altaratakix acacia lawat muruq'u lawanak luräna, uksti broncempiw lip'suyäna,

7ukatsti uka muruq'u lawanakxa altar thiyanakankki uka argollanak taypi ayantäna, ukamp altar kallañataki. Uka altar manqhax phusakïnwa, lawat luratarakïnwa.

8Tatitump Jikisiñ Carpa punkun yanapasir warminakax broncet lurat lirphunakap Besalel chachar churapxäna, Besalel chachasti uka broncempiw uma uchañ luräna, uka uma uchañan qunuñanakapsa pachpa boncet lurarakïna.

9Ukxarusti Besalel chachax Tatitump Jikisiñ Carpan utänqap luräna. Aynach tuqirusti cortinax pusi tunka phisqan metronïnwa, ukasti lino k'anthitat luratänwa.

10Pä tunka sayir lawanakapasa, pä tunka takxäsirinakapas, broncet luratänwa, t'iriñanakapampi, anillonakapampisti qullqit luratarakïnwa.

11Amsta tuqita pusi tunka phisqan metroni cortinaw utjäna, broncet lurat pä tunka sayiri lawanakapampi, pä tunka takxäsirinakapampi, t'iriñanakapampi, anillonakapampix qullqit luratarakïnwa.

12Ukxarux inti jalanta tuqita pä tunka payan metro chikatani cortinaw utjäna, tunka sayirinakampi, tunka takxäsirinakampi. Sayir lawanakan t'iriñanakapasa, anillonakapasa qullqit luratänwa.

13Inti jalsu tuqit pä tunka payan metro chikatan cortinaw utjarakïna.

14Maysa tuqi mantañan paqallqu metroni cortinaw utjäna, kimsa sayir lawanakampi, kimsa takxäsirinakampi;

15maysäx tuqinsti, paqallqu metroni cortinaw utjäna, mayax Carpa anqäxar mantañ tuqina, mayasti maysa thiyana, kimsa sayir lawampi, kimsa takxäsirinakampi.

16Carpa anqäxa thiyanakar muyuntayatäki uka cortinanakax lino k'anthitat luratänwa.

17Sayir lawanakataki takxäsirinakapasti broncet luratänwa, sayirinakan t'iriñanakapasa anillonakapasa qullqit luratarakïnwa; sayir lawanakan alax thiya tuqipasti qullqimpi lip'suyatänwa. Carpa anqäxan sayir lawanakapaxa, qullqit lurat anillonakanïnwa.

18Carpa anqäxar mantañankir cortinax wali suma p'itakipatänwa, morado telxaru, wila morado telxaru, wila telxaru, linot k'anthit telxaru. Uka cortinasti sayt'urux llätunka metroni, alayarusti pä metro pä tunka phisqan centimetronïnwa, anqäx cortinanakas kipkaki.

19Ukasti pusi sayir lawanïnwa, broncet lurat pusi takxäsirinakapampi; t'iriñanakapampi, anillonakapampix qullqit luratarakïnwa; sayir lawanakan alax thiya tuqipasti qullqimpi lip'suyatänwa.

20Tatitumpi Jikisiñ Carpan ch'akurunakapasa, carpa anqäx muyuntir ch'akurunakas broncet luratkamakïnwa.

21Moisesan arsutaparjamasti, levitanakax sum jakthapipxäna, kuna metalanaktix Tatitump Jikisiñ Carpa lurañatak uchapkatayna ukanaka, uka lurañansti Aarón sacerdoten Itamar yuqapaw p'iqichäna.

22Ukhamasti, Judá ayllunkir Urí chachan Besalel yuqapa, Hur chachan allchhipaw kunanaktix Tatitux Moisesan lurañapatak siskatayna ukanak luräna.

23Juparusti Dan ayllunkir Ahisamac chachan Oholiab yuqapaw yanapäna, jupasti hierro liq'irïnwa, sawurirakïnwa, morado telxaru suma p'itakipañanak yatïna, wila morado telaru, wila telaru, suma lino telampiru.

24Qullan utjäwi lurañatak munaskäna uka taqpach qurix, Tatitur churäwi luqtat qurïnwa; qullan utjäwin tupuparjamax, llätunka patak suxta tunka phisqan kilo qurïnwa.

25Jaqinak jakthapïwin apthapit qullqisti, qullan chiqawjan tupuparjamax kimsa waranqa kimsa patak tunka llätunkan kilo, phisqa patak pä tunka phisqa gramoni qullqiw utjäna.

26Pä tunka maranit amstaru jakt'at jaqinakatxa, suxta patak kimsan waranqa phisqa patak phisqa tunkanïnwa, jupanakat sapa mayniw phisqa chikatan gramo qullqi churapxäna, qullan chiqawjan tupuparjama.

27Ukxarusti kimsa waranqa kimsa patakan kilo qullqiw utjarakïna, uk umatatayasin qullan chiqawjan patak katxäsiripampi, velo cortinan katxäsiripamp lurañataki, sapa maya katxäsirinakasti, kimsa tunka kimsan kilo qullqimpi luratänwa.

28Ukatsti israelitanak taypit apthapit qullqimpix Besalel chachax sayir lawanakan t'iriñanakap luräna, sayir lawanakan alax thiya tuqipampi, anillonakapamp lurarakïna.

29Tatitur churäwi katuyat broncex, pä waranqa kimsa pataka kimsa tunka suxtani kilo, pusi pataka gramonïnwa,

30uka broncempisti Tatitump Jikisiñ Carpa punku takxäsirinakap lurapxäna, ukhamarak bronce altara, bronce rejillapsa, altaran taqi yänakapsa,

31uka kipkaraki, qullan chiqawja muyuntki uka anqäxan ch'akurunakapsa, takxäsirinakapsa, anqäx punkun takxäsirinakapsa lurapxarakïna.

← Chapter 37 Chapter 39 →