Exodus 33

aymara-1997

1Tatitux Moisesar sänwa: —Aka chiqat sarxam, Egiptot irpsunkta uka markamp chika. Kawkha uraqtix wawanakamaruw churä sas Abrahamaru, Isaacaru, Jacobur arskäyäta uka uraqiru.

2Nayaw angelaxar jumar irpañapatak khithanï, ukatsti uka uraqit nayaw cananeonakaru, amorreonakaru, hititanakaru, ferezeonakaru, heveonakaru, jebuseonakarus jaqunukü.

3Sarapxam kawkhantix lechesa, misk'isa umjam jalaski uka uraqiru. Ukampis janiw nayax jumanakamp chik sarkäti, thakhin jumanakar jan tukjaskañaxataki, jumanakax jan ist'asir jaqinakäpxtawa —sasa.

4Markankirinakasti uka qhuru arunak ist'asax wal llakthapisipxäna, janiw khitis suma quri yänakap uchaskänti,

5Tatitusti Moisesaruw satayna: —Israelitanakar akham yatiyam: “Jumanakax sinti jan ist'asir jaqinakäpxtawa. ¡Nayatix mä juk'a pachakis jumanak taypinkiristxa, mäkiw tukjapxirisma! Ukhamasti suma quri yänakam apaqasipxam, ukat nayax jumanakamp kun lurañsa yatï” —sasa.

6Ukat, israelitanakax Horeb qullun jikxatasipkän ukkhatpach suma quri yänakap jan uchaskxapxänti.

7Moisesasti campamentot jaya chiqaruw mä carpa uchäna, ukarusti Diosampi Jikisiñ Carpa sasaw sutichäna. Tatitur jiskt'asiñ munirinakaxa, Carparuw sarirïna, ukasti campamento anqäxankänwa.

8Moisesax Carpar sarkän ukapachasti, taqiniw sartasipxäna, carpanakapat mistunisaw punkur sayt'at uñch'ukipxäna Moisesan carpar mantañapkama.

9Moisesax Carpar mantkän ukapachasti, sayt'u qinayax saraqanisin Carpa punkuruw sayt'äna, ukchañkamasti Tatitux Moisesaruw parläna.

10Jaqinakasti Carpa mantañar qinayan sayt'ipanxa, sapa mayniw carpanakap punkun killt'asis Diosar yupaychapxäna.

11Diosasti Moisesampix ajanuy ajanuw parläna, kamisatix mä jaqix jila masipamp parlaski ukhama, ukatsti Moisesax campamentoruw kutt'anxäna. Ukampis jupan yanapiripa, Nun chachan yuqapa Josué waynaxa, Tatitump Jikisiñ Carpat janipuniw mistunirïkänti.

12Moisesasti Tatituruw säna: —Jumax “aka marka irpam” sasaw mayista, ukampis janiw khititix nayamp chik sarkani uk siskistati. Sarakistawa: “Jumar uñt'smawa, munasiñaxaw jumatak utjitu” sasa.

13Ukampis uka arsutanakamatix chiqächi ukaxa, amtäwinakam yatiyita, ukhamat jumar alkatañaxataki, juman khuyapayasiñam nayatak utjaskatap yatiñaxataki. Jan armasimti, aka markax juman markamawa —sasa.

14Tatitusti ukxaruw säna: —Nayaw jumamp chika saraskä, janiw kunatsa llakiskätati —sasa.

15Moisesasti saskakïnwa: —Jumatix nanakamp chik jan sarkäta ukaxa, aka chiqat jan mistuyapxistati.

16Jumatix nanakamp jan sarkasma ukasti ¿kunjämatarak yatipxiriststi markamasa, nayasa juman yanapamamp sarasipkataxsti? Juman yanapamampikiw markamampi, nayampix aka uraqin utjir yaqha markanakat mayjäpxirista —sasa.

17Tatitusti sarakïnwa: —Kuntix siskta ukxa, lurarakïwa, arsutamar jaysatax layku, nayraqataxan khuyapayasiñax jikxatatam laykuraki —sasa.

18Moisesasti achikt'asïnwa: —¡Ukhamasti, qhapaq kankañamay uñacht'ayita! —sasa.

19Ukat Tatitux sarakïna: —Nayax khuyapayasiñaxat uñacht'ayäma, sutixsa juman ist'kañ arsurakï. Khitirutix nayax munkta ukaruw khuyapayä, khitirutix nayax munkta ukaruw yanapt'arakï.

20Ukampis sismawa: “Janiw ajanux uñkatkitasmati, khititix ajanux uñkatitanixa, uka jaqix jiwaniwa” sasa.

21Tatitux sarakïnwa: —Naya jak'an utjki uka qarqa patxar sayt'asim.

22Qhapaq kankañaxax sarakipkani ukapachasti, nayaw qarqan utjir p'iyar uchäma, nayan sarakipañaxkamax amparaxampiw nayranakam imxatäma.

23Amparax ayaqasxä ukkhasti, jumax jikhanixak uñjäta; ukampis janiw ajanux uñjkätati —sasa.

← Chapter 32 Chapter 34 →