Exodus 35

aymara-1997

1Moisesax taqpach israelitanakaruw jawsthapïna, ukatsti Tatitun kamachinakap jupanakar yatiyäna: “Tatitux akanak lurañas muni:

2Suxta uruw irnaqapxäta, paqallqür urusti jumanakatakix qullanäniwa, Tatitur jach'añchañ samarañ urüniwa. Khititix uka urun irnaqanixa, jiwayatäniwa.

3Kawkhantix jumanakax jakapkäta ukanxa, sábado urux janipuniw kuna ninsa naktayapxätati” sasa.

4Moisesasti taqpach israelitanakaruw akham säna: “Tatitux taqi akanak lurañas muni:

5Jumanak taypin Tatitutak mä churäwi apthapipxäta. Tatitur chuymapatjam churäwi apaniñ munirinakax taqi chuymaw apanipxañapa quri, qullqi, bronce,

6sajuna telanaka, ch'iyar wila telanaka, wila telanaka, suma lino, cabra t'awra,

7wilar samichat oveja lip'ichi, suma lip'ichinaka, acacia lawanaka,

8lamparanak nakhayañ aceite, luqtañ aceitempitaki, q'apkir inciensompitaki suma q'apkir qullanaka,

9ónice sat qalanaka, yaqha suma qalanaka, sacerdoten efod isipampiru, pectoral isipampir ch'ukxatañataki.

10“Khitinakatix suma amuyt'ampi k'achachañ yänak lurirïpki jupanakax jutapxpan, Tatitun arsutaparjam taqi uka yänak lurañataki:

11Qullan chiqawja, carpapamppacha, uka carpan patxapa, t'iriñanakapa, lawanakapa, muruq'u lawanakapa, sayir lawanakapa, takxatayañanakapa,

12arca, kallañanakapamppacha, qhuphiñapa, arca imxatañapa,

13mesa, kallañapamppacha, taqi yänakapampi, Tatitur luqtañ t'ant'a,

14qhanayañatak candelero, yänakapampi, lamparanakapampi, lamparanak nakhayañatak aceitempi,

15incienso nakhayañ altara, kallañapamppacha, luqtañ aceite, suma q'apkir incienso, qullan chiqar mantañatak cortina,

16wilañchanak nakt'ayañ altara, bronce rejillapampi, kallañapamppacha, taqi yänakapampi, uma uchañ lamana, qunt'añapamppacha,

17carpa anqäxatak cortinanaka, sayir lawanakapampi, takxäsiripamppacha, carpa anqäxar mantañ punkutak cortina,

18qullan chiqawjampitaki, anqäxapampitak ch'akurunaka, wiskanakapamppacha;

19qullan chiqawjan yupaychäwi lurañatak p'itat isinaka, Aarón sacerdoten qullan isinakapa, ukatsti wawanakapan sacerdote isinakapa.”

20Israelitanakasti taqiniw Moisesan ukat sarawayxapxäna.

21Uka qhipatsti, khitinakatix chuymanakapan amthapisis Tatitutak churañ munapkän ukanakaxa, taqi chuymaw churäwinak apt'at kutt'anipxäna, Tatitump Jikisiñ Carpa lurañatak wakiski ukanakataki, sacerdoten qullan isinakapatak wakiski ukanakataki.

22Ukatsti chachanaka, warminakaw chuymapatjam apanipxäna, t'iriñanaka, surtijanaka, argollanaka, quri wallqanaka, qurit lurat kunayman yänaka. Sapa mayniw Tatitutak yaqhachapkatayna uka quri apanipxäna.

23Khitinakantix utjkäna wila morado tela, wila tela, suma lino, cabra t'awra, wilar samichat oveja lip'ichi, jan ukax suma lip'ichinakasa, jupanakax ukanak apanipxäna.

24Yaqhipanakasti qullqi, bronce, acacia lawanakampi Tatitutak apanipxäna, kunanakatix wakiski ukanak lurañataki.

25P'itañ yatir warminakasti, suma p'itatanakap apanipxäna, wila morado tela, wila telanaka, suma lino telanaka;

26taqi chuyma yanapasir warminakax, cabra t'awranak qapupxarakïna, jupanakasti suma lurañanak yatipxäna.

27Israelitanakan jilïrinakapasti ónice sat qalanak apanipxäna, yaqha suma qalanakampi jilïr sacerdoten efod isipampiru, pectoral isipampir ch'ukxatañataki,

28ukxarusti suma q'apkir qullanak apanipxarakïna, lamparanak qhanayañatak aceite, luqtañ aceite, ukhamarak suma q'apkir incienso.

29Israelitanakasti chachanakasa, warminakas taqiniw chuymanakapan yanapt'asiñ munapxäna, churäwinak apanipxarakïna, Tatitux Moisesar siskatayna taqi ukanak lurañataki.

30Moisesasti israelitanakarux akham sänwa: “Ist'apxam, Tatitux Judá ayllunkirit Urí sat chachan Besalel yuqaparuw ajllïna, Hur chachan allchhiparu,

31juparusti Diosan ajayupampiw phuqt'i, yatiñ kankañampi, suma amuyt'añamp phuqt'araki, taqi kunanak yatiñapataki,

32taqi kunanak lurañapataki, qurita, qullqita, broncet kunayman suma yänak lurañapataki,

33k'ajkir qalanak k'uthasin suma isisiñanakar ch'ukxatañapataki, lawanak khithusin sumanak lurañapataki, kunayman yaqha k'achachañanak lurañapataki.

34Tatituw jupar yatichañ chuyma uchi. Jupampiru, Dan ayllunkir Ahisamac chachan Oholiab yuqapampir yatichañapataki,

35jupanakarusti Tatitux sumanak lurañ amuyumpiw phuqt'i, amparamp kunayman yänak lurañataki, morado telaru, wila morado telaru, wila telaru, suma lino telar p'itakipañataki, kunayman yaqha sumanak sawuñataki.

← Chapter 34 Chapter 36 →