Exodus 20

aymara-1997

1Diosasti taqi aka kamachi arunak arsüna:

2“Nayaw juman Tatit Diosamätxa, nayaw Egipto uraqit irpsunsma, t'aqhisiyat jikxataskäyät uka markata.

3“Janiw jumax nayat sipan yaqha diosanak uchasïtati.

4“Janiw yaqha diosanak uñtat lurasïtati, alaxpachan utjir uñtatsa, aka uraqin utjir uñtatsa, quta manqha uraqin utjir uñtatsa.

5Janiw uka diosanakatak killt'asïtati, janirakiw yupaychätasa, nayaw juman Tatit Diosamätxa, jan yaqhampïñam munir Diosätwa, nayar uñisir awkinakan juchapatxa, nayaw wawanakaparusa, allchhinakaparusa, allchhinakan allchhinakaparus mutuyta;

6ukampis nayar munirinakaru, kamachi arunakaxar phuqhirinakarux wawanakapan wawanakaparuw khuyapt'ayta.

7“Janiw Tatit Diosaman sutip inamayatak aytasïtati, jupasti inamay sutip aytasirirux mutuyaniwa.

8“Sábado urut amtasïta, uka urun Diosar jach'añchañataki.

9Jumax suxta uruw irnaqäta, taqi kuntix lurañamäki ukanakxa, ukürunakaw luräta,

10paqallqüri urusti samarañ uruwa, Tatit Diosamatak yaqhachat uruwa. Uka urux janiw jumax kuns lurätati, yuqamasa, phuchhamasa, uywatamasa, uywanakamasa, utamankki uka jaya markankir jaqis janiw kuns lurapxañapäkiti.

11Tatitux suxta urun luräna, alaxpacha, akapacha, qutanaka, kunanakatix ukanakan utjki ukanaka; paqallqüri urunsti samaränwa. Ukat Tatitux paqallqür urur aski waxt'äwimp phuqt'äna, qullan urüñapatakiw arsurakïna.

12“Awkimaru, taykamar waqaycham, Tatit Diosamax churkätam uka uraqin jaya maranak jakañamataki.

13“Janiw jiwayätati.

14“Janiw wachuq jucha lurätati.

15“Janiw lunthatätati.

16“Janiw jaqi masimatak kuna k'ari arunaksa parlätati.

17“Janiw jaqi masimankir utap munapayätati: janirakiw warmipsa, uywatapsa, vacapsa, asnopsa, kunanakapatix utjki ukanaksa munapayätati” sasa.

18Taqpach israelitanakaw qhixu qhixunakampi, trompetan phust'atapamp ist'apxäna, lliju llijunaka, qullut jiwq'inak mistur uñjapxarakïna; jupanakasti wal axsarayasipxäna, jayatak uñch'ukipxarakïna.

19Ukat Moisesar sapxäna: —Jumak parlapxita, nanakasti ist'apxämawa; janik Diosax nanakamp parlkpanti, ukhamat jan jiwañanakaxataki —sasa.

20Moisesasti israelitanakarux sarakïnwa: —Jan axsarapxamti. Diosax jumanakar yant'iriw juti, jupar axsartasapun sarnaqapxañamataki, ukhamat jucha jan lurapxañamataki —sasa.

21Ukchañkamasti israelitanakax jayjankakïnwa, Moisesasti Diosax jikxataskän uka ch'amak qinayaruw jak'achasïna.

22Tatitux Moisesar sänwa: —Israelitanakarux akham sätawa: “Jumanakax uñjapxtawa, kunjämsa nayax alaxpachatpach jumanakamp parlkta ukxa.

23Jumanakax janiw yaqha diosanak lurasipxätati, quritsa, qullqitsa, jupanakar nayarjam yupaychañamataki.

24Laq'at nayatak mä altar lurarapipxita, uka altar patan jumanakan ovejanakamatsa, vacanakamatsa sumankañ nakt'at wilañchanak luqtapxitäta. Nayasti jutasin jumanakar aski waxt'äwinakamp phuqt'apxäma, kawkhanakantix nayan sutixan amtatäñap munkä ukkhanakana.

25Jumanakatix qalanakat mä altar wakicharapipxitäta ukaxa, janiw k'uthat qalanakampi lurapxätati, k'uthat qalanakampi lurat altarax janiw askïkaspati.

26Nayan altaraxax jan makhatañanakan luratäñapawa, makhatasin jumanakax q'alal janchinakam jan uñacht'ayaskañataki” —sasa.

← Chapter 19 Chapter 21 →