Exodus 25

aymara-1997

1Tatitux Moisesar sänwa:

2“Israelitanakar yatiyam, nayatak mä waxt'a apanipxañapataki. Khitinakatix taqi chuymampi churañ munkani jupanak taypit apthapipxäta.

3Akham churäwinak apthapipxäta: quri, qullqi, cobre,

4morado tela, púrpura sat tela, wila tela, suma lino tela, cabra t'awra,

5wilar samichat oveja lip'ichinaka, suma lip'ichinaka, acacia lawanaka,

6micha nakhayañ aceite, luqtañ aceitempitaki, q'apkir inciensompitakisti, suma q'apkir qullanaka,

7ónice sat suma qalanaka, ukhamarak yaqha suma qalanaka, sacerdoten efod isipampiru, pectoral sat isimpampir uchañataki.

8Ukatsti nayatakix mä qullan utjäwi lurarapipxitäta, nayan jumanak taypin utjasiñaxataki.

9Ukampis uka qullan utjäwxa, ukhamarak taqi yänakapsa, kunjämtix nayax uñachaykäma ukhamarjamaw luräta.

10“Ukatsti acacia lawat mä arca luräta, sayt'urux mä metro tunka centimetroni, iranarusti suxta tunka phisqan centimetroni, alayarusti suxta tunka phisqan centimetroni.

11Ukarusti manqhatsa, anqäxatsa qurimpiw lip'suyäta, patatsa qurimpiw muyukipayarakïta.

12Ukxarusti pusi argollanak qurit luräta, ukatsti arcan puspach kayuparuw ukanak uchäta, payxa maysaru, paysti maysaruraki.

13Ukxarusti acacia lawat sayt'u lawanak wakicharakïta, uka lawarusti qurimpiw lip'ikipayäta,

14ukatsti uka lawanakxa arca kayunakan uchatäki uka argollanakaruw sut'untayäta, uka lawanakampi waytasin arca kalltañataki,

15uka lawanakxa arca kayunkki uka argollanakatxa janipuniw aysütati; pachparuw jaytäta.

16Uka arcarusti nayax churkäma uka kamachinak uchäta.

17“Ukxarusti suma quritkamak arcatakix mä qhuphiñ luräta, sayt'urux mä metro tunka centimetroni, iranarusti suxta tunka phisqan centimetroni,

18ukatsti suma quritkamak pä querubines sat chhiqhaninak luräta, martillomp liq'suta, uksti purap thiyaruw uchäta.

19Arca qhuphiñampi, querubines sat chhiqhaninakampix maypachakïñapawa; jupanakasti purap thiyankañapawa, maynïrix maysa thiyana, maynïristi maysa thiyanaraki,

20purap uñthapisita, arca qhuphiñar uñtatkama, chhiqhanakapasti janatatatäñapawa qhuphiñ patxa ukampi imxatañataki.

21Ukatsti uka qhuphiñ arca patxar uchäta, uka arca manqhirusti churkäma uka kamachi uchäta.

22Nayax arust'äwi arca patxankki uka pä querubines sat chhiqhaninak taypin jumampix jikisï. Ukatsti, uka patatpach israelitanakan lurapxañapäki ukanak yatiyäma.

23“Acacia lawat mä mesa luram, sayt'urux llätunk tunka centimetroni, iranarusti pusi tunka phisqan centimetroni, alayarusti suxta tunka phisqan centimetroni.

24Ukarux suma qurimpi lip'ikipayam, thiyanakaparusti qurimpi muyukipayarakim.

25Uka mesan thiyapsti iranarux paqallqu centimetroni lurarakïta, uka thiyarux qurimpiw patat muyukipayäta;

26ukxarusti qurit pusi argollanak luräta, ukanaksti mesan puspach kayuparuw uchäta,

27uka argollanakax mesa thiya manqhankañapawa, ukhamat lawanak ayantasin uka mesa kallañataki.

28Uka kallañ lawanaksti acacia lawat luräta, ukatsti patat qurimpiw lip'ikipayäta.

29Vino waxt'a luqtañatakisti, chuwanakapa, wisllanakapa, wayuchanakapa, jach'a qirunakapsa suma qurit luräta.

30Uka mesa patxarusti, nayatak yaqhachat t'ant'xa naya nayraqataxar uchapunïtawa.

31“Ukxarusti suma qurit mä candelero martillomp liq'sus luräta. Uka candeleron kayupasa, sayiripasa, qirunakapasa, panqaranakapas mayakïñapawa,

32thiyanakapatsti suxta amparanakaw saraqañapa, maysatxa kimsa, maysatsti kimsaraki.

33Candeleron sayiripat saraqki uka suxta amparanakan kimsa qiruw utjañapa almendro panqarar uñtata, muqunakapampi, panqar laphinakapampi

34candeleron sayiripax pusi qirunïniwa, almendro panqarar uñtataraki, muqunakapampi, panqar laphinakapampi.

35Candeleron aynach tuqipan sapa paya amparat saraqki ukax mä muqunïniwa.

36Muqunakapampi, amparanakampi, candelerompix mayakïñapawa, ukasti suma quritkamakïñapawa martillomp liq'sutaraki.

37Ukatsti paqallqu lamparanak lurarakïta, uksti patxaruw uchäta, ukhamat nayraqatar qhant'añapataki,

38tenazanakampi, jisk'a chuwanakampix suma qurit luratäñapawa.

39Candelero, ukhamarak yänakapsa kimsa tunka kimsan kilo suma qurit lurarakïta,

40suma amuyumpiw luräta, qullun uñacht'ayksma ukhamarjama.

← Chapter 24 Chapter 26 →